លោក Shuhei Kishimoto អតីតសមាជិកសភាជាន់ទាបជប៉ុនជាប់ឆ្នោតជាអភិបាលក្រុង Wakayama

​ទីក្រុង Wakayama៖ កាលពីថ្ងៃអាទិត្យ ទី២៧ ខែវិច្ឆិកា ឆ្នាំ២០២២ លោក Shuhei Kishimoto អតីតសមាជិកសភាជាន់ទាបជប៉ុន បានជាប់ឆ្នោតជាអភិបាលក្រុង Wakayama ភាគខាងលិចប្រទេសជប៉ុនជាលើកដំបូង។  បេក្ខជនឯករាជ្យវ័យ ៦៦ ឆ្នាំ រូបនេះ បានឈ្នះគូប្រជែងរបស់ខ្លួន ២ រូប ផ្សេងទៀត ដោយទទួលបានការគាំទ្រ​ពី​កម្លាំងគណបក្សនយោបាយធំទាំងពីរ គឺគណបក្សកាន់អំណាច និងគណបក្សប្រឆាំងនៅក្នុងនយោបាយជាតិ។ ជ័យជំនះរបស់លោក Kishimoto  នេះ ត្រូវបានគាំទ្រដោយ​គណបក្ស​​​​ប្រជាធិបតេយ្យសេរី, គណបក្សប្រជាធិបតេយ្យរដ្ឋធម្មនុញ្ញជប៉ុន, និងគណបក្សប្រជាធិបតេយ្យរបស់ប្រជាជន និងគណបក្សប្រជាធិបតេយ្យសង្គមនៅមូលដ្ឋាន។ លោក Kishimoto បានទាញយកប្រយោជន៍ ពីអំណាចដែលបានរៀបចំឡើងនេះដើម្បីប្រមូលសន្លឹកឆ្នោត។

​ក្នុងអំឡុងពេលយុទ្ធនាការបោះឆ្នោត លោក Kishimoto ដែលជាសមាជិកសភាជាន់ទាប ១ រូប មកពីគណបក្សប្រជាធិបតេយ្យរបស់ប្រជាជន បានសន្យាថា នឹងផ្តោតលើការ​ជំរុញឧស្សាហកម្មកសិកម្ម និងទេសចរណ៍ និងវិធានការជួយចិញ្ចិមបីបាច់ថែទាំកុមារ។ គូប្រជែង ២ រូប របស់លោក Kishimoto គឺលោកស្រី Nana Honma អាយុ ៥៣ ឆ្នាំ ជាបេក្ខជនឯករាជ្យ ដែលធ្លាប់បម្រើការងារជាមន្ត្រីនៅក្រសួងការបរទេស និងលោកស្រី Michiko Matsuzaka អាយុ ៦៦ ឆ្នាំ ជាបេក្ខជនថ្មី ត្រូវបានយល់ស្របជា​ផ្លូវការ​ដោយគណបក្សកុម្មុយនិស្តជប៉ុន៕

http://ព័ត៌មានសភាអន្តរជាតិ ២៩-១១-២២-កែវ ធាវី ប្រែសម្រួលពី៖ https://www.nippon.com/en/news/yjj2022112700329/