លោក Fumio Kishida នាយករដ្ឋមន្ត្រីជប៉ុន ក្នុងពិធីចុងឆ្នាំនៅផ្សារភាគហ៊ុនតូក្យូ នៅថ្ងៃសុក្រ ទី៣០ ខែធ្នូ ឆ្នាំ២០២២

រាជរដ្ឋាភិបាល និងគណបក្សកាន់អំណាចជប៉ុន ទំនងជាប្រឈមនឹងបញ្ហាមួយចំនួនក្នុងសម័យប្រជុំពេញអង្គសភា នាពេលខាងមុខ ដែលត្រូវបានគេរំពឹងថា នឹងចាប់ផ្តើម​នៅក្នុងខែមករា ឆ្នាំ២០២៣ នេះ។ គណបក្សកាន់អំណាច កំពុងតែមិនចុះសម្រុងគ្នាជាមួយក្រុមគណបក្សប្រឆាំងលើបញ្ហាជាច្រើន ដែល​រួមមាន ផែនការថវិកាឆ្នាំសារពើពន្ធ​២០២៣ ដែលត្រូវបានចំណាយច្រើនលើវិស័យការពារជាតិ និង​សេចក្តីព្រាងច្បាប់ស្តីពី ការពន្យារពេលដំណើរការម៉ាស៊ីនរ៉េអាក់ទ័រនុយក្លេអ៊ែរ ក្រោយរយៈពេល ៦០ ឆ្នាំ។

កាលពីថ្ងៃសុក្រ ទី៣០ ខែធ្នូ ឆ្នាំ២០២២ លោក Fumio Kishida នាយករដ្ឋមន្ត្រីជប៉ុន បានថ្លែង ក្នុងពិធីចុងឆ្នាំមួយនៅឯទីផ្សារភាគហ៊ុនតូក្យូថា «លោកនឹងខិតខំ​ដោះស្រាយ​គោល​នយោបាយនៅឆ្នាំថ្មីនេះ ឱ្យបានល្អប្រសើរសម្រាប់សេដ្ឋកិច្ចជាតិ និងប្រជាជនជប៉ុន»។

ប្រភពព័ត៌មានមួយចំនួន បានឱ្យដឹងថា លោក Kishida ទំនងជាចង់សម្រេចថវិកានេះភ្លាមៗ ហើយ នឹងបន្តធ្វើការងារគោលនយោបាយសំខាន់ៗនេះ។ ប៉ុន្តែ ពេលវេលា​ដ៏លំបាកនេះ កំពុងទន្ទឹងរង់ចាំលោកនាយករដ្ឋមន្ត្រីដោះស្រាយ។

គណបក្សប្រជាធិបតេយ្យរដ្ឋធម្មនុញ្ញជប៉ុន និងគណបក្សប្រឆាំងមួយចំនួនទៀត ត្រូវបានគេរំពឹងថា នឹងពិនិត្យពិភាក្សាលើសេចក្តីព្រាងច្បាប់ដែលបានគ្រោងទុកស្តីពី បទប្បញ្ញត្តិម៉ាស៊ីនរ៉េអាក់ទ័រនុយក្លេអ៊េរ ដើម្បីពន្យារពេលដំណើរការម៉ាស៊ីនរ៉េអាក់ទ័រនេះ ក្រោយរយៈពេល ៦០ ឆ្នាំ​ ក្នុងការឆ្លើយតបទៅនឹងតម្លៃថាមពលឡើងខ្ពស់ និង​និន្នាការសកលសម្រាប់ការកាត់បន្ថយឧស្ម័នកាបូន។

រាជរដ្ឋាភិបាល ក៏គ្រោងដាក់ស្នើសេចក្តីព្រាងច្បាប់មួយផងដែរ ដើម្បីបង្កើតច្បាប់ធានាការចំណាយលើវិស័យការពារជាតិ តាមរយៈការលក់ទ្រព្យសម្បត្តិ និងមធ្យោបាយ​ផ្សេងៗរបស់រដ្ឋ។ ទោះបីជាក្រុមគណបក្សប្រឆាំងជំទាស់នឹងផែនការរបស់គណបក្សកាន់អំណាចក្នុងការលើកកម្ពស់សមត្ថភាពវិស័យការពារជាតិ យ៉ាងណាក៏ដោយ៕

http://ព័ត៌មានសភាអន្តរជាតិ ០៥-០១-២៣-កែវ ធាវី ប្រែសម្រួលពី៖ https://japannews.yomiuri.co.jp/politics/politics-government/20230103-81517/