មកដល់ពេលនេះ សហគមន៍ដែលរងផលប៉ះពាល់ដោយសារឥទ្ធិពលនៃបម្រែបម្រួលអាកាសធាតុ ជារឿយៗ បានជួបប្រទះរួចទៅហើយនូវការលំបាកដែលបណ្តាល​មកពី​ភាពក្រីក្រ។ ទឹកជំនន់ ខ្យល់ព្យុះ ភ្លៀងមិនទៀងទាត់ អាកាសធាតុក្តៅនិងស្ងួតជាងមុន បានបន្តបង្កជាការលំបាកដល់ប្រជាពលរដ្ឋក្នុងការ ទទួលបានសិទ្ធិសមរម្យក្នុងការរស់នៅ និងប៉ះពាល់ដល់តម្រូវការជាមូលដ្ឋានផ្សេងៗទៀតដូចជា តម្រូវការទឹក ស្បៀងអាហារ ជីវភាពរស់នៅសមរម្យ និងការរស់នៅលើដីធ្លីរបស់ខ្លួន។ ពេលខ្លះ ឥទ្ធិពល​អាក្រក់​នៃ បម្រែបម្រួលអាកាសធាតុ បានក្លាយជាកត្តាជំរុញទៅជាវិបត្តិផ្សេងទៀត ដែលធ្វើឱ្យមនុស្សជាច្រើនបង្ខំចិត្តត្រូវតែចាកចេញពីលំនៅឋាន និងសហគមន៍របស់ខ្លួន។

​ប្រទេសជាច្រើនដែលបានទទួលយកជនភៀសខ្លួន ក៏បានរងផលប៉ះពាល់ខ្លាំងដែរពីបម្រែបម្រួល  អាកាសធាតុ។ សមាជិកសភាដើរតួនាទីដ៏សំខាន់ ក្នុងការតាក់តែងច្បាប់ និង​ជំរុញការអនុវត្តនានាដើម្បីកាត់បន្ថយឬលុបបំបាត់ឥទ្ធិពលអាក្រក់នៃបម្រែបម្រួលអាកាសធាតុ ក្នុងការឆ្លើយតបចំពោះការបាត់បង់  ទីលំនៅរបស់ប្រជាពលរដ្ឋ និងក្នុងការ​ធានា​​​​​ផ្តល់ការការពារនិងជំនួយនានា ក្នុងអំឡុងពេលនៃគ្រោះអាសន្ន។ សមាជិកសភា ជាអ្នកតស៊ូមតិឱ្យបង្កើតនូវសន្ធិសញ្ញាអន្តរជាតិ ជាអ្នកពង្រឹងការប្តេជ្ញាចិត្តរបស់ស្ថាប័ន​ពាក់ព័ន្ធ ដើម្បីយកខ្លឹមសារនៃសន្ធិសញ្ញាទាំងនោះមកដាក់ចូលក្នុងច្បាប់ជាតិ ជាអ្នកធានាឱ្យមានថវិកាគ្រប់គ្រាន់ ដើម្បីអនុវត្តការទប់ស្កាត់ការបម្រែបម្រួលអាកាសធាតុ ជាអ្នក​បង្កើតច្បាប់និងគោលនយោបាយផ្សេងៗស្តីអំពីគ្រោះមហន្តរាយ និងជាអ្នកជំរុញការសម្រេចឱ្យបាននូវចំណុចទី១៣នៃគោលដៅអភិវឌ្ឍន៍ប្រកប ដោយ ចីរភាព(SDG13)ស្តីពីបម្រែបម្រួលអាកាសធាតុ។ ទិន្នន័យដែលផ្តួចផ្តើមចងក្រងដោយវិទ្យាស្ថានស្រាវជ្រាវ The LSE Grantham Research Institute និងមជ្ឈមណ្ឌលSabin Center នៃមហា​វិទ្យាល័យច្បាប់ The Columbia Law School ក្រោមកិច្ចសហការពីសហភាពអន្តរសភា(IPU) បានបង្ហាញថា បច្ចុប្បន្ននេះមានច្បាប់ និង​គោលនយោបាយពាក់ព័ន្ធ​នឹងបម្រែបម្រួលអាកាសធាតុចំនួន២,១២០ ដែលកំពុងស្ថិតនៅជាធរមាន ទូទាំងពិភពលោក។

​ភាពនៅជិតដិតជាមួយម្ចាស់ឆ្នោតនៅមូលដ្ឋាន និងការអនុវត្តតួនាទីត្រួតពិនិត្យរបស់សមាជិកសភា បានជួយឱ្យមានការធានាថាជនភៀសខ្លួន និងអ្នកបាត់បង់ទីលំនៅពិតជាបាន​ទទួលនូវជំនួយគាំទ្រពីរដ្ឋាភិបាល ដែលទាំងអស់នេះត្រូវកត់សំគាល់នៅក្នុងកិច្ចប្រជុំបែបនិម្មិត ស្តីពីផលប៉ះពាល់នៃបម្រែបម្រួលអាកាសធាតុ លើការបាត់បង់ទីលំនៅ និង​សន្តិសុខ​មនុស្ស(The impact of climate change on displace ment and human security ) ដែលរៀបចំឡើងសម្រាប់សមាជិកសភាកាលពីថ្ងៃទី២១ ខែកញ្ញា ឆ្នាំ២០២២។     កិច្ចប្រជុំនេះក៏មានការចូលរួមផងដែរពីសំណាក់លោកស្រីRomina Khurshid Alam សមាជិកសភាសាធារណរដ្ឋអ៊ីស្លាមប៉ាគីស្ថាន លោកស្រីCatherine Chabaud សមាជិកភាអឺរ៉ុប លោកស្រីAmira Saberសមាជិកសភាសាធារណរដ្ឋអារ៉ាប់អេហ្ស៉ីប លោកIssa Mardo Djabirសមាជិកសភាសាធារណរដ្ឋឆាត លោកAdrew Harper ទីប្រឹក្សាពិសេសផ្នែកសកម្មភាពអាកាសធាតុរបស់អង្គការUNHCR។ កិច្ចប្រជុំត្រូវបានបើកក្រោមអធិបតីភាពរបស់លោកMartin Chungong អគ្គលេខាធិការ​សហភាពអន្តរសភា និងលោកស្រី Gillian Trig gs ឧត្តមស្នងការរងរបស់អង្គការUNCHR និងសម្របសម្រួលដោយលោកស្រីSafak Pavey  ទីប្រឹក្សាពិរបស់​អង្គការ​UNHCR។

​លោកស្រីRomina Khurshid សមាជិកសភាប៉ាគីស្ថានដែលជាប្រទេសរងគ្រោះយ៉ាងធ្ងន់ធ្ងរដោយ សារគ្រោះទឹកជំនន់ ដែលប៉ះពាល់ដល់មនុស្សជាង៣៣លាននាក់ (ក្នុងចំណោម៣៣លាននាក់នោះ មានមួយចំនួនជាជនភៀសខ្លួនជនជាតិអាហ្វហ្កានីស្ថាន) បានធ្វើការកត់សំគាល់ នៅក្នុងកិច្ចប្រជុំខាងលើ អំពីផលប៉ះពាល់នៃគ្រោះទឹកជំនន់​មកលើគ្រប់ទិដ្ឋភាពជីវភាពរស់នៅរបស់ប្រជាពលរដ្ឋ។ លោកស្រីKhurshid បានលើកឡើងថា គ្រោះទឹកជំនន់បានបង្កផលប៉ះពាល់ដល់គ្រប់ផ្នែក គិតទាំងសន្តិសុខស្បៀង រហូតដល់ការបង្កឱ្យមានជំងឺឆ្លងរាតត្បាតតាមទឹក នៅទូទាំងប្រទេស។ គ្រោះទឹកជំនន់នេះបានទាញប្រទេសប៉ាគីស្ថាន ឱ្យធ្លាក់ថយក្រោយ ក្នុងដំណើរនៃការសម្រេចគោល​ដៅ​អភិវឌ្ឍន៍ប្រកបដោយចីរភាព។

​ក្នុងកិច្ចប្រជុំខាងលើCatherine Chabaud នៃសភាអឺរ៉ុប បានស្នើឱ្យប្រទេសនីមួយៗសិក្សាអំពីបទពិសោធន៍ជោគជ័យក្នុងការសម្របនឹងអាកាសធាតុ(Climate Adaption)ពីគ្នាទៅវិញទៅមក និងស្វែងរកនូវវិធីសាស្រ្តដ៏ល្អបំផុតសម្រាប់ប្រទេសរៀងៗខ្លួន។ ចំណែកលោកIssa Mardoវិញ លោកបានធ្វើការកត់សម្គាល់អំពីសារៈសំខាន់នៃតួនាទី​របស់​​សភាក្នុងការត្រួតពិនិត្យថវិកា និងការអនុវត្តកម្មវិធីនានាដែលមាន គោលដៅលើការជួយដល់ជនភៀសខ្លួន និងចែករំលែកអំពីវិធីសាស្រ្តដែលសភាប្រទេសឆាត​បាន​អនុម័ត​នូវច្បាប់ថ្មីៗ ដើម្បីធានាឱ្យមានការធ្វើសមាហរណកម្មជនភៀសខ្លួនទៅសហគមន៍ថ្មីរបស់ពួកគេ ដែលក្នុងនោះក៏រាប់បញ្ចូលផងដែរ នូវការបង្កើតសកម្មភាព​ដែលមាន​ប្រាក់ចំណូលសម្រាប់ជនភៀសខ្លួន។ ចំណែកលោកAdrew Harperវិញ លោកបានលើកឡើងថា សមាជិកសភាគឺជាតំណភ្ជាប់រវាងរដ្ឋាភិបាលថ្នាក់ជាតិ និងប្រជាពលរដ្ឋ​នៅតាម​​សហគមន៍ ហើយប្រជាពលរដ្ឋដែលបាត់បង់ទីលំរបស់ខ្លួនដោយសារបម្រែបម្រួលអាកាសធាតុ មានលទ្ធភាពតិចតួចក្នុងការស្វែងរកដីធ្លីសមរម្យសម្រាប់ការ​តាំងទីលំ​នៅថ្មី និងមានធនធានស្តួចស្តើងសម្រាប់រស់សម្របខ្លួននឹងការប្រែប្រួលអាកាសធាតុធ្ងន់ធ្ងរ…៕

http://ព័ត៌មានពីអង្គសភាអន្តរជាតិ ២៩-០៩-២២- មាស តូនី ប្រែសម្រួលពី៖ https://www.ipu.org/news/news-in-brief/2022-09/global-parliamentary-solidarity-those-forced-flee-because-