លោក Vuong Dinh Hue ប្រធានរដ្ឋសភាវៀតណាមថ្លែងក្នុងកិច្ចប្រជុំ (Photo: VNA)
រដ្ឋធានីហាណូយ៖ កាលពីថ្ងៃចន្ទ ទី១០ ខែតុលា ឆ្នាំ២០២២ គណៈកម្មាធិការអចិន្ត្រៃយ៍នៃរដ្ឋសភា សាធារណរដ្ឋសង្គមនិយមវៀតណាមបានបើកកិច្ចប្រជុំលើកទី១៦ របស់ខ្លួនក្នុងរដ្ឋធានីហាណូយ។ ក្នុងសុន្ទរកថាបើកកិច្ចប្រជុំនោះ លោក Vuong Dinh Hue ប្រធានរដ្ឋសភាវៀតណាម បានថ្លែងថានេះគឺជាកិច្ចប្រជុំលើកចុងក្រោយរបស់គណៈកម្មាធិការអចិន្ត្រៃយ៍នៃរដ្ឋសភាវៀតណាម ដើម្បីត្រៀមរៀបចំបើកសម័យប្រជុំលើកទី៤ នៃរដ្ឋសភានីតិកាលទី១៥ ដែលត្រូវបានគ្រោងធ្វើនៅថ្ងៃទី២០ ខែតុលា ឆ្នាំ២០២២ ខាងមុខ។
លោកប្រធាន Hue បានថ្លែងទៀតថា ក្នុងអំឡុងពេលនៃកិច្ចប្រជុំនៅថ្ងៃទី៣ នេះ គណៈកម្មាធិការ អចិន្ត្រៃយ៍នៃរដ្ឋសភាវៀតណាម នឹងពិនិត្យមើលលើរបាយការណ៍ ដែលត្រូវបានបង្ហាញដោយរដ្ឋាភិបាល និងការពិនិត្យផ្ទៀងផ្ទាត់លើរបាយការណ៍របស់គណៈកម្មាធិការជំនាញនានានៃរដ្ឋសភាស្តីពី ការអនុវត្តផែនការអភិវឌ្ឍន៍សេដ្ឋកិច្ចសង្គម និងផែនការថវិកាជាតិឆ្នាំ២០២២ និងគោលដៅនានា ដែលកំណត់អំពីភារកិច្ច និងដំណោះស្រាយផែនការអភិវឌ្ឍន៍សេដ្ឋកិច្ចសង្គម និងផែនការត្រៀមបម្រុងថវិកាជាតិឆ្នាំ២០២៣។
លោកប្រធាន Hue បានថ្លែងទៀតថា នៅក្នុងសម័យប្រជុំនៃរដ្ឋសភាលើកទី៤ ខាងមុខនេះ រដ្ឋសភា នឹងអនុម័តផែនការថវិកាជាតិ និងផែនកាហិរញ្ញវត្ថុរយៈពេលមធ្យម (២០២៣-២០២៥) អនុលោមតាមច្បាប់ស្តីពី ថវិកាជាតិពាក់ព័ន្ធនឹងបទប្បញ្ញត្តិមួយចំនួនស្តីពី ថវិកាខេត្ត ក្រុង, សន្ទស្សន៍ ម៉ាក្រូសេដ្ឋកិច្ច, តុល្យភាពសារពើពន្ធ, ការចំណាយថវិកាលើស, បំណុលសាធារណៈ និងការកំណត់សងបំណុល។
សមាជិកសភាក្នុងតំណែងទាំងមូល នឹងផ្តល់មតិយោបល់លើសេចក្តីព្រាងរបាយការណ៍សង្ខេបស្តីពី មតិយោបល់ និងអនុសាសន៍នានារបស់ម្ចាស់ឆ្នោត និងប្រជាពលរដ្ឋ ដែលត្រូវបានដាក់បញ្ចូលក្នុងរបៀបវារៈនៃសម័យប្រជុំលើកទី៤ នេះ។ សមាជិកសភា នឹងពិនិត្យមើលលើរបាយការណ៍ស្តីពី ការអនុវត្តសេចក្តីសម្រេចរបស់រដ្ឋសភាលើការជំរុញយន្តការ និងគោលនយោបាយជាក់លាក់សម្រាប់ការអភិវឌ្ឍ ទីក្រុងហូជីមិញ និងយន្តការថវិកាជាតិ និងរហិរញ្ញវត្ថុ និងគោលនយោបាយសម្រាប់រដ្ឋធានីហាណូយ។
វិធានការដោះស្រាយបញ្ហាគម្រោងផ្ទេរប្រតិបត្តិការសំណង់ (BOT projects) និងគម្រោងស្នាក់ការសម្រាប់អ្នកទាប្រាក់ផាស៊ី ក៏នឹងត្រូវបានគេដាក់បញ្ចូលក្នុងរបៀបវារៈនៃសម័យប្រជុំលើកទី៤នោះ ផងដែរ។ ថ្នាក់ដឹកនាំរដ្ឋសភាវៀតណាមរូបនេះ បានបន្ថែមទៀតថា គណៈកម្មាធិការអចិន្ត្រៃយ៍នៃរដ្ឋសភាវៀតណាម ក៏នឹងពិនិត្យមើលយ៉ាងយកចិត្តទុកដាក់ផងដែរ លើសេចក្តីព្រាងសេចក្តីសម្រេចស្តីពី ការជំរុញកម្មវិធី ដែលត្រូវបានអនុញ្ញាតឱ្យប្រជាពលរដ្ឋជ្រើសរើសស្លាកលេខរថយន្ត តាមរយៈការដេញថ្លៃ៕
http://ព័ត៌មានសភាអន្តរជាតិ ១១-១០-២២- កែវ ធាវីប្រែសម្រួលពី៖ https://en.vietnamplus.vn/national-assembly-standing-committees-16th-session-opens/239778.vnp
