លោកស្រី Licia Ronzulli សមាជិកសភានៃសាធារណរដ្ឋអ៊ីតាលី​ ធ្លាប់បំបៅដោះទារកក្នុងសភាអឺរ៉ុប

​រដ្ឋធានីរ៉ូម៖ សមាជិកាសភានៃសាធារណរដ្ឋអ៊ីតាលីនឹងត្រូវបានអនុញ្ញាតឱ្យបំបៅដោះទារករបស់ខ្លួននៅក្នុងសាលប្រជុំសភា ក្នុងអំឡុងពេលនៃកិច្ចពិភាក្សាដេញដោល។ នេះបើតាមគណៈកម្មាធិការទទួលខុសត្រូវគ្រប់គ្រងសាលប្រជុំសភាបានប្រកាសកាលពីថ្ងៃអង្គារ ទី១៥ ខែវិច្ឆិកា ឆ្នាំ២០២២។ ការបំបៅដោះទារករបស់សមាជិកាសភានឹងត្រូវ​បានអនុញ្ញាតឱ្យអង្គុយនៅក្នុងជួរខាងលើនៃសាលប្រជុំសភា ឬនៅក្នុងសាលបម្រុងទុកសម្រាប់បំបៅដោះ។ ប៉ុន្តែយ៉ាងណាក៏ដោយ ការបំបៅដោះទារកនៅក្នុងសាលប្រជុំសភា​នឹងត្រូវបានអនុញ្ញាតឱ្យត្រឹមតែទារកនោះ គ្រប់អាយុ ១ខួបតែប៉ុណ្ណោះ។

​មកទល់ពេលនេះ ឪពុកម្តាយដែលបំបៅដោះទារករបស់ខ្លួន ត្រូវនៅបន្ទប់ដាច់ដោយឡែក ដែលត្រូវបានបម្រុងទុកសម្រាប់ពួកគេ។ លោកស្រី Gilda Sportiello សមាជិកា​សភា​​មកពី​គណបក្សចលនាផ្កាយ៥(MS5) ដែលជាអ្នកផ្តួចផ្តើមគំនិតឱ្យមានកំណែទម្រង់សភាបានថ្លែងថា ការប្រតិបត្តិដ៏ល្អមួយនេះដែលនឹងធានាបាននូវក្តីពេញចិត្តពេញថ្លើម​ទាំងស្រុងនៃសិទ្ធិដែលមិនអាចដកហូតបាន គឺជាសញ្ញាមួយដ៏ខ្លាំងក្លា​ចេញពីតំណាងភាគច្រើនបំផុតនៅក្នុងសភាប្រជាធិបតីអ៊ីតាលី។ លោកស្រី Sportiello បានថ្លែងបន្ថែមថា “ស្រ្តី​គ្រប់រូបទាំងអស់ គួរតែអាចបំបៅដោះទារកនៅកន្លែងណាក៏បាន តាមដែលគាត់ចង់”។

​គណបក្សចលនាផ្កាយ៥ ដែលជាគណបក្សប្រជានិយមមួយដែលលេចធ្លោជាងគេនៅក្នុងការបោះឆ្នោតជ្រើសតាំងសមាជិកសភាក្នុងឆ្នាំ២០១៨នោះ មានអ្នកម្តាយវ័យក្មេង​ជា​ច្រើនរូបបានជាប់ឆ្នោតជាសមាជិកាសភា និងបានធ្វើយុទ្ធនាការដើម្បីឱ្យពួកគេបានរួមបញ្ចូលការងារ និងជីវិតគ្រួសាររប្រសើរជាងមុន។សមាជិកាសភាស្តាំនិយមជ្រុល លោកស្រី​ Giorgia Meloni ដែលបានក្លាយជានាយករដ្ឋមន្រ្តីកាលពីចុង ខែតុលា ឆ្នាំ២០២២កន្លងមកនេះ ខ្លួនលោកស្រីក៏ធ្លាប់បានស្នើបែបនេះ នៅក្នុងឆ្នាំ២០១៩ ដែលជា​ផ្នែក​មួយនៃការប្រយុទ្ធរបស់លោកស្រីដើម្បីផ្តល់ភាពងាយស្រួលជាងមុន សម្រាប់អ្នកម្តាយវ័យក្មេងក្នុងការបំពេញការងារ និងដើម្បីជំរុញអត្រាកំណើត  នៅក្នុងប្រទេសមួយ​ដែលមានការធ្លាក់ចុះនូវអត្រាកំណើត។

លោកស្រី Licia Ronzulli មេដឹកនាំក្រុមគណបក្សស្តាំនិយម គឺគណបក្ស Forza Italia នៅក្នុងព្រឹទ្ធសភាអ៊ីតាលី ក៏បានស្វាគមន៍កំណែទម្រង់មួយនេះផងដែរ។ ក្នុងនាមជា​សមាជិកសភាអឺរ៉ុប(MEP)  វ័យក្មេង លោកស្រីបានបំបៅដោះទារកនៅក្នុងសភាអឺរ៉ុប នាទីក្រុង Strasbourg នៃប្រទេសបារាំង​ដែលនៅទីនោះ ការបំបៅដោះទារកត្រូវបាន​អនុញ្ញាត។ រូបថតជាច្រើនសន្លឹករបស់លោកស្រី និងទារកបានស្ថិតនៅទំព័រមុខនៃសារព័ត៌មាននានានៅក្នុងប្រទេសអ៊ីតាលី៕

http://ព័ត៌មានសភាអន្តរជាតិ ១៧-១១-២២- ឈាវ សុផាត ប្រែសម្រួលពី៖ https://menafn.com/1105190000/Italian-Women-Mps-Win-Right-To-Breastfeed-In-Chamber