រូបភាពសភានៃសាធារណរដ្ឋប៊ុលហ្គារី

​កាលពីថ្ងៃព្រហស្បតិ៍ ទី០៣​ ខែវិច្ឆិកា ឆ្នាំ២០២២ សភានៃសាធារណរដ្ឋប៊ុលហ្គារីបានបោះឆ្នោតដោយសំឡេងភាគច្រើនលើសលុប ១៧៥ ទល់នឹង ៤៩សំឡេង និង​អនុបវាទ ១សំឡេង   គាំទ្រការផ្គត់ផ្គង់អាវុធទៅឱ្យប្រទេសអ៊ុយក្រែន។  ការបោះឆ្នោតនេះបានធ្វើឡើង ក្រោយពីកិច្ចពិភាក្សាដេញដោលអស់រយៈពេលជិត ​៤ម៉ោង។

​ការសម្រេចចិត្តខាងលើនេះ ទទួលបានការគាំទ្រពីគណបក្សប្រជាធិបតេយ្យប៊ុលហ្គារី ក្រុមចម្រុះគណបក្ស GERB-UDF គណបក្សយើងបន្តការផ្លាស់ប្តូរ គណបក្សចលនាដើម្បី​សិទ្ធិ និងសេរីភាព និង គណបក្ស Bulgaria Ascending ហើយគណបក្សដែលបោះឆ្នោតប្រឆាំង រួមមាន គណបក្សជនសង្គមនិយមប៊ុលហ្គារី និងគណបក្ស Vuzrazhdane។ សភាប៊ុលហ្គារីបានទុកពេល ១ខែ​ ឱ្យរដ្ឋាភិបាលធ្វើពង្រាងសេចក្តីសម្រេចស្តីពីការផ្តល់ជំនួយយោធា  និងបច្ចេកទេសយោធា ដែលប៊ុលហ្គារគួរតែផ្តល់ដល់អ៊ុយក្រែន។ សភា​ក៏បានតម្រូវផងដែរឱ្យរដ្ឋាភិបាលរៀបចំ ឱ្យបានឆាប់បំផុតនូវការចុះហត្ថលេខាលើកិច្ចព្រមព្រៀង​ សម្រាប់​ដ៏ផ្តល់សម្ភារៈបរិក្ខារយោធាចាំបាច់តាមលទ្ធភាពរបស់ប៊ុលហ្គារី ទៅ​ឱ្យ​អ៊ុយក្រែន។

​រដ្ឋាភិបាលត្រូវចរចាជាមួយសម្ព័ន្ធមិត្តអង្គការណាតូ ដើម្បីផ្តល់ដល់ប្រទេសអ៊ុយក្រែននូវសម្ភារៈ បរិក្ខារយោធា ធ្វើដូចនេះដើម្បីឱ្យប៊ុលហ្គារីអាចបង្កើនល្បឿនបញ្ចេញចោល​នូវសព្វាវុធសម័យអតីតសហភាពសូវៀតដែលហួសសម័យកាលប្រើប្រាស់ទៅហើយ។ សភាប៊ុលហ្គារីក៏បានទាមទារឱ្យរដ្ឋាភិបាលត្រូវស្នើនូវវិធានការជាកញ្ចប់​សម្រាប់​ប៊ុលហ្គារីក្នុងការចូលរួមកសាងប្រទេសអ៊ុយក្រែនឡើងវិញ​ហើយ​ប៊ុលហ្គារីត្រូវគាំទ្រសកម្មភាពរបស់តុលាការអ៊ុយក្រែនប្រឆាំងនឹងសហព័ន្ធរុស្ស៊ី នៅក្នុងតុលាការសិទ្ធិមនុស្ស របស់អឺរ៉ុប។

លោក Atanas Slavov សមាជិកសភាមកពីគណបក្សប្រជាធិបតេយ្យប៊ុលហ្គារីបានថ្លែងក្នុងសភាថា “យើងឈប្រកៀកស្មាជាមួយសម្ព័ន្ធមិត្តរបស់យើង និងពង្រឹងការការពារ​របស់យើង”។ “ពេលនេះយើងមានឱកាសក្នុងការសម្របខ្លួនតាមសម្ព័ន្ធមិត្តរបស់យើងនៅក្នុងសហភាពអឺរ៉ុប និងអង្គការណាតូ និងរួម គ្នាផ្តល់ជំនួយបច្ចេកទេស​យោធាដែល​អ៊ុយក្រែនត្រូវការ”។ ពេលនេះយើងមានឱកាសក្នុងការពង្រឹងសមត្ថភាពការពារជាតិរបស់យើងដោយមិនត្រូវរួញរា៕

http://ព័ត៌មានសភាអន្តរជាតិ ០៤-១១-២២- ឈាវ សុផាត ប្រែសម្រួលពី៖ https://sofiaglobe.com/2022/11/03/bulgarias-parliament-votes-in-favour-of-supplying-weapons-to-ukraine/