សមាជិកសភាជប៉ុនសម្តែងនូវការគោរពដល់ជនរងគ្រោះដែលបានបាត់បង់ជីវិតនៅតំបន់ Itaewon

រដ្ឋធានីសេអ៊ូល៖ កាលពីថ្ងៃពុធ ទី០២ ខែវិច្ឆិកា ឆ្នាំ២០២២ គណៈប្រតិភូសមាជិកសភាជប៉ុន ដែលមានសមាជិក ១៨ រូប រួមជាមួយក្រុមមិត្តភាពសភាជប៉ុន-កូរ៉េខាងត្បូង បានអញ្ជើញទៅចូលរួមគោរពវិញ្ញាណក្ខន្ធសពជនរងគ្រោះ ដែលបានបាត់បង់ជីវិតដោយសារហ្វូងមនុស្សរត់ជាន់គ្នានៅក្នុង តំបន់ Itaewon នៃរដ្ឋធានីសេអ៊ូល ដែលជា​ប្រទេស​​ជិតខាងគ្នា។

​លោក Fukushiro Nukaga សមាជិកសភាជាន់ទាបជប៉ុន បានដឹកនាំសមាជិកសភាជាច្រើនរូបទៅកាន់ទីកន្លែងកាន់ទុក្ខនៅទីលានកម្សាន្ត Seoul Plaza ទល់មុខសាលារដ្ឋធានី​សេអ៊ូល បន្ទាប់ពីបានអញ្ជើញមកដល់អាកាសយានដ្ឋានអន្តរជាតិ Gimpo។ គណៈប្រតិភូសភាជប៉ុននេះ ត្រូវបានអមដំណើរដោយសមាជិកសភាកូរ៉េខាងត្បូងនៃ​ក្រុមមិត្តភាព​សភាកូរ៉េខាងត្បូង-ជប៉ុន ៥ រូប រួមទាំងលោក Chung Jin-suk អនុប្រធានសភា និងជាប្រធានគណបក្សកាន់អំណាច គឺគណបក្សអំណាចប្រជាជន និងលោក Yun Ho-jung សមាជិកសភាកូរ៉េខាងត្បូង ផងដែរ។

​លោក Chung បានធ្វើជាម្ចាស់ផ្ទះទទួលអាហារពេលល្ងាចមួយពេល សម្រាប់គណៈប្រតិភូសភាជប៉ុននារសៀលថ្ងៃដដែលនោះ។ ទស្សនកិច្ចរបស់គណៈប្រតិភូសភាជប៉ុននេះ បានធ្វើឡើងចំពេលខួប​អនុស្សាវរីយ៍លើកទី​៥០ ថ្ងៃបង្កើតក្រុមមិត្តភាពសភា ក្នុងគោលបំណងលើកកម្ពស់ការផ្លាស់ប្តូរបទពិសោធន៍ និងទស្សនកិច្ច រវាងសភានៃប្រទេស​ទាំងពីរ។

​កាលពីថ្ងៃព្រហស្បតិ៍ ទី០៣ ខែវិច្ឆិកា ឆ្នាំ២០២២ ក្រុមមិត្តភាពសភានៃប្រទេសទាំងពីរ គ្រោង បើកសន្និបាតរបស់ខ្លួន ដែលមានសមាជិកសភាប្រទេសទាំងពីរចូលរួម​រួមទាំង លោក Han Duck-soo នាយករដ្ឋមន្ត្រីកូរ៉េខាងត្បូង និង លោក Koichi Aiboshi ឯកអគ្គរាជទូតជប៉ុនប្រចាំសាធារណរដ្ឋកូរ៉េ ផងដែរ។ គណៈប្រតិភូសមាជិកសភាជប៉ុននេះ នឹងធ្វើមាតុភូមិនិវត្តន៍មកកាន់មាតុប្រទេសវិញនៅថ្ងៃសុក្រ​ ទី០៤ ខែវិច្ឆិកា ឆ្នាំ២០២២ នេះ ដោយបានបញ្ចប់ទស្សនកិច្ចរបស់ខ្លួន រយៈពេល ៣ ថ្ងៃ នៅកូរ៉េខាងត្បូង៕

http://ព័ត៌មានសភាអន្តរជាតិ ០៤-១១-២២-កែវ ធាវី ប្រែសម្រួលពី៖ https://en.yna.co.kr/view/AEN20221102010651315