លោក Vuong Dinh Hue អញ្ជើញចូលរួមកិច្ចប្រជុំ AIPA លើកទី៤៣

​កាលពីល្ងាចថ្ងៃអាទិត្យ ទី២០ ខែវិច្ឆិកា ឆ្នាំ២០២២ លោក Vuong Dinh Hue ប្រធានរដ្ឋសភានៃសាធារណរដ្ឋសង្គមនិយមវៀតណាម បានអញ្ជើញចូលរួមកិច្ចប្រជុំ​គណៈ​កម្មា​ធិការប្រតិបត្តិនៃមហាសន្និ បាតអន្តរសភាអាស៊ាន (AIPA) ក្នុងក្របខ័ណ្ឌនៃមហាសន្និបាត AIPA លើកទី៤៣ នៅរាជធានីភ្នំពេញ។

នៅក្នុងកិច្ចប្រជុំនេះ គណៈកម្មាធិការប្រតិបត្តិបានពិភាក្សា និងអនុម័តរបៀបវារៈការងាររបស់ AIPA-៤៣, ប្រតិភូចូលរួមកិច្ចប្រជុំសមាជិកសភាជាស្ត្រីនៃ AIPA (WAIPA) និងសមាជិកសភាវ័យក្មេងនៃ AIPA, សេចក្តីថ្លែងការណ៍រួម និងកាលបរិច្ឆេទ ព្រមទាំងទីកន្លែងសម្រាប់មហាសន្និបាត AIPA លើកទី៤៤។ AIPA-៤៣ នឹង​បើក​កិច្ចប្រជុំ​ជា​ផ្លូវ​ការ​នៅរាជធានី​ភ្នំពេញ​នៅ​ថ្ងៃចន្ទ ​ទី២១ ខែ​វិច្ឆិកា ឆ្នាំ២០២២ ក្រោម​ប្រធាន​បទ “បោះជំហានជាមួយគ្នា ដើម្បីចីរភាព បរិយាបន្ន និងភាពធន់របស់អាស៊ាន”។ មហាសន្និ បាត AIPA លើកទី៤៣ នឹងផ្តោតការពិភាក្សារបស់ខ្លួនលើសន្តិភាព សន្តិសុខ ការចូលរួម និងភាពជាកណ្តាល របស់អាស៊ាន ព្រមទាំងផ្លាស់ប្តូរទស្សនៈអំពីរបៀបពង្រឹងការ​សម្រប​សម្រួល​លើ​សន្តិសុខដែនសមុទ្រ លើក កម្ពស់ស្ថិរភាពក្នុងតំបន់នៅអាស៊ីអាគ្នេយ៍ និងការជំរុញកិច្ចសហប្រតិបត្តិការសេដ្ឋកិច្ចសម្រាប់កំណើនប្រកបដោយ​ការរួម​បញ្ចូល និងនិរន្តរភាព តាមរយៈវិធីសាស្រ្តរួមបញ្ចូលគ្នាចំពោះលក្ខណៈ វិនិច្ឆ័យបរិស្ថាន សង្គម និងអភិបាលកិច្ច (ESG)។

គណៈប្រតិភូចូលរួមក៏ពិភាក្សាអំពីសមភាពយេនឌ័រ និងការពង្រឹងសិទ្ធិអំណាចរបស់ស្ត្រីសម្រាប់ការស្តារឡើងវិញប្រកបដោយនិរន្តរភាព រួមបញ្ចូល និងធន់នឹងជំងឺរាតត្បាត​កូវីដ-១៩, ការពង្រឹងតួនាទីរបស់តំណាងរាស្រ្តជាស្ត្រីក្នុងការជំរុញរបៀបវារៈស្តីពីស្ត្រី សន្តិភាព និងសន្តិសុខ ព្រមទាំងការលើកកម្ពស់ ការចូលរួមរបស់យុវជនសម្រាប់​សហគមន៍​​​អាស៊ានដែលមានការរីកចម្រើន និងនិរន្តរភាព។ ប្រធានរដ្ឋសភា វៀតណាមគ្រោងនឹងចូលរួមសកម្មភាពសំខាន់ៗក្នុងក្របខ័ណ្ឌ AIPA-៤៣ ៕

http://ព័ត៌មានសភាអន្តរជាតិ ២១-១១-២២-ផាត់ ត្រដែត ប្រែសម្រួលពី៖ https://en.vietnamplus.vn/president-meets-thai-na-leader/244012.vnp