លោក Benjamin Netanyahu អតីតនាយករដ្ឋមន្រ្តីអ៊ីស្រាអែល និងភរិយា

​ការស្ទង់មតិក្រោយការបោះឆ្នោតជ្រើសតាំងសមាជិកសភារដ្ឋអ៊ីស្រាអែលកាលពីថ្ងៃអង្គារ ទី០២  ខែវិច្ឆិកា ឆ្នាំ២០២២ បានរកឃើញថា ក្រុមគណបក្សសម្ព័ន្ធភាពរបស់លោក Benjamin Netanyahu   អតីតនាយករដ្ឋមន្រ្តីនៃរដ្ឋអ៊ីស្រាអែលមានឱកាសល្អក្នុងការត្រឡប់កាន់អំណាចមកវិញ បន្ទាប់ពីការបោះឆ្នោតជាលើកទី៥  គិតចាប់តាំងពីឆ្នាំ​២០១៩​មក។

ការស្ទង់មតិរបស់ប៉ុស្តិទូរទស្សន៍សំខាន់ៗរបស់អ៊ីស្រាអែលចំនួន ៣ បានបង្ហាញថា មេដឹកនាំដ៏យូរអង្វែងរូបនេះ និងគណបក្សសម្ព័ន្ធភាពរបស់លោកមកពីគណបក្សស្តាំ​និយមជ្រុល និងនិកាយអូតូដក់ជ្រុលនិយម(ultra-Orthodox) ទទួលបាន ៦១ ឬ៦២ នៃ១២០អាសនៈ នៅក្នុងសភា នាំឱ្យពួកគេមានអាសនៈគ្រប់គ្រាន់ដើម្បីបង្កើត​រដ្ឋាភិបាល​​ចម្រុះកាន់អំណាចបាន។​  ថ្លែងទៅកាន់អ្នកគាំទ្ររបស់លោក  លោក Netan yahu បានឱ្យដឹងថា លទ្ធផលបឋម គឺជាការចាប់ផ្តើមដ៏ល្អមួយ និងបានអំពាវនាវ​ឱ្យអ្នក​គាំទ្ររង់ចាំលទ្ធ ផលផ្លូវការ។ ការស្ទង់មតិក្រោយការបោះឆ្នោតបានបង្ហាញថា គណបក្ស Likud របស់លោកទទួលបាន ពី៣០ ទៅ ៣១​អាសនៈ។ គណបក្ស Yesh Atid របស់​លោក Yair Lapid នាយករដ្ឋមន្រ្តីអ៊ីស្រាអែល ត្រូវគេរំពឹងថា នឹងកើនអាសនៈពី ២២ ទៅ២៤អាសនៈ ហើយគណបក្សសម្ព័ន្ធភាពរបស់លោកនឹងទទួល បានពី ៥៤ ទៅ ៥៥អាសនៈ។

​លោក Lapid បានថ្លែងថា វាដូចជាឆាប់រហ័សពេក ក្នុងការធ្វើសេចក្តីសន្និដ្ឋានអំពីលទ្ធផលផ្លូវការនៅមិនទាន់មានការសម្រេចចិត្តណាមួយនៅឡើយទេ រហូតដល់ការរាប់សន្លឹក​ចុងក្រោយត្រូវបានធ្វើឡើង។ ទាំងលោក Netanyahu និងលោក Lapid សុទ្ធតែមិនទាន់បានអះអាងពីជ័យជម្នះនៅឡើយទេ។ ការស្ទង់មតិក្រោយការបោះឆ្នោតក៏បានបង្ហាញ​ផងដែរថា សមាជិកសភាជាតិនិយមជ្រុលលោក  Itamar Ben-Gvir នៃលទ្ធិសាសនាហ្សាអ៊ឺន នឹងទទួលបានពី ១៤ ទៅ ១៥អាសនៈ ក្លាយជាគណបក្សធំជាងគេលំដាប់ទី៣ នៅក្នុងសភា។ គណបក្សសម្ព័ន្ធភាពនៃជនជាតិអារ៉ាប់ចំនួន២ Hadash-Ta’al ត្រូវគេរំពឹងថានឹងទទួល បាន ៤អាសនៈ នេះបើតាមការរកឃើញនៅក្នុងការ​ស្ទង់មតិក្រោយការ​បោះឆ្នោត។

​គួរបញ្ជាក់ផងដែរថា ការបោះឆ្នោតលើកនេះត្រូវបានធ្វើឡើង បន្ទាប់ពីការបោះឆ្នោតម្តងហើយម្តងទៀត ជាមួយនឹងលទ្ធផលមិនច្បាស់លាស់ដែលធ្វើឱ្យប្រព័ន្ធនយោបាយក្នុង​ប្រទេស​អ៊ីស្រាអែល​​ត្រូវជាប់គាំងក្នុងរយៈពេលជិត ៤ឆ្នាំមកហើយ៕

http://ព័ត៌មានសភាអន្តរជាតិ ០៣-១១-២២- ឈាវ សុផាត ប្រែសម្រួលពី៖ https://english.news.cn/20221102/b1d8c1f6b8cd4199b14bbd45596fa937/c.html