លោក Nguyen Van The រដ្ឋមន្ត្រីក្រសួងគមនាគមន៍វៀតណាម

​រដ្ឋសភានៃសាធារណរដ្ឋសង្គមនិយមវៀតណាម បានផ្តល់សេចក្តីទុកចិត្តលើ​ការបញ្ចប់មុខតំណែងលោក Nguyen Van The ជារដ្ឋមន្ត្រីក្រសួងគមនាគមន៍ តាមសំណើនាយក​រដ្ឋមន្ត្រី។ សម័យប្រជុំពេញអង្គលើកទី៤ នៃរដ្ឋសភានីតិកាលទី១៥ គ្រោងចាប់ផ្តើមបើកសម័យប្រជុំរបស់ខ្លួន នៅថ្ងៃទី២០ ខែតុលា ឆ្នាំ២០២២ និងបិទបញ្ចប់នៅថ្ងៃទី១៥ ខែវិច្ឆិកា ឆ្នាំ២០២២ ខាងមុខ។ តាមរយៈរបៀបវារៈនេះ រដ្ឋសភានឹងមានកិច្ចប្រជុំជាច្រើន ដើម្បីស្តាប់គណៈកម្មាធិការអចិន្ត្រៃយ៍ ពាក់ព័ន្ធនឹងការបញ្ចប់មុខតំណែង​អគ្គ​សវនករ​ជាតិសម្រាប់អាណត្តិ ៥ ឆ្នាំ (២០២១-២០២៦) និងស្តាប់លោក Pham Minh Chinh នាយករដ្ឋមន្ត្រីវៀតណាម ដែលស្នើសុំបញ្ចប់មុខតំណែងរដ្ឋមន្ត្រីក្រសួង​គមនាគមន៍សម្រាប់អាណត្តិ​ ៥ ឆ្នាំ (២០២១-២០២៦)។

​យោងតាមរបៀបវារៈនេះ នៅថ្ងៃទី២១ ខែតុលា ឆ្នាំ២០២២ ខាងមុខ នឹងមាននីតិវិធីច្រើនសម្រាប់ការជ្រើសតាំងអគ្គសវនករជាតិថ្មី ហើយនឹងបោះឆ្នោតផ្តល់សេចក្តី​ទុកចិត្ត​លើរដ្ឋមន្ត្រី ២ រូប ដែលរួមមាន​​រដ្ឋមន្ត្រីក្រសួងសុខាភិបាល និងរដ្ឋមន្ត្រីក្រសួងគមនាគមន៍។

​កាលពីថ្ងៃទី១៥ ខែកក្កដា ឆ្នាំ២០២២ លោកស្រី Dao Hong Lan ប្រធានគណបក្សខេត្ត Bac Ninh ភាគខាងជើង ត្រូវបានជ្រើសតាំងជារដ្ឋមន្ត្រីក្រសួងសុខាភិបាលស្តីទី បន្ទាប់​ពីលោក Nguyen Thanh Long អតីតរដ្ឋមន្ត្រីក្រសួងសុខាភិបាល ត្រូវបានចាប់ខ្លួន ពីបទពាក់ព័ន្ធការកេងបន្លំឧបករណ៍​ធ្វើតេស្តកូវីដ-១៩ ក្នុងឆ្នាំ២០២០។ កាលពីថ្ងៃទី២៥ ខែកក្កដា ឆ្នាំ២០២២ លោក Ngo Van Tuan អគ្គលេខាធិការបក្សខេត្ត Hoa Binh ត្រូវបានតែងតាំងជាលេខាធិការប្រតិភូបក្សក្នុង​សវនកម្មជាតិ និងជាអគ្គសវនកររង​ទទួល​បន្ទុកសវនកម្មជាតិ។ លោក Nguyen Van The បានបម្រើជារដ្ឋមន្ត្រីក្រសួងគមនាគមន៍ ចាប់តាំងពីឆ្នាំ២០១៧ មក៕

http://ព័ត៌មានសភាអន្តរជាតិ ១៣-១០-២២- កែវ ធាវីប្រែសម្រួលពី៖ https://e.vnexpress.net/news/news/national-assembly-to-approve-dismissal-of-transport-minister-4522622.html