លោកស្រីនាយករដ្ឋមន្ត្រី Giorgia Meloni ឡើងថ្លែងមតិយោបល់នៅក្នុងសភា

​កាលពីថ្ងៃអង្គារ ទី២៥ ខែតុលា ឆ្នាំ២០២២ គណៈរដ្ឋមន្ត្រីថ្មីរបស់សាធារណរដ្ឋអ៊ីតាលី ដែលដឹកនាំ ដោយលោកស្រីនាយករដ្ឋមន្ត្រី Giorgia Meloni បានឈ្នះការបោះឆ្នោត​សម្តែងការទុកចិត្តពីសភាជាន់ទាប ដោយមានសំឡេងគាំទ្រចំនួន ២៣៥សំឡេង ប្រឆាំងចំនួន១៥៤ និងអនុបវាទចំនួន៥។ ឥឡូវនេះគណៈ រដ្ឋមន្ត្រីត្រូវតែឆ្លងកាត់ការ​បោះឆ្នោតសម្តែងការទុកចិត្តជាលើកទីពីរ នៅក្នុងព្រឹទ្ធសភានៅថ្ងៃពុធ ទី២៦ ដើម្បី មានប្រសិទ្ធភាពពេញលេញ។

នៅមុនការបោះឆ្នោត លោកស្រី Meloni បានគូសបញ្ជាក់ពីចំណុចសំខាន់ៗនៃកម្មវិធីរបស់រដ្ឋាភិបាល របស់លោកស្រី ដោយប្តេជ្ញាថានឹងដឹកនាំប្រទេសឱ្យអស់​ពីសមត្ថភាព​តាមរយៈអ្វីដែលលោកស្រីបានពណ៌នា ថា ជាពេលវេលាដ៏លំបាកបំផុតក្នុងរយៈពេលជាច្រើនទសវត្សរ៍។ លោកស្រី Meloni ជាមេដឹកនាំនៃគណបក្ស Brothers of Italy ហើយ​​ក៏​ជាស្ត្រីដំបូងគេដែលធ្លាប់ធ្វើជានាយករដ្ឋមន្ត្រីនៅក្នុងប្រទេសអ៊ីតាលី។ លោក ស្រី Meloni បានឈ្នះ២៦%នៅក្នុងការបោះឆ្នោតមុនកាលកំណត់​ដែលធ្វើឡើងកាល​ពី​ថ្ងៃទី២៥ ខែកញ្ញា។ គណបក្ស Brothers of Italy បាននាំមុខសម្ព័ន្ធភាពពីរគឺ Forza Italia និង League ដែលទាំងពីរទទួល បានសំឡេងឆ្នោតជាង៨%។ ដូច្នេះហើយលោកស្រី Meloni ត្រូវបានលោកប្រធានាធិបតី Sergio Mattarella ស្នើឱ្យដឹកនាំរដ្ឋាភិបាលនៅថ្ងៃទី២២ ខែតុលា។ នៅក្នុងសុន្ទរកថាដំបូងរបស់លោកស្រីទៅកាន់សមាជិកសភា នៅមុន​ការបោះឆ្នោតសម្តែងការទុកចិត្ត លោកស្រី Meloni បានសង្កត់ធ្ងន់ថា ប្រទេសអ៊ីតាលីនឹងបន្ត ដើរក្នុងព្រំដែននៃពួកលោកខាងលិច។ លោកស្រីបានមានប្រសាសន៍ថា “ប្រទេស​អ៊ីតាលីគឺជាផ្នែកទាំងស្រុង នៃលោកខាងលិច និងនៃប្រព័ន្ធសម្ព័ន្ធភាពរបស់ខ្លួន ដែលជាសមាជិកស្ថាបនិកនៃសហភាពអឺរ៉ុប តំបន់ចាយ ប្រាក់អឺរ៉ូ និងសម្ព័ន្ធភាពអាត្លង់ទិក​ខាងជើង”។

នៅផ្នែកខាងក្នុងស្រុក លោកស្រី Meloni បានមានប្រសាសន៍ថា អាទិភាពរបស់រដ្ឋាភិបាលរួមមាន កំណែទម្រង់រដ្ឋធម្មនុញ្ញ ដើម្បីដាក់ចូលប្រព័ន្ធប្រធានាធិបតី, ប្រព័ន្ធ “flat-tax” ឱ្យកាន់តែទូលំទូលាយ ព្រម ទាំងការបង្កើនការគាំទ្រសម្រាប់គ្រួសារ និងសម្រាប់ស្ត្រីនៅក្នុងទីផ្សារការងារ៕

http://ព័ត៌មានសភាអន្តរជាតិ ២៧-១០-២២-ផាត់ ត្រដែត ប្រែសម្រួលពី៖ https://english.news.cn/20221026/39b90d22b5fe475984e14f0f2e2a2656/c.html