លោក Nabih Berri ប្រធានសភានៃសាធារណរដ្ឋលីបង់

​សភានៃសាធារណរដ្ឋលីបង់បានបរាជ័យជាលើកទី២ ក្នុងបោះឆ្នោតជ្រើសតាំងប្រធានាធិបតីថ្មីនៃ ប្រទេសរបស់ខ្លួន ដោយសារតែមិនមានវត្តមានគ្រប់គ្រាន់របស់សមាជិក​សភា ដើម្បីគ្រប់កូរ៉ុមបោះឆ្នោត។ លោក Nabih Berri ប្រធានសភានៃសាធារណរដ្ឋលីបង់ បានផ្អាកកិច្ចប្រជុំសភា រហូតដល់ថ្ងៃព្រហស្បតិ៍ ទី២០ ខែតុលា ឆ្នាំ២០២២ សប្តាហ៍ក្រោយ ដែលនៅសល់ពេលមិនដល់ ២សប្តាហ៍ផង មុនពេលអាណត្តិ របស់លោក Michel Aoun ប្រធានាធិបតីលីបង់ក្នុងតំណែងបច្ចុប្បន្នត្រូវចប់។

​ក្នុងពេលដែលនៅមិនទាន់មានការមូលមតិគ្នាលើបេក្ខជន គេរំពឹងទុកថា តំណែងប្រធានាធិបតីនៅទំនេរនឹងកើតមានឡើង។ វត្តមានរបស់សមាជិកសភា ២ភាគ៣ ឬ ៨៦រូប នៅក្នុងសភាដែលមាន ១២៨អាសនៈ ត្រូវការជាចាំបាច់ដើម្បីគ្រប់កូរ៉ុម។ ប៉ុន្តែនៅថ្ងៃព្រហស្បតិ៍ មានសមាជិកសភាតែ ៧១រូប ប៉ុណ្ណោះដែលមានវត្តមាននៅក្នុងសាល​ប្រជុំ​សភា។ នេះគឺជាលើកទី២ហើយ ដែលសមាជិកសភាបានបរាជ័យក្នុងការបោះឆ្នោតជ្រើសតាំងប្រមុខរដ្ឋថ្មី បន្ទាប់ពីមិនអាចរកបានអ្នកទទួលជ័យជម្នះពិតប្រាកដ ក្នុងអំឡុង​ពេល​​​នៃការបោះឆ្នោត ក្នុងកិច្ចប្រជុំសភាកាលពីលើកទី១ នាថ្ងៃទី២៩ ខែកញ្ញ ឆ្នាំ២០២២។

​ការបរាជ័យក្នុងការស្វែងរកអ្នកស្នងតំណែងពីលោក Aoun ក្នុងការបោះឆ្នោត ២ជុំដំបូង មិនមែនមិនធ្លាប់មាននោះទេ — កន្លងមានការប្រជុំសភាចំនួន ៤៦ដង និងចំណាយ​ពេល ២៩ខែ ក្នុងការបោះឆ្នោតជ្រើសតាំងអតីតអគ្គមេបញ្ជាការកងទ័ពវ័យ ៨៩ឆ្នាំ ក្នុងឆ្នាំ២០១៦។ តាមប្រព័ន្ធជំនឿសាសនានៅក្នុងប្រទេសលីបង់ តំណែងប្រធានាធិបតី​គឺតែងតែបម្រុងទុកសម្រាប់គ្រិស្តសាសនិក Maronite។

គួរបញ្ជាក់ផងដែរថា ក្នុងចំណោមក្រុមសមាជិកសភាសំខាន់ៗ ដែលអនុបវាទពីកិច្ចប្រជុំសភា គឺជាសមាជិកសភាទាំង ១៧រូប មកពីគណបក្សចលនាសេរីស្នេហាជាតិ(FPM) ដែលគណបក្សមួយនេះបង្កើត ឡើងដោយលោក Michel Aoun ប្រធានាធិបតីលីបង់  និងបច្ចុប្បន្នដឹកនាំដោយកូនប្រសារប្រុសរបស់លោក  គឺលោក Gebran Bassil។ មានតែ​​សមាជិកសភាមួយក្តាប់តូច ចំនួន១៣រូប មកពីក្រុម Hezbollah ក្រុម ប្រដាប់អាវុធគាំទ្រដោយអ៊ីរ៉ង់ និងគណបក្សនយោបាយដែលរេតាមខ្យល់ប៉ុណ្ណោះ ដែលមាន​វត្តមាន​នៅក្នុងកិច្ចប្រជុំសភាបោះឆ្នោតជ្រើសតាំងប្រធានាធិបតីថ្មី៕

http://ព័ត៌មានសភាអន្តរជាតិ ១៤-១០-២២- ឈាវ សុផាត ប្រែសម្រួលពី៖ https://www.thenationalnews.com/mena/lebanon/2022/10/13/lebanons-mps-again-fail-to-elect-new-president-as-quorum-not-met/