សភាជាន់ទាបជប៉ុនពិនិត្យ និងអនុម័តលើសេចក្តីព្រាងវិសោធនកម្មក្រមរដ្ឋប្បវេណី

​រដ្ឋធានីតូក្យូ៖ កាលពីថ្ងៃព្រហស្បតិ៍ ទី១៧ ខែវិច្ឆិកា ឆ្នាំ២០២២ សភាជាន់ទាបជប៉ុន បានពិនិត្យ និងអនុម័តលើសេចក្តីព្រាងវិសោធនកម្មក្រមរដ្ឋប្បវេណី ដែលរួមមាន ការកែ​​​​​​សម្រួលបញ្ញត្តិមួយចំនួនស្តីពី ការកំណត់ភាពស្របច្បាប់ និងសិទ្ធិអប់រំកុមារ។ សេចក្តីព្រាងវិសោធនកម្មច្បាប់នេះ ត្រូវបានបោះឆ្នោតអនុម័តយល់ព្រម​ដោយសំឡេង​ភាគច្រើននៅក្នុងសម័យប្រជុំពេញអង្គនៃសភាជាន់ទាប។ សេចក្តីព្រាងច្បាប់នេះ ត្រូវបានគេរំពឹងថា នឹងអនុម័តយល់ព្រមក្នុងសម័យប្រជុំសភាបច្ចុប្បន្ន បន្ទាប់ពីកា​រ​ពិនិត្យ​ពិភាក្សាក្នុងសភាជាន់ខ្ពស់។

​ដោយកត់សម្គាល់ឃើញនូវភាពមិនត្រឹមត្រូវក្នុងការប្រតិបត្តិ សភាជាន់ទាបបានបោះឆ្នោតអនុម័តយល់ព្រមលើសេចក្តីព្រាងច្បាប់ខាងលើ ដែលបានព្យួរកាលពីលើកមុន ដែល​គ្រោងពិនិត្យ និង អនុម័តកាលពីថ្ងៃទី១០ ខែវិច្ឆិកា ឆ្នាំ២០២២ នោះ ដោយសារលោក Yasuhiro Hanashi រដ្ឋមន្ត្រីក្រសួងយុត្តិធម៌លាលែងពីតំណែង ដែលទទួលខុស​ត្រូវ​លើផ្នែកនីតិកម្ម។ យោងតាមជំពូកនៃក្រមព្រហ្មទណ្ឌបច្ចុប្បន្ន ដែលពាក់ព័ន្ធនឹងការកំណត់ភាពស្របច្បាប់, កូនដែលកើតក្នុងរយៈពេល ៣០០ ថ្ងៃ បន្ទាប់ពីការលែងលះប្តី​ប្រពន្ធ ត្រូវបានគេចាត់ទុកថា ជាកូនរបស់អតីតស្វាមី។ សម្រាប់កូនដែលកើតក្រោយ ២០០ ថ្ងៃ គិតចាប់ពីថ្ងៃរៀបអាពាហ៍ពិពាហ៍របស់ម្តាយ ត្រូវបានគេចាត់ទុកថា ជាកូន​របស់​​​​ស្វាមីថ្មី។

​វិធានការច្បាប់នេះ បាននាំឱ្យមានបញ្ហាលំបាកដល់កូនៗ ដែលមិនបានចុះឈ្មោះក្នុងប័ណ្ណគ្រួសារ ដោយសារម្តាយរបស់កូនៗទាំងនោះ មិនបានដាក់ពាក្យស្នើសុំចុះឈ្មោះក្នុង​បញ្ជីជាតិ​​​របស់​​​កូនខ្លួន ដោយសារបារម្ភថា អតីតស្វាមីមុនៗរបស់ខ្លួន នឹងចាត់ទុកជាឪពុករបស់កូនទាំងនោះ ដែលម្តាយទាំងទាំងអស់នោះ ធ្លាប់បានរស់នៅជាមួយ​បុរស​ផ្សេងៗ​៕

http://ព័ត៌មានសភាអន្តរជាតិ ១៨-១១-២២-កែវ ធាវី ប្រែសម្រួលពី៖ https://www.nippon.com/en/news/yjj2022111700555/