លោក Vuong Dinh Hue ប្រធានរដ្ឋសភាវៀតណាមថ្លែងសុន្ទរកថាបិទកិច្ចប្រជុំលើកទី១៦​ របស់គណៈកម្មាធិការអចិន្ត្រៃយ៍រដ្ឋសភាវៀតណាម នាថ្ងៃទី១២ ខែតុលា ឆ្នាំ២០២២

​គណៈកម្មាធិការអចិន្ត្រៃយ៍នៃរដ្ឋសភាសាធារណរដ្ឋសង្គមនិយមវៀតណាម បានបិទបញ្ចប់កិច្ច ប្រជុំគណៈកម្មាធិការអចិន្ត្រៃយ៍លើកទី១៦ របស់ខ្លួន កាលពីថ្ងៃទី១២ ខែតុលា ឆ្នាំ២០២២ ក្នុងអំឡុងពេល ត្រៀមរៀបចំបើកសម័យប្រជុំពេញអង្គលើកទី៤ នៃរដ្ឋសភានីតិកាលទី១៥ នៅពេលខាងមុខ។

​ថ្លែងក្នុងសុន្ទរកថាបិទ លោក Vuong Dinh Hue ប្រធានរដ្ឋសភាវៀតណាម បានថ្លែងថា​ កិច្ចប្រជុំនេះ គឺផ្តោតលើបញ្ហានានា ដែលនឹងត្រូវពិនិត្យពិភាក្សានៅក្នុងសម័យប្រជុំ​ពេញ​អង្គលើកទី៤ នៃរដ្ឋសភា ដែលរួមមាន របាយការណ៍រដ្ឋាភិបាលស្តីពីការអភិវឌ្ឍសេដ្ឋកិច្ចសង្គមក្នុងឆ្នាំ២០២២ ផែនការថវិកាជាតិ, ផែនការអភិវឌ្ឍន៍សេដ្ឋកិច្ចសង្គម​សម្រាប់ឆ្នាំ២០២៣និងផែនការថវិកាបម្រុងជាតិសម្រាប់ឆ្នាំ២០២៣, ការអនុវត្តផែនការវិនិយោគសាធារណៈសម្រាប់ឆ្នាំ២០២២និងផែនការវិនិយោគ                សាធារណៈ​​​​​​សម្រាប់ឆ្នាំ២០២៣។

​គណៈកម្មាធិការអចិន្ត្រៃយ៍ ក៏បានពិនិត្យពិភាក្សាផងដែរ លើរបាយការណ៍រដ្ឋាភិបាលស្តីពី ការអនុវត្តផែនការយុទ្ធសាស្ត្រជាតិស្តីពី សមភាពយេនឌ័រសម្រាប់ឆ្នាំ២០២១ និងផែនការឆមាសទី១ សម្រាប់​ ឆ្នាំ២០២២ របាយការណ៍ស្តីពីការគ្រប់គ្រង និងការប្រើប្រាស់ថវិកាសម្រាប់ថែទាំសុខភាពនិងធានារ៉ាប់រងសង្គមក្នុងឆ្នាំ២០២១។

​លោក Hue បានកត់សម្គាល់ថា សមាជិករដ្ឋសភាទាំងមូល បានពិនិត្យមើលលើការដោះស្រាយ មតិយោបល់របស់ម្ចាស់ឆ្នោត ដែលបានបញ្ជូនមកសម័យប្រជុំលើកទី៣ នៃ​រដ្ឋសភា កាលពីដើមឆ្នាំ២០២២, បានជួយដោះស្រាយពាក្យបណ្តឹង និងការចោទប្រកាន់របស់ប្រជាពលរដ្ឋ និងការពិនិត្យលើមតិយោបល់របស់ប្រជាពលរដ្ឋ ដែលត្រូវបាន​បញ្ជូនមកសម័យប្រជុំលើកទី៤ នៃរដ្ឋសភា។ សមាជិករដ្ឋសភាទាំងមូលក៏បានពិនិត្យពិភាក្សាផងដែរ លើការងារគ្រប់គ្រងបុគ្គលិកមួយចំនួន ដែលនឹងត្រូវសម្រេចនៅ​ក្នុង​សម័យប្រជុំពេញអង្គនៃរដ្ឋសភានៅពេលខាងមុខនេះ៕

http://ព័ត៌មានសភាអន្តរជាតិ ១៤-១០-២២- កែវ ធាវីប្រែសម្រួលពី៖ https://english.vov.vn/en/politics/standing-committee-prepares-for-nas-fourth-session-post976948.vov