រូបភាពឯកសារ៖ ពលរដ្ឋអ៊ីស្រាអែលកំពុងទម្លាក់សន្លឹកឆ្នោតទៅក្នុងធុងឆ្នោត

 ​អ្នកបោះឆ្នោតជាប្រជាជនរដ្ឋអ៊ីស្រាអែលនឹងទៅបោះឆ្នោតនៅថ្ងៃទី០១ ខែវិច្ឆិកា ឆ្នាំ២០២២ ដើម្បី បោះឆ្នោតជ្រើសតាំងសមាជិកសភា ដែលជាការបោះឆ្នោតជាលើកទី៥ ក្នុងរយៈពេលមិនដល់ ៤ឆ្នាំផង។ អ្នកបោះឆ្នោតប្រមាណ ៦.៧លាននាក់ដែលមានសិទ្ធិបោះឆ្នោត នៅតាមស្ថានីយបោះឆ្នោតចំនួន ១១, ៧០៧ នៅទូទាំងប្រទេស ដើម្បី​បោះឆ្នោត​រើសសមាជិកសភាចំនួន ១២០អាសនៈ។

​អនុលោមតាមច្បាប់អ៊ីស្រាអែលថ្ងៃបោះឆ្នោត គឺជាថ្ងៃឈប់សម្រាកនៅក្នុងប្រទេសអ៊ីស្រាអែលដើម្បី អនុញ្ញាតឱ្យអ្នកបោះឆ្នោតទៅបោះឆ្នោត។ រាល់គណបក្សនយោបាយ ត្រូវតែទទួលបានសំឡេងឆ្នោតយ៉ាងហោចណាស់ ៣.២៥% ដើម្បីទទួលបាន ១អាសនៈនៅក្នុងសភា។ ការបោះឆ្នោតសភា ត្រូវបានធ្វើឡើងជារៀងរាល់ ៤ឆ្នាំម្តង ប៉ុន្តែសភា​អាចរំលាយខ្លួនឯងបានមុនពេលសភាត្រូវចប់អាណត្តិ ដោយអនុម័តច្បាប់មួយ ហើយច្បាប់មួយនេះក៏បានកំណត់កាលបរិច្ឆេទនៃការបោះឆ្នោតសភានីតិកាលថ្មីផងដែរ។ ការបោះឆ្នោតសភាចុងក្រោយនៅក្នុងប្រទេសអ៊ីស្រាអែល បានធ្វើឡើងកាលពីថ្ងៃទី២៤ ខែមីនា ឆ្នាំ២០២១។

ការបោះឆ្នោតថ្ងៃទី០១ ខែវិច្ឆិកា ឆ្នាំ២០២២ នឹងក្លាយជាការបោះឆ្នោតលើកទី៥ ក្នុងរយៈពេលមិនដល់ ៤ឆ្នាំផង នៅក្នុងប្រទេសអ៊ីស្រាអែល។ ដើម្បីទទួលបានសំឡេង​ភាគច្រើន​នៅក្នុងសភា​ គណបក្ស មួយចាំបាច់ត្រូវទទួលបាន ៦១អាសនៈ នៃ ១២០អាសនៈ។ ដោយសារតែក្នុងប៉ុន្មានទសវត្សរ៍កន្លងមក នេះមិនមានគណបក្សណាមួយទទួល​បានសំឡេងភាគភាគច្រើនអប្បបរមា ៦១អាសនៈ នោះទើបមេដឹកនាំគណបក្សដែលទទួលបានចំនួនអាសនៈច្រើនជាងគេ ត្រូវបានប្រធានាធិបតីអ៊ីស្រាអែល​អញ្ជើញឱ្យ​ព្យាយាមបង្កើតរដ្ឋាភិបាលថ្មីមួយ ដោយបង្កើតរដ្ឋាភិបាលចម្រុះពហុគណបក្ស។

នៅក្នុងការបោះឆ្នោតខែមេសា ឆ្នាំ២០១៩ មិនមានគណបក្សណាមួយអាចចាត់ចែងបង្កើតរដ្ឋា​ភិបាលបាននាំទៅដល់ការបោះឆ្នោតមុនកាលកំណត់មួយ នៅក្នុងខែកញ្ញា។ ការបោះឆ្នោតលើកទី៣ បានធ្វើឡើងនៅក្នុងខែមីនា ឆ្នាំ២០២០ ប៉ុន្តែរដ្ឋាភិបាលដែលបង្កើតឡើងនៅក្នុងខែឧសភា ឆ្នាំដដែលបានឈានទៅរកការជាប់គាំង ហើយសភាត្រូវ​រលាយ​ដោយខ្លួនឯង។ ការបោះឆ្នោតលើកទី៤ បានធ្វើឡើងនៅក្នុង  ខែមីនា ឆ្នាំ២០២១។ ត្រឹមខែមិថុនា ឆ្នាំដដែល រដ្ឋាភិបាលចម្រុះមួយត្រូវបានបង្កើតឡើងដោយមាន ៨ គណបក្ស។ ប៉ុន្តែ ១ឆ្នាំ ក្រោយពីបង្កើតរដ្ឋាភិបាលចម្រុះ នៅក្នុងខែមិថុនា ឆ្នាំ២០២២ សភាអ៊ីស្រាអែលបានសម្រេចរំលាយខ្លួនឯង និងបានស្នើរៀបចំការបោះឆ្នោត​មុនកាល​កំណត់នៅថ្ងៃទី០១ ខែវិច្ឆិកា ឆ្នាំ២០២២៕

http://ព័ត៌មានសភាអន្តរជាតិ ២៦-១០-២២- ឈាវ សុផាត ប្រែសម្រួលពី៖ https://www.aa.com.tr/en/middle-east/israel-prepares-for-5th-legislative-election-in-4-years/2720452