ជំនួបរវាងគណៈប្រតិភូសមាជិកព្រឹទ្ធសភាសហរដ្ឋអាម៉េរិក និងស្ថានទូតវៀតណាមប្រចាំសហរដ្ឋអាម៉េរិក

​លោក Patrick Leahy ប្រធានបណ្តោះអាសន្ននៃព្រឹទ្ធសភាសហរដ្ឋអាម៉េរិក(President Pro Tempore) បានប្តេជ្ញារួមចំណែកបន្ថែមទៀតចំពោះចំណង​ទាក់ទងរវាង​សាធារណរដ្ឋសង្គមនិយម​វៀតណាម និងសហរដ្ឋអាម៉េរិក នៅពេលលោកចូលនិវត្តន៍ក៏ដោយ។

សមាជិកព្រឹទ្ធសភារូបនេះ និងភរិយារបស់លោកបានចូលជួបសួរសុខទុក្ខស្ថានទូតវៀតណាម។ ថ្លែងទៅកាន់បុគ្គលិកទូតវៀតណាម លោក Leahy បានថ្លែងថា លោកនឹងបន្តធ្វើ​ការ​ថែរក្សា និងលើកកម្ពស់កិច្ចសហប្រតិបត្តិការរវាងសហរដ្ឋអាម៉េរិក និងវៀតណាម ក្នុងការដោះស្រាយផលវិបាកនៃសង្រ្គាម ដើម្បីផលប្រយោជន៍នៃប្រជាជាតិទាំងពីរ ក៏​ដូចជា ដើម្បីផលប្រយោជន៍រួម និងដើម្បីពិភពលោកមួយដែលល្អប្រសើរជាងមុន។ លោក Leahy ស្នើពង្រឹងការផ្លាស់ប្តូរទៅវិញទៅមករវាងយុវជនជំនាន់ក្រោយ នៃប្រទេស ទាំងពីរ ព្រោះវាជាមធ្យោបាយដ៏ល្អបំផុតដើម្បីជួយឱ្យប្រជាជនវៀតណាម និងអាម៉េរិកពង្រឹងការយល់គ្នា ទៅវិញទៅមក និងរួមចំណែកក្នុងការពង្រឹងមិត្តភាពទ្វេភាគី។

​លោក Leahy និងភរិយាបានសម្តែងនូវអារម្មណ៍ពិសេសរបស់ខ្លួនចំពោះវៀតណាម ដោយថ្លែង ថា ពួកគាត់តែងតែមានក្តីរីករាយក្នុងការទៅទស្សនកិច្ចទៅកាន់​ប្រជាជាតិ​អាស៊ីអគ្នេយ៍មួយនេះ និងស្រលាញ់ភាពរួសរាយរាក់ទាក់បើកចំហរបស់ប្រជាជនវៀតណាម ដែលតែងតែស្ទុះស្ទាចង់ចេះចង់ដឹង។ សម្រាប់ភាគីវៀតណាម លោក Nguyen Quoc Dung ឯកអគ្គរដ្ឋទូតវៀតណាមប្រចាំសហរដ្ឋអាម៉េរិកបានអះអាងថា រដ្ឋាភិបាល និងប្រជាជនវៀតណាមបានវាយតម្លៃខ្ពស់ចំពោះការរួមចំណែករបស់សមាជិក​ព្រឹទ្ធសភារូបនេះ   ភរិយារបស់លោក  និងលោក Tim Rieser ដែលជាជំនួយការគោលនយោបាយការបរទេសជាន់ខ្ពស់ ក្នុងដំណើរការនៃការផ្សះផ្សា និងលើកកម្ពស់​ចំណង​ទាក់ទងទ្វេភាគី។

មន្រ្តីការទូតរូបនេះបានថ្លែងបន្តថា លទ្ធផលនៃដំណោះស្រាយផលវិបាកនៃសង្រ្គាមបានជួយធ្វើឱ្យ ប្រជាជននៃប្រទេសទាំងពីរកាន់តែខិតជិតគ្នា ពង្រឹងជំនឿទុកចិត្ត និងយោគ​យល់គ្នាទៅវិញទៅមក និងបើកចំហកាលានុវត្តភាពនៃកិច្ចសហប្រតិបត្តិការនៅក្នុងវិស័យផ្សេងទៀត។ វៀតណាមតែងតែស្វាគមន៍ ដល់សមាជិកព្រឹទ្ធសភារូបនេះ និងភរិយា​របស់លោក ត្រឡប់ទៅកាន់វៀតណាមនៅពេលដែលអាចធ្វើទៅបាន និងបានស្នើឱ្យលោក  Leahy​  បន្តការគាំទ្ររបស់លោក  និងបន្តរួមចំណែកក្នុងទំនាក់ទំនងទ្វេភាគី ទន្ទឹម​នឹងការជួយកសាងបណ្តាញក្រុមមិត្តភាពនៃសមាជិកសភា៕

http://ព័ត៌មានសភាអន្តរជាតិ ២៧-១០-២២- ឈាវ សុផាត ប្រែសម្រួលពី៖ https://en.vietnamplus.vn/senator-pledges-more-contributions-to-vietnamus-relations/240745.vnp