លោកKevin McCarthyប្រធានក្រុមសមាជិកសភាតំណាង របស់គណបក្សសាធារណរដ្ឋ

អស់រយៈពេល១សតវត្សរ៍មកហើយ ដែលឆាកល្ខោននយោបាយ(Political drama)ដូចថ្ងៃនេះ មិនបានកើតឡើងទាល់តែសោះ ក្នុងសភាតំណាងរបស់សហរដ្ឋអាមេរិក​។ ថ្ងែនេះគឺជាថ្ងៃទី៣ ខែមករា ឆ្នាំ២០២៣  លោកKevin McCarthy ប្រធានក្រុម សមាជិកសភាគណបក្សសាធារណរដ្ឋ បានបរាជ័យផ្ទួនៗ ក្នុងការបោះឆ្នោតជ្រើសតាំង​ប្រធាន​សភាតំណាងសហរដ្ឋអាមេរិកសម្រាប់នីតិកាលថ្មី ទី១១៨។

នៅរាត្រីថ្ងៃអង្គារ ទី៣ ខែមករា ឆ្នាំ២០២៣ កិច្ចប្រជុំរបស់សភាតំណាង ត្រូវបានលើកទៅពេលបន្ទាប់ ក្នុងស្ថានភាពដែលគ្មានប្រធាន ដែលនេះគឺជាលើកទី១ហើយ គិតចាប់តាំងពីឆ្នាំ១៩២៣មក ដែលកាលនោះ សភាតំណាងសហរដ្ឋអាមេរិក ក៏ជួបបញ្ហាដូចខាងលើដែរ​ គឺបញ្ហានៃការមិនទាន់ជ្រើសរើសបាន ប្រធានរបស់ខ្លួន បន្ទាប់ពីការ​បោះឆ្នោតជុំទី១។

ថ្ងៃដំបូងនៃការចាប់ផ្តើមនីតិកាលថ្មី គួរតែជាថ្ងៃដំបូងនៃជ័យជំនះរបស់គណបក្សសាធារណរដ្ឋ ពី ព្រោះ នៅក្នុងនីតិកាលថ្មីនេះ គណបក្សនេះគឺជាគណបក្​សដែលគ្រប់គ្រង​សភាជាន់ទាប​​ ក្រោយការបោះឆ្នោតកាលពីខែវិច្ឆិកា ឆ្នាំ២០២២។ ផ្ទុយស្រលះពីការរំពឹងទុក លោកMcCarthy បែរជាជួបនូវការប្រឆាំងពីផ្ទៃក្នុង គណបក្សរបស់ខ្លួន ហើយ​បង្កើតបាននូវប្រវត្តិថ្មីមួយ។

លោកMcCarthy ដែលជាសមាជិកសភាតំណាងមកពីរដ្ឋCalifornia បានបរាជ័យក្នុងការបោះឆ្នោត ៣ដងជាប់ៗគ្នា ដើម្បីជ្រើសរើសប្រធានសភាតំណាងនីតិកាលថ្មី​ ហើយគេក៏មិនទាន់ច្បាស់លាស់ដែរ ថាតើលោកនឹងជោគជ័យដែរឬទេ នៅពេលសមាជិកសភាតំណាង នឹងជួបប្រជុំនៅថ្ងៃពុធ ទី៤ ខែមករា ខាងមុខ ដើម្បីបន្តការងាររបស់ខ្លួន និងបោះឆ្នោតសាជាថ្មីលើបេក្ខភាពរបស់លោក ជាប្រធានសភាតំណាង។​ សមាជិកសភាតំណាងនឹងបន្តការបោះឆ្នោតរបស់ខ្លួន រហូតដល់មានបេក្ខជនមួយរូប ទទួលបានការ​​គាំទ្រភាគច្រើនដាច់ខាត។ អ្នកវិភាគមួយចំនួនបានបង្ហាញការយល់ឃើញថា លោកMcCarthy អាចនឹងទទួលបានជោគជ័យនៅក្នុងបោះឆ្នោតនៅពេលក្រោយ ក៏ប៉ុន្តែភាព​បរាជ័យរបស់លោកក្នុងថ្ងៃអង្គារនេះ បានបង្កឱ្យជាភាពច្របូកច្របល់ ជាប្រថ្នូលមិនល្អអំពីភាពវឹកវរនៃការអនុវត្តការងារសភាតំណាងសម្រាប់អាណត្តិថ្មី​ដែលមានរយៈ​ពេល​២ឆ្នាំ និងជាការបង្ហាញឃើញថា ក្រុមសមាជិកសភាគណបក្សសាធារណរដ្ឋ ដែលមាននិន្នាការស្តាំនិយម កំពុងធ្វើសង្រ្គាមដាក់គ្នា។

ការចរចាច្រើនលើក ធ្វើឱ្យគេមើលឃើញ អំពីភាពកំសោយរបស់លោកMcCarthy លទ្ធផលនៃការបោះឆ្នោតខែវិច្ឆិកា ឆ្នាំ២០២២ បាននាំឱ្យគណបក្សសាធារណរដ្ឋ មាន​លទ្ធភាពគ្រប់គ្រងសភាតំណាង ប៉ុន្តែគ្រប់គ្រងបាន ដោយសារតែមានអាសនៈច្រើនជាងគណបក្សប្រជាធិបតេយ្យតែបន្តិចបន្តួចប៉ុណ្ណោះ ដែលនេះឱកាស​មួយសម្រាប់សមាជិក​សភាមាននិន្នាការអភិរក្សជ្រុលនិយម ក្នុងគណបក្សសាធារណរដ្ឋ រួមគ្នាបោះឆ្នោតប្រឆាំងការជ្រើសតាំងលោកMcCarthy ជាប្រធានសភាតំណាង។

អ្នកសង្កេតតាមដានគណបក្សសាធារណរដ្ឋ បានឱ្យដឹងថា ស្នាប្រេះស្រាំមួយនេះ វាបានកើតឡើងជាយូរមកហើយក្នុងគណបក្ស។​ អ្នកបញ្ចុះបញ្ចូលគណបក្សសាធារណរដ្ឋ (Republican lobbyist) មួយរូប បានថ្លែងដោយមិនបញ្ចេញឈ្មោះ និងដោយត្រង់ៗអំពីការបោះឆ្នោតថ្ងៃអង្គារ ទី៣ ខែមករា ថា៖ ”លោកMc Carthy មិនបានកសាង​មិត្តភាព ជាមួយក្រុមមួយចំនួនក្នុងគណបក្សខ្លួនឯងឡើយ សម្រាប់រយៈពេលនេះឡើយ ហើយថែមទាំងមានសត្រូវច្រើនទៀត។ មានមនុស្សជាច្រើន ដែលមិនពេញចិត្ត លោកMcCarthy ដោយមូលហេតុនយោបាយ និងមូលហេតុផ្ទាល់ខ្លួន។”

លោកMcCarthy បានចូលទៅចរចាជាមួយអ្នកប្រឆាំងរបស់លោក ដែលអ្នកទាំងនោះបានចាត់ទុកលោកMcCarthyជាអ្នកឃ្លានអំណាចហួសហេតុ។ ក្នុងការចរចា​នេះ​លោកMcCarthy បានផ្តល់សម្បទានជាច្រើនដល់ពួកគេ ដើម្បីព្យាយាមលួងលោមពួកគេឱ្យបោះឆ្នោតគាំទ្រវិញ។ ចំណុចមួយនៃសម្បទានរបស់លោកMcCarthy គឺ​លោកMcCarthy ត្រូវបានគេរាយការណ៍ថា បានយល់ព្រមធ្វើវិសោធនកម្មបទបញ្ជាផ្ទៃក្នុងសភាតំណាង ដើម្បីបង្កើនភាពងាយស្រួល ក្នុងការដកហូតតំណែងប្រធានសភា ដែលនេះប្រៀបដូចជាការផ្តល់ឱ្យក្រុមប្រឆាំងនូវអំណាចដ៏ធំមួយ ដើម្បីត្រួតពិនិត្យអំណាចរបស់លោក។ អ្នកបញ្ចុះបញ្ចូលគណបក្សសាធារណរដ្ឋ ខាងលើបានថ្លែងថា៖ ”ការដែលលោកMcCarthy ទៅចរចាជាមួយសមាជិកសភាគណបក្សសាធារណរដ្ឋ គឺធ្វើឱ្យគេមើលឃើញថាលោកMcCarthy ខ្សោយ ខ្សោយមែនទែន។”

អ្នកប្រឆាំងលោកMcCarthy មានទឹកចិត្តខ្លាំង ទឹកចិត្តដ៏ខ្លាំងរបស់អ្នកប្រឆាំងនឹងលោកMcCarthy បានស្តែងចេញយ៉ាងច្បាស់ក្រឡែត នៅថ្ងៃអង្គារ ទី៣ ខែមករា ឆ្នាំ២០២២​។ ថ្ងៃអង្គារ ទី៣ ខែមករា លោកMcCarthy បានបរាជ័យក្នុងការបោះឆ្នោត៣ដង ជាប់ៗគ្នា មិនអាចទទួលបានសំឡេងគាំទ្រ២១៨សំឡេង ក្នុងចំណោមសមាជិក​សភាតំណាងសរុបចំនួន៤៣៥រូប។ ក្នុងស្ថានភាពដែលគណបក្សរបស់លោកMcCarthy មានអាសនៈចំនួន២២២ ការបោះឆ្នោតថ្ងៃអង្គារ នោះ បានបង្ហាញថា មាន​សមាជិក​សភាគណបក្សរបស់លោកMcCarthy ដែលមាននិន្នាការស្តាំនិយមជ្រុលចំនួន៩រូប បានបោះឆ្នោតប្រឆាំងលោកMcCarthy ដោយមូលហេតុមនោគមន៍វិជ្ជា​នយោបាយ និងមូលហេតុផ្ទាល់ខ្លួន។ ព្រឹត្តិការណ៍ថ្ងៃអង្គារ ទី៣ ខែមករា បានបង្ហាញថា លោកMcCarthy ត្រូវតែធ្វើសម្បទានឱ្យបានច្រើនជាងមុនជូនក្រុមប្រឆាំងលោក ក្នុងស្ថានភាពដែលគណបក្សសាធារណរដ្ឋមានអាសនៈ លើសគណបក្សប្រជាធិបតេយ្យបន្តិចបន្តួចប៉ុណ្ណោះ។ លោកRob Good សមាជិកសភាតំណាង​គណបក្សសាធារណរដ្ឋ​មកពីរដ្ឋVirginia បានថ្លែងនៅ ថ្ងៃអង្គារ ថា៖ “អ្នកប្រឆាំងលោកMcCarthy នឹងមិនផ្លាស់ប្តូរចិត្តរបស់ពួកគេ ឡើយ។”

នៅថ្ងៃអង្គារ ទី៣ ខែមករា ឆ្នាំ២០២៣ ដែលជាថ្ងៃដែលគួរឱ្យភ្ញាក់ផ្អើលបំផុត ពីព្រោះអ្នកប្រឆាំងនឹងលោកMcCarthy មិនត្រឹមតែបោះឆ្នោតប្រឆាំងនឹង​លោក​McCarthy ប៉ុណ្ណោះទេ ប៉ុន្តែថែមទាំងស្នើតែង តាំងលោកJim Jordan ឱ្យចូលរួម​ជាបេក្ខជនប្រជែងយកតំណែងប្រធានសភាតំណាង ជាមួយលោកMcCart- hyទៀតផង​ គឺស្នើឡើងតែប៉ុន្មាននាទីប៉ុណ្ណោះ បន្ទាប់ពីលោកJordanខ្លួនឯង ក៏បានបង្ហាញការគាំទ្រ លោកMcCarthy ប្រធានសភាតំណាងដែរ។ នៅក្នុងការបោះឆ្នោតជុំទី៣ លោកJordan ដែលជាឥស្សរជនលេចធ្លោមួយរូប ក្នុងក្រុមសមាជិកសភាតំណាងរបស់គណបក្សសាធារណរដ្ឋ ដែលមាននិន្នការស្តាំជ្រុលនិយម បានស្នើសុំឱ្យសមាជិកសភាតំណាង​គណបក្ស​សាធារណរដ្ឋ មូលមាត់គ្នាគាំទ្រលោកMcCarthy។ ប៉ុន្តែនៅជុំទីបីនោះដដែលមាន សមាជិកសភាតំណាងគណបក្សសាធារណរដ្ឋចំនួន២០រូប បានបោះឆ្នោតគាំទ្រ លោកJordan ​សម្រាប់តំណែងប្រធានសភាតំណាង ដែលជាហេតុធ្វើឱ្យលោកMcCarthy បរាជ័យម្តងទៀតនៅជុំទី៣នេះ។

ចំណែកសមាជិកសភាតំណាងគណបក្សប្រជាធិបតេយ្យវិញ ពួកគេសាមគ្គីគ្នាជាធ្លុងមួយបោះឆ្នោតគាំទ្រ ប្រធានក្រុមរបស់គេគឺលោកHakeem Jeffries ដែលមកពីបុរី​New York សម្រាប់តំណែងជាប្រ ធានសភាតំណាង។ តើអ្វីជាជម្រើសរបស់លើកMcCarthey នៅពេលនេះ? អ្នកសង្កេតការណ៍នយោបាយក្នុងរដ្ឋធានីWashington បានចាប់​ផ្តើមលើកឡើងនូវផ្លូវមួយចំនួន ដែលអាចនឹងបញ្ចប់ភាពទាល់ច្រកនេះ។ លោកRuth Bloch Rubin អ្នកវិទ្យាសាស្រ្តនយោបាយនៅសាកល វិទ្យាល័យ The University of Chicago ដែលសិក្សាអំពីភាពជាបក្សសម្ព័ន្ធ(Partisanship) បានលើកឡើងថា ”នៅក្នុងដំណាក់កាលនេះ លោកMcCarthy គឺជាចំណាប់ខ្មាំងដ៏សំខាន់របស់ក្រុមម្ខាងទៀត នៅក្នុងគណបក្សរបស់លោក”។ លោកMcCarthy បានសន្យាថា មិនធ្វើសម្បទានបន្ថែមទៀតឡើយ ប៉ុន្តែក៏គេមិនទាន់ច្បាស់ដែរ ថាលោកមានជម្រើសក្នុងការ​ធ្វើដូចការ​លើក​ឡើងនេះបានដែរឬទេ។ ដើម្បីទទួល បានជោគជ័យក្នុងការបោះឆ្នោត នៅថ្ងៃពុធ ទី៤ ខែមករា លោកMaCarthy អាចនឹងបង្ខំចិត្តធ្វើសម្បទានបន្ថែមទៀត ដើម្បីផ្គាប់ចិត្តអ្នក​ប្រឆាំងនឹងរូបលោក ដូចជាផ្តល់អ្នកនោះនូវតួនាទីជាប្រធានគណៈកម្មាធិការមួយចំនួនរបស់សភាតំណាង ឬតួនាទីល្អនៅក្នុងគណៈកម្មាធិការសភាតំណាង…។

http://ព័ត៌មានសភាអន្តរជាតិ ០៤-០១-២៣- តូនី ប្រែសម្រួលពី៖ https://www.bbc.com/news/world-us-canada-64158234