អាគារសភាជាន់ទាបរុស្ស៊ី (State Duma)

​លោក Vitaliy Milonov សមាជិកសភាជាន់ទាបនៃសហព័ន្ធរុស្ស៊ី (State Duma) បានថ្លែងប្រាប់ទីភ្នាក់ងារសារព័ត៌មានរុស្ស៊ី RIA Novosti ថា សភាជាន់ទាបរុស្ស៊ី ​ គ្រោងដាក់​ចេញ​សេចក្តីព្រាងច្បាប់មួយដែលនឹងអនុញ្ញាតឱ្យសមាជិកសភារុស្ស៊ីមានសិទ្ធិចូលក្នុងកំណែនកងទ័ព ប្រសិនបើសមាជិកសភាទាំងនោះ មានបំណងចង់ចូលរួមក្នុង​ប្រតិបត្តិការ​​យោធាពិសេសក្នុងប្រទេសអ៊ុយក្រែន។ លោក Milonov បានថ្លែងទៀតថា ​ ច្បាប់បច្ចុប្បន្ននេះ មិនអនុញ្ញាតឱ្យសមាជិកសភាចុះឈ្មោះ​ក្នុងបញ្ជីអ្នកស្ម័គ្រចិត្ត​ចូលរួមក្នុងកំណែនទ័ពបានឡើយ ដែលបានបង្កើតឱ្យមានបញ្ហាជាច្រើនសម្រាប់អ្នកដែលចង់ស្ម័គ្រចិត្តជាសមាជិកសភា អាចជួបការលំបាក ខណៈពេលអវត្តមានពី​កិច្ចប្រជុំ​សភា។

លោក Milonov បានថ្លែងប្រាប់ទីភា្នក់ងារសារព័ត៌មានរុស្ស៊ី RIA Novosti ថា លោកបានពិភាក្សាអំពីបញ្ហានេះ ជាមួយលោក Andrei Turchak សមាជិកសភាជាន់ខ្ពស់រុស្ស៊ី និងជាអគ្គលេខាធិការគណៈកម្មាធិការអចិន្ត្រៃយ៍នៃឧត្តមក្រុមប្រឹក្សាគណបក្សរួបរួមជាតិរុស្ស៊ីរួចហើយ ហើយបានណែនាំឱ្យភាគីពាក់ព័ន្ធនឹងសេចក្តីព្រាងច្បាប់ស្តីពី លក្ខន្តិកៈ​សមាជិកសភា ពិនិត្យមើលលើស្ថានភាពនេះឡើងវិញ។

​ច្បាប់សហព័ន្ធបានចែងថា សមាជិកសភាគ្រប់រូបមិនត្រូវបានអនុញ្ញាតឱ្យចូលរួមក្នុងកំណែនកងទ័ពឡើយ។ ហើយអ្នកដែលស្ម័គ្រចិត្តរបស់យើងទាំងអស់ធ្វើអ្វីៗទៅតាមការ​ស្ម័គ្រចិត្ត ទោះបីជាសមាជិកសភាទាំងនោះ ជាប់កាតព្វកិច្ចចូលរួមប្រជុំសភា យ៉ាងណាក៏ដោយ។ ហើយប្រសិនបើការសម្រេចចិត្តត្រូវបានធ្វើឡើង នោះវានឹងចាំបាច់ ដែលអ្នក​ស្ម័គ្រចិត្តរបស់យើងទាំងអស់ មិនគួរចេញមុខរំលោភ បំពានលើបទប្បញ្ញត្តិឡើយ។ ហើយអ្នកស្ម័គ្រចិត្តទាំងអស់អាចចូលរួមដោយខ្លួនឯង។

​លោក Milonov បានបន្ថែមទៀតថា សមាជិកសភាគ្រប់រូប មានឆន្ទៈចង់ចូលរួមក្នុងសមរភូមិ​សង្គ្រាមមួយ ដែលត្រូវបានប្រឈមមុខដោយការពិតដែលថា សមាជិកសភាទាំង​នោះ មិនអាចអវត្តមានជាផ្លូវការរបស់ខ្លួនពីសភាបានឡើយ ដោយសារមិនមានចែងក្នុងច្បាប់៕

http://ព័ត៌មានសភាអន្តរជាតិ ០៣-១០-២២- កែវ ធាវីប្រែសម្រួលពី៖ https://euroweeklynews.com/2022/10/02/mps-drafted-russian-military/