លោក Li Zhanshu ប្រធានសភាប្រជាជនចិន និងលោក Ferdinand Romualdez Marcos Jr. ប្រធានាធិបតីហ្វីលីពីន

លោក Li Zhanshu ប្រធានគណៈកម្មាធិការអចិន្រ្តៃយ៍នៃសភាប្រជាជនចិន (NPC) បានទទួលជួបលោក Ferdinand Romualdez Marcos Jr. ប្រធានាធិបតីនៃសាធារណរដ្ឋ​ហ្វីលីពីនដែលកំពុងតែបំពេញទស្សនកិច្ចនៅក្នុងសាធារណរដ្ឋប្រជាមានិតចិន។ ជំនួបនេះបានធ្វើឡើងនៅក្នុងទីក្រុងប៉េកាំង កាលពីថ្ងៃពុធ ទី០៤ ខែមករា ឆ្នាំ២០២៣។ លោក Li បានថ្លែងថា ចិនតែងតែពិនិត្យមើល និងអភិវឌ្ឍន៍ចំណងទាក់ទងរបស់ខ្លួនជាមួយហ្វីលីពីនតាមទស្សនវិស័យជាយុទ្ធសាស្រ្ត។

​លោក Li បានថ្លែងបន្តថា ចិនត្រៀមរួចជាស្រេចក្នុងការធ្វើការជាមួយហ្វីលីពីន ដើម្បីប្រតិបត្តិតាម កុងសង់ស៊ីសរបស់ប្រមុខនៃប្រទេសទាំងពីរ ដើម្បីសម្រេចបាននូវ​មិត្តភាព កិច្ចសហប្រតិបត្តិការស៊ីជម្រៅ ដោះស្រាយការខ្វែងគំនិតគ្នាតាមរយៈការពិគ្រោះយោបល់ជាមិត្តភាព និងជំរុញការអភិវឌ្ឍឱ្យកាន់តែខ្លាំងក្លានៃចំណងទាក់ទង​របស់ខ្លួន​នៅក្នុង​ទំព័រ​សករាជថ្មី។ លោក Li បានថ្លែងបន្ថែមថា កាលពី១០ឆ្នាំកន្លងមក លោក Xi jinping អគ្គលេខាធិការមជ្ឈិមបក្សកុម្មុយនិស្តចិន (CPC) បានដឹកនាំបក្សកុម្មុយនិស្តចិន និង​ប្រជាជនចិនមកពីគ្រប់ក្រុមកុលសម្ព័ន្ធទាំងអស់សម្រេចបាននូវសមិទ្ធផលជាប្រវត្តិសាស្រ្តនៅក្នុងបុព្វហេតុដើម្បីបក្ស និងប្រទេសជាតិ ដែលបានផ្តល់នូវមូលដ្ឋានគ្រឹះ​ដ៏រឹងមាំ​ជាងមុន និងធានាបាននូវការប្រកាន់ខ្ជាប់ និងការអភិវឌ្ឍសង្គមនិយមជាមួយនឹងចរិតលក្ខណៈបែបចិន។ សភាប្រជាជនចិនមានឆន្ទៈក្នុងការពង្រឹងការផ្លាស់​ប្តូរគ្នា​ទៅវិញទៅមក និងកិច្ចសហប្រតិបត្តិការជាមួយសភានៃប្រទេសហ្វីលីពីន។

សម្រាប់ភាគីហ្វីលីពីន លោក Ferdinand Romualdez Marcos Jr. បានថ្លែងថា ហ្វីលីពីនបាន ត្រៀមរួចជាស្រេចក្នុងការធ្វើការជាមួយចិន ដើម្បីលើកកម្ពស់កិច្ចសហ​ប្រតិបត្តិការ​ទ្វេ​​ភាគី ឈានដល់កម្រិតជាយុទ្ធសាស្រ្ត និងដោះស្រាយបញ្ហាប្រឈមរួម។ លោក Marcos Jr. បានថ្លែងអំណរគុណដល់ចិនចំពោះការគាំទ្រដ៏​មានតម្លៃរបស់ចិន​ដល់ហ្វីលីពីន ក្នុងការប្រយុទ្ធប្រឆាំងជំងឺរាតត្បាតជាសកលកូវីដ-១៩ និងបានស្វាគមន៍ដល់ទេសចរណ៍ចិនក្នុងការធ្វើដំណើរមកកាន់ប្រទេសហ្វីលីពីន និងសហគ្រិនចិន ក្នុងការ​វិនិយោគនៅក្នុងប្រទេសហ្វីលីពីន៕

http://ព័ត៌មានសភាអន្តរជាតិ ០៥-០១-២៣- ឈាវ សុផាត ប្រែសម្រួលពី៖ http://www.china.org.cn/china/Off_the_Wire/2023-01/04/content_85040339.htm