កោះតៃវ៉ាន់ស្វាគមន៍គណៈប្រតិភូសមាជិកសភាអាល្លឺម៉ង់លើកដំបូងនៅក្នុងឆ្នាំ ២០២៣ នេះ

រដ្ឋធានីតៃប៉ិ៖ កាលពីថ្ងៃចន្ទ ទី០៩ ខែមករា ឆ្នាំ២០២៣ ក្រុមសមាជិកសភាគណបក្ស​ប្រជាធិបតេយ្យសេរីអាល្លឺម៉ង់ ដឹកនាំដោយលោកស្រី Marie-Agnes Strack-Zimmer​mann ប្រធានគណៈកម្មាធិការការពារជាតិនៃសភាជាន់ទាបសាធារណរដ្ឋសហព័ន្ធអាល្លឺម៉ង់ និងលោក Johannes Vogel អនុប្រធានគណបក្ស បានអញ្ជើញមកដល់​សាធារណរដ្ឋចិន (កោះតៃវ៉ាន់)។

សេចក្តីប្រកាសព័ត៌មានរបស់ក្រសួងការបរទេសតៃវ៉ាន់បានឱ្យដឹងថា ក្នុងអំឡុងពេលនៃដំណើរទស្សនកិច្ចរយៈពេល ៤ ថ្ងៃ ពីថ្ងៃទី០៩-១២ ខែមករា ឆ្នាំ២០២៣) នោះ គណៈប្រតិភូនេះ គ្រោងជួប​ពិភាក្សាការងារជាមួយលោកស្រី Tsai Ing-wen ប្រធានាធិបតីតៃវ៉ាន់ និងមន្ត្រីជាន់ខ្ពស់រដ្ឋាភិបាល ជាច្រើនរូបទៀត ដែលរួមមាន លោក Su Tseng​-​chang នាយករដ្ឋមន្ត្រីតៃវ៉ាន់ និងលោក Wellington Koo អគ្គលេខាក្រុមប្រឹក្សាសន្តិសុខជាតិ។ លោក You Si-kun ប្រធានសភាតៃវ៉ាន់ និងលោក Joseph Wu រដ្ឋមន្ត្រី​ក្រសួង​ការបរទេសតៃវ៉ាន់ សហការរៀបចំទទួលអាហារ។

ក្រសួងការបរទេសតៃវ៉ាន់បានឱ្យដឹងទៀតថា គណៈប្រតិភូនេះ ក៏គ្រោងជួបពិភាក្សាការងារ ​ជាមួយមន្ត្រីក្រសួងឌីហ្ស៊ីតាល់, ក្រុមប្រឹក្សាកិច្ចការចិនដីគោក និងក្រុមអ្នក​ជំនាញ​តៃវ៉ាន់ជាច្រើនរូបទៀត។ គណៈប្រតិភូនេះ ក៏នឹងគ្រោងធ្វើទស្សនកិច្ចនៅឧទ្យានវិទ្យាសាស្ត្រ Hsinchu និងសារមន្ទីរសិទ្ធិមនុស្សផងដែរ។ សមាជិកគណៈប្រតិភូ​សភា​អាល្លឺម៉ង់មួយចំនួន បម្រើការងារនៅគណៈកម្មាធិការ​​សិទ្ធិមនុស្ស  និងជំនួយមនុស្សធម៌។

ក្រសួងការបរទេសតៃវ៉ាន់ បានឱ្យដឹងទៀតថា នេះគឺជាគណៈប្រតិភូសភាអាល្លឺម៉ង់លើកដំបូង​ដែលបានអញ្ជើញមកធ្វើទស្សនកិច្ចនៅកោះតៃវ៉ាន់ ក្នុងឆ្នាំ ២០២៣ នេះ និងជាលើកទី ៣ ក្នុងរយៈពេលជាង ៣ ខែកន្លងមកនេះ ចាប់តាំងពីខែតុលា ឆ្នាំ២០២២​ មក៕

http://ព័ត៌មានសភាអន្តរជាតិ ១០-០១-២៣-កែវ ធាវី ប្រែសម្រួលពី៖ https://focustaiwan.tw/politics/202301090005