សម័យប្រជុំរបស់សភាម៉ុងហ្គោលី

​សភានៃប្រទេសម៉ុងហ្គោលី (the State Great Khural) បានអនុម័តថវិកាជាតិតសម្រាប់ឆ្នាំ២០២៣ ជាមួយនឹងឱនភាពចំនួន ១,៤ពាន់ពាន់លានទុគ្រីម៉ុងហ្គោលី (៤១១,៦​លានដុល្លារអាមេរិក)។

នៅក្នុងថវិកាជាតិ ប្រាក់ចំណូលត្រូវបានព្យាករណ៍ថា មានចំនួនប្រហែល ១៩ពាន់ពាន់លានទុគ្រីម៉ុងហ្គោលី (៥,៥ពាន់លានដុល្លារ) ឬ ៣៤,៩% នៃផលិតផលក្នុងស្រុកសរុប (GDP) ហើយការចំណាយ ត្រូវបានគេប៉ាន់ស្មានថា មានប្រហែល ២០,៤ពាន់ពាន់លានទុគ្រីម៉ុងហ្គោលី (៥,៩ពាន់លានដុល្លារ) ឬ ៣៧,៦% នៃផលិតផលក្នុងស្រុកសរុប។ នេះ​ជា​ថវិកា​រដ្ឋ​ដំបូង​គេ ​ចាប់​តាំង​ពីច្បាប់ស្តីពីតបកម្មសេដ្ឋកិច្ច​របស់​ប្រទេសម៉ុងហ្គោលី​ត្រូវ​បាន​អនុម័ត​កាលពី​ខែ​មេសា។ លោក Bold Javkhlan រដ្ឋមន្ត្រីក្រសួងហិរញ្ញវត្ថុ បានមានប្រសាសន៍ថា នៅក្នុងក្របខ័ណ្ឌនៃច្បាប់ស្តីពីតបកម្មសេដ្ឋកិច្ច វិធានការនានានឹងត្រូវធ្វើឡើងដើម្បី រក្សាឱនភាពថវិកានៅកម្រិតគោលដៅ ស្ថិរភាពសេដ្ឋកិច្ច និងអនុវត្ត​វិន័យថវិកានៅគ្រប់កម្រិតនៅឆ្នាំក្រោយ។ រដ្ឋាភិបាលនៃប្រទេសម៉ុងហ្គោលីរំពឹងថា សេដ្ឋកិច្ចនឹងកើនឡើងប្រហែល ៥% ហើយអត្រាអតិផរណានឹង ត្រូវកាត់បន្ថយមកត្រឹម​កម្រិតមួយខ្ទង់។

​យោងតាម​ធនាគារ​កណ្តាលបានឱ្យដឹងថា អត្រាអតិផរណាប្រចាំឆ្នាំរបស់ប្រទេសក្នុងតំបន់អាស៊ីបាន ឈានដល់ ១៣.៨% នៅក្នុងខែកញ្ញា ខណៈដែលអត្រានេះបានឡើងដល់ ១៤% នៅក្នុងរដ្ឋធានីអ៊ូឡង់បាទ័រ ដែលជាទីលំដ្ឋានរបស់ប្រជាជនជាងពាក់កណ្តាលនៃចំនួនប្រជាជនសរុបរបស់ប្រទេសម៉ុងហ្គោលី ដែលមានចំនួនចំនួន ៣,៤លាននាក់៕

http://ព័ត៌មានសភាអន្តរជាតិ ១៤-១១-២២-ផាត់ ត្រដែត ប្រែសម្រួលពី៖ https://english.news.cn/20221111/61cc87859f3340758038bfcde1b3b7e8/c.html