សម័យប្រជុំរបស់សភាក្រិក

​កាលពីថ្ងៃសៅរ៍ ទី១៧ ខែធ្នូ ឆ្នាំ២០២២ សភានៃសាធារណរដ្ឋក្រិកបានផ្តល់សច្ចាប័នលើថវិការដ្ឋឆ្នាំ ២០២៣ ដែលបានព្យាករណ៍ពីកំណើនផលិតផលក្នុងស្រុកសរុប (GDP) ១.៨% និងអត្រាអតិផរណា ៥% សម្រាប់ឆ្នាំនេះ។

ក្រសួងហិរញ្ញវត្ថុបានឱ្យដឹងនៅក្នុងសេចក្តីប្រកាសព័ត៌មានមួយថា ការប៉ាន់ប្រមាណដំបូងចំនួន ២.១% និង ៣% ដែលបានផ្តល់ឱ្យក្នុងខែតុលា ត្រូវបានកែសម្រួលចំពេលមាន​ការ​បន្តភាពមិនប្រាកដប្រជាជាសកលដោយសារវិបត្តិថាមពល។ ឆ្នាំ២០២២ នឹងបិទជាមួយនឹងកំណើន ៥.៦% នៃផលិតផលក្នុងស្រុកសរុប និង ៩.៧% នៃអតិផរណា។ ​យោង​តាម​ថវិកា ​ដែល​ត្រូវ​បាន​អនុម័ត​ដោយ​សំឡេង​គាំទ្រ​ពី​សមាជិក​សភា​ចំនួន ១៥៦រូប ​ក្នុង​សម័យប្រជុំសភា​ពេញអង្គ​ដែល​មាន​សមាជិក ៣០០រូប។ លោក Kyriakos Mitsotakis នាយករដ្ឋមន្ត្រីក្រិកបានមានប្រសាសន៍នៅក្នុងសុន្ទរកថាមួយយ៉ាងខ្លីមុនពេលបោះឆ្នោតថា “កំណើនសេដ្ឋកិច្ច និងសុខុមាលភាពសង្គម កំណែទម្រង់យ៉ាងម៉ឺងម៉ាត់ និងការប្រុងប្រយ័ត្ន។ ទាំងនេះគឺជាគោលការណ៍នៃការអនុវត្តថវិការបស់យើង”។ ទូរទស្សន៍សាធារណៈក្រិក ERT បានរាយការណ៍ដោយដកស្រង់សំដីរបស់​លោកនាយករដ្ឋ​មន្ត្រីថា រដ្ឋបានគាំទ្រសង្គមដើម្បីទប់ទល់នឹងការកើនឡើងនៃថ្លៃរស់នៅ របស់ប្រជាពលរដ្ឋជាង ១៥.១ពាន់លានអឺរ៉ូ (១៦ពាន់លានដុល្លារអាមេរិក) រហូតមកដល់បច្ចុប្បន្ន ខណៈ ពេលដែលវិធានការគាំទ្របន្ថែមទៀតនឹងត្រូវបានណែនាំនៅឆ្នាំ២០២៣ ។ លោក Mitsotakis ក៏បានមាន ប្រសាសន៍ផងដែរថានៅឆ្នាំ២០២៣ នឹងចុះបញ្ជីអតិរេក​បឋម ០.៧% នៃផលិតផលក្នុងស្រុកសរុប។ នៅឆ្នាំ២០២២ ប្រទេសនេះបានរាយការណ៍ពីឱនភាពចំនួន ១.៦% នៃផលិតផលក្នុងស្រុកសរុប។

លោក Mitsotakis បានមានប្រសាសន៍ថា “ឆ្នាំ២០២២នឹងក្លាយជាឆ្នាំចុងក្រោយដែលមានឱនភាព បឋម។ ចាប់ពីឆ្នាំ២០២៣ សេដ្ឋកិច្ចនឹងត្រលប់ទៅរកអតិរេកបឋម” ៕

http://ព័ត៌មានសភាអន្តរជាតិ ១៩-១២-២២-ផាត់ ត្រដែត ប្រែសម្រួលពី៖ https://english.news.cn/20221218/46938ded051d4b79a52944b2e087e242/c.html