លោក Valery Mitskevich អនុប្រធានសភាបេឡារុស ក្នុងមហាសន្និបាតអន្តរសភាអាស៊ានលើកទី៤៣ ក្នុងរាជធានីភ្នំពេញ

​កាលពីថ្ងៃចន្ទ ទី២១ ខែវិច្ឆិកា ឆ្នាំ២០២២ លោក Valery Mitskevich អនុប្រធានសភាតំណាងនៃសាធារណរដ្ឋបេឡារុសបានចូលរួមក្នុងពិធីបើកមហាសន្និបាតអន្តរសភា​អាស៊ានលើកទី៤៣ (AIPA) ដែលបានធ្វើឡើងនៅក្នុងរាជធានីភ្នំពេញ នៃព្រះរាជាណាចក្រកម្ពុជា ចាប់ពីថ្ងៃទី២០ ដល់ថ្ងៃទី២៥ ខែវិច្ឆិកា ឆ្នាំ២០២២។ នេះបើតាម​សារព័ត៌មាន​បេឡារុស BelTA ទទួលបានពីអង្គភាពសេវាព័ត៌មាននៃ  សភាបេឡារុស។

​សភាបេឡារុសបានចូលរួមក្នុងកិច្ចប្រជុំរបស់មហាសន្និបាត AIPA ជាទៀងទាត់ចាប់តាំងពីឆ្នាំ២០១១មក ក្នុងនាមជាអ្នកសង្កេតការណ៍។ មហាសន្និបាតឆ្នាំ២០២២នេះ ផ្តោតលើការវិនិយោគក្នុងសន្តិភាព​ ការអភិវឌ្ឍប្រកបដោយចីរភាព និងការស្តារឡើងវិញ ក្រោយការរាតត្បាតជាសកលនៃជំងឺកូវីដ-១៩។ លោក Mitskevich រំពឹងថានឹង​ធ្វើរបាយការណ៍មួយនៅឯសម័យប្រជុំពេញអង្គរបស់សន្និបាត AIPA។    កម្មវិធីនៃដំណើរទស្សនកិច្ចរបស់គណៈប្រតិភូសភាបេឡារុសក៏រួមមានផងដែរនូវ កិច្ចប្រជុំទ្វេភាគី​មួយចំនួនជាមួយប្រធានគណៈប្រតិភូសភានៃបណ្តាប្រទេសក្នុងសមាគមអាស៊ាន ដើម្បីពិភាក្សាស្វែងរកមធ្យោ បាយពង្រឹងកិច្ចសហប្រតិបត្តិការ ជាមួយបណ្តាប្រទេសអាស៊ី​អាគ្នេយ៍ ក្នុងវិស័យនានា។

​នៅក្រៅឆាកនៃមហាសន្និបាតខាងលើ លោក Mitskevich បានមានជំនួបពិធីការជាមួយសម្តេច ហេង សំរិន ប្រធានរដ្ឋសភាកម្ពុជា។ ជំនួបមួយនេះ គឺជាការបន្តកិច្ចសន្ទនាអន្តរ​សភាដែលបានចាប់ផ្តើមឡើងកាលពីខែមិថុនា ឆ្នាំ២០១២ នៃដំណើរទស្សនកិច្ចរបស់ប្រធានរដ្ឋសភាកម្ពុជាទៅកាន់បេឡារុស និងដំណើរទស្សនកិច្ចតបវិញ របស់គណៈប្រតិភូ​សភា​បេឡារុសដឹកនាំដោយលោកប្រធានសភា Vladimir Andreichenko មកកាន់ប្រទេសកម្ពុជាកាលពីខែកុម្ភៈ ឆ្នាំ២០១៣ ដែលក្នុងអំឡុងពេលនោះ កិច្ចព្រមព្រៀងសហ​ប្រតិបត្តិការមួយត្រូវបានចុះហត្ថលេខារវាងសភាតំណាងនៃសាធារណរដ្ឋបេឡារុស និងរដ្ឋសភានៃព្រះរាជាណាចក្រកម្ពុជា៕

http://ព័ត៌មានសភាអន្តរជាតិ ២២-១១-២២- ឈាវ សុផាត ប្រែសម្រួលពី៖ https://eng.belta.by/politics/view/belarus-attends-aipa-general-assembly-in-cambodia-154752-