លោក Hirokazu Matsuno នាយកខុទ្ទកាល័យនាយករដ្ឋមន្ត្រីជប៉ុន

រដ្ឋធានីតូក្យូ៖ លោក Hirokazu Matsuno នាយកខុទ្ទកាល័យនាយករដ្ឋមន្ត្រីជប៉ុន បានថ្លែង កាលពីថ្ងៃចន្ទ ទី២៦ ខែធ្នូ ឆ្នាំ២០២២ ថា ការរំលាយសភា គឺស្ថិតក្នុងសមត្ថកិច្ច​របស់​នាយករដ្ឋមន្ត្រី។

កាលពីថ្ងៃអាទិត្យ ទី២៥ ខែធ្នូ ឆ្នាំ២០២២ លោក Koichi Hagiuda ប្រធានគោលនយោបាយ គណបក្សកាន់អំណាច គឺគណបក្សប្រជាធិបតេយ្យសេរី បានថ្លែងថា ការរំលាយសភា គឺជារឿងចាំបាច់ និងរៀបចំការបោះឆ្នោតថ្មី ខណៈពេលដែលរាជរដ្ឋាភិបាល គ្រោងដំឡើងអត្រាពន្ធ ដើម្បីចំណាយលើវិស័យការពារជាតិ ដែលគ្រោងនឹង​ចំណាយថវិកាជាតិច្រើន ដើម្បីមើលឃើញថា តើវិធានការនេះ ត្រូវបាន គាំទ្រដោយប្រជាជនដែរ ឬយ៉ាងណា។

លោក Matsuno បានថ្លែងក្នុងសន្និសីទសារព័ត៌មានមួយថា យើងប្រុងប្រយ័ត្នចំពោះសេចក្តីថ្លែងការណ៍ (​ការរំលាយសភា) ប៉ុន្តែ ការរំលាយសភាជាន់ទាប គឺស្ថិតក្នុង​សមត្ថកិច្ចរបស់នាយករដ្ឋមន្ត្រី។ នាយកខុទ្ធកាល័យនាយករដ្ឋមន្ត្រីរូបនេះ បានបន្ថែមទៀតថា លោកមិនគាំទ្រការដំឡើងពន្ធភ្លាមៗឡើយ​ ប៉ុន្តែ ប្រសិនបើការសម្រេចចិត្តនេះ ត្រូវបានធ្វើឡើង នោះវាចាំបាច់ណាស់ត្រូវចូលរួមគាំទ្រពីប្រជាជន​ ដូចអ្វីដែលរដ្ឋបាលមុនៗ ធ្លាប់បានធ្វើកន្លងមក។

លោក Matsuno បានបន្ថែមទៀតថា «ក្នុងករណីណាមួយ ដែលមានការសម្រេចចិត្តពង្រឹង ហិរញ្ញវត្ថុលើវិស័យការពារជាតិនោះ ថវិកាជាតិ និងធនធានហិរញ្ញវត្ថុ នឹងត្រូវ​ការនៅចុងឆ្នាំសារពើពន្ធ (ថ្ងៃទី៣១ ខែមីនា ឆ្នាំ២០២២) ហើយប្រជាជន នឹងមើលឃើញយ៉ាងច្បាស់អំពីការដឹកនាំរបស់រាជរដ្ឋាភិបាល»។ នៅដើមខែធ្នូ ឆ្នាំ២០២២ នេះ ទីភ្នាក់ងារសារព័ត៌មាន Sputnik News បានរាយការណ៍ថា លោក Fumio Kishida នាយករដ្ឋមន្ត្រីជប៉ុន បានថ្លែងប្រាប់គណបក្សប្រជាធិបតេយ្យសេរីថា ការចំណាយលើវិស័យ​ការជាតិ នូវថវិកាប្រមាណជា ៨.៩ លានលានយ៉េន ស្មើនឹង (៦៥ ពាន់លានដុល្លារសហរដ្ឋអាមេរិក) នៅក្នុងឆ្នាំសារពើពន្ធ ២០២៧ ស្របតាមផែនការជាតិ ក្នុងការសម្រេច​ស្តង់ដាររបស់អង្គការសន្ធិសញ្ញាអាត្លង់ទិចខាងជើង (NATO) ២%​ នៃការចំណាយលើប្រាក់ចំណូលក្នុងស្រុកសរុប (GDP) ក្នុងរយៈពេល ៥​ ឆ្នាំ ខាងមុខ៕

http://ព័ត៌មានសភាអន្តរជាតិ ២៧-១២-២២-កែវ ធាវី ប្រែសម្រួលពី៖ https://www.urdupoint.com/en/world/dissolution-of-japans-parliament-within-prim-1615650.html