លោក Edvards Smiltens មកពីសម្ព័ន្ធភាពគណបក្សចម្រុះ United List បានក្លាយជាប្រធានសភាថ្មីនៃសាធារណរដ្ឋឡេតូនី ដោយទទួលបានសំឡេង ៨២ ទល់នឹង ១១សំឡេង។ ខណៈដែលគូ ប្រជែងរបស់លោក គឺលោក Aleksejs Roslikovs មេដឹកនាំគណបក្ស For Stability! ទទួលបានការគាំទ្រពីសមាជិកសភាទាំង ១១រូប នៃគណបក្សរបស់លោក ប៉ុន្តែសមាជិកសភាចំនួន ៨២រូប បានបោះឆ្នោតជំទាស់នឹងបេក្ខភាពរបស់លោក។
ជ័យជម្នះរបស់លោក Edvards Smiltens ត្រូវបានគេទស្សទាយដឹងជាមុន ចាប់តាំងពីសម្ព័ន្ធភាពចម្រុះគណបក្ស United List រួមជាមួយសម្ព័ន្ធភាពគណបក្ស New Unity និងក្រុមចម្រុះគណបក្ស National Alliance ដែលទំនងជានឹងក្លាយជាដៃគូមួយនៅក្នុងរដ្ឋាភិបាលចម្រុះថ្មីឡេតូនី។ នេះបើតាមសេចក្តីរាយការណ៍របស់សារព័ត៌មានចិនស៊ីន
ហួរបានឱ្យដឹង។ ជាមួយគ្នានោះ លោកស្រី Zanda Kalni na-Luka sevica នៃសម្ព័ន្ធភាពគណបក្ស New Unity និងលោក Janis Grasbergs នៃក្រុមចម្រុះគណបក្ស National Alliance ក៏ត្រូវបានជាប់ឆ្នោតជាអនុប្រធានសភាឡេតូនីផងដែរ។
គួរបញ្ជាក់ផងដែរថា លោក Krisjanis Karins នាយករដ្ឋមន្រ្តីឡេតូនី មកពីសម្ព័ន្ធភាពគណបក្ស New Unity បាននាំមុខនៅក្នុងការបោះឆ្នោតជ្រើសតាំងសមាជិកសភាឡេតូនីកាលពីថ្ងៃទី០១ ខែតុលា ឆ្នាំ២០២២កន្លងមក និងកំពុងស្វះស្វែងរកការពិភាក្សាជាមួយសម្ព័ន្ធភាពគណបក្សចម្រុះគណបក្ស United List និងក្រុមចម្រុះគណបក្ស National Alliance ដើម្បីបង្កើតរដ្ឋាភិបាលចម្រុះថ្មីមួយនៃប្រទេស ក្នុងតំបន់បាល់ទិកមួយនេះ៕
