លោក Vuong Dinh Hue (ស្តាំ) ក្នុងពិធីទទួលស្វាគមន៍លោក Acosta Álvarez

​រដ្ឋធានីហាណូយ កាលពីថ្ងៃអង្គារ ទី០៨ ខែវិច្ឆិកា ឆ្នាំ២០២២ លោក Vuong Dinh Hue ប្រធានរដ្ឋ សភានៃសាធារណរដ្ឋសង្គមនិយមវៀតណាម បានអញ្ជើញទទួលជួប​សន្ទនា​​​ការងារជាមួយលោក Homero Acosta Álvarez អគ្គលេខារដ្ឋសភានៃអំណាចប្រជាជន និងក្រុមប្រឹក្សារដ្ឋនៃសាធារណរដ្ឋគុយបា ដែលកំពុងបំពេញទស្សនកិច្ច​ការងារ​នៅក្នុងប្រទេសវៀតណាម។

លោក Hue បានវាយតម្លៃខ្ពស់ចំពោះលទ្ធផលនៃកិច្ចចរចារវាងលោក Álvarez និងលោក Bui Van Cuong អគ្គលេខាធិការរដ្ឋសភាវៀតណាម ដែលបានធ្វើឡើងនៅក្នុង​ថ្ងៃដដែល ដោយបានផ្តោតការយកចិត្តទុកដាក់លើការតម្រង់ទិសដើម្បីជំរុញកិច្ចសហប្រតិបត្តិការរវាងការិយាល័យរដ្ឋសភាទាំងពីរ។ លោក Hue បានមានប្រសាសន៍ថា ការ​ពង្រឹង​កិច្ចសហប្រតិបត្តិការ និងការផ្លាស់ប្តូរព័ត៌មាន ព្រមទាំងបទពិសោធន៍ ក្នុងរដ្ឋសភា រវាងការិយាល័យរដ្ឋសភាទាំងពីរនឹងរួមចំណែកលើកកម្ពស់គុណភាពប្រតិបត្តិការ និងប្រសិទ្ធ ភាពនៃស្ថាប័ននីតិប្បញ្ញត្តិនៃប្រទេសនីមួយៗ ដោយហេតុនេះការជំរុញកិច្ចសហប្រតិបត្តិការទ្វេភាគី ក៏ដូច ជាទំនាក់ទំនងប្រពៃណីពិសេសរវាងប្រទេសវៀតណាម និងគុយបា។ លោក Hue ក៏បានផ្តល់ការអាណិត អាសូរដល់ប្រទេសគុយបា ចំពោះការលំបាកដែលប្រទេសនេះកំពុងប្រឈមមុខនឹងផលប៉ះពាល់នៃការហ៊ុម ព័ទ្ធ ការរាត​ត្បាត​នៃជំងឺកូវីដ-១៩ ក៏ដូចជាឧប្បត្តិហេតុ និងគ្រោះធម្មជាតិ ដែលថ្មីៗនេះភ្លើងឆេះឃ្លាំងស្តុក ប្រេងឥន្ធនៈនៅសួនឧស្សាហកម្ម Matanzas កាលពីដើមខែសីហា និងការ​ខូចខាត​ធ្ងន់ធ្ងរ​ដែលបណ្តាល មកពីព្យុះ Ian។ លោក Hue បានយល់ស្របចំពោះសាមគ្គីភាព និងការគាំទ្ររបស់វៀតណាមចំពោះគុយបា ហើយសូមជូនពរប្រទេស Caribbean នឹង​យកឈ្នះលើបញ្ហាប្រឈមនានាក្នុងពេលឆាប់ៗ។

ឆ្លៀតក្នុងឱកាសនោះលោក Álvarez បានមានប្រសាសន៍ថា គុយបាតែងតែវាយតម្លៃខ្ពស់ចំពោះការ គាំទ្រ និងជំនួយរបស់វៀតណាមលើគ្រប់វិស័យ។ លោក Álvarez បាន​គូសបញ្ជាក់ពីសារៈសំខាន់នៃការ អប់រំយុវជនជំនាន់ក្រោយនៃប្រទេសទាំងពីរ ក្នុងការលើកកម្ពស់ទំនាក់ទំនងល្អជាប្រពៃណីរវាងប្រទេសទាំង ពីរ។ ភាគីទាំងពីរបានឯកភាពថា វៀតណាម និងគុយបាគួរតែរៀបចំសកម្មភាពជាក់ស្តែងក្នុងឆ្នាំ២០២៣ នៅពេលដែលភាគីទាំងពីរនឹងប្រារព្ធខួប៥០ឆ្នាំ នៃដំណើរទស្សនកិច្ចរបស់លោកប្រធានាធិបតី Fidel Castro ទៅកាន់តំបន់ទើបរំដោះថ្មីនៅខេត្ត Quang Tri ភាគកណ្តាល៕

http://ព័ត៌មានសភាអន្តរជាតិ ១០-១១-២២-ផាត់ ត្រដែត ប្រែសម្រួលពី៖ https://en.vietnamplus.vn/na-chairman-receives-senior-cuban-legislator-in-hanoi/243519.vnp