លោក Anders Norlen ទទួលបានការតែងតាំងជាប្រធានសភាស៊ុយអែត ជាថ្មី

​រាជធានីស្តុកខុល៖ កាលពីថ្ងៃចន្ទ ទី២៦ ខែកញ្ញា ឆ្នាំ២០២២ សមាជិកសភានៃព្រះរាជាណាចក្រ ស៊ុយអែតបានតែងតាំងលោក Anders Norlen ដែលជាអ្នកនយោបាយមកពី​គណបក្ស​​​អភិរក្សនិយម Moderate Party ជាប្រធានសភាជាថ្មី។ ការតែងតាំងនេះ គឺជាជំហានមួយក្នុងចំណោមជំហានជាច្រើន ដែលត្រូវការជាចាំបាច់ មុនពេលដែល​រាជរដ្ឋាភិបាលថ្មីមួយអាចចូលកាន់តំណែងបាន បន្ទាប់ពីក្រុម   គណបក្សស្តាំនិយមទទួលបានជ័យជម្នះក្នុងការបោះឆ្នោតជ្រើសតាំងសមាជិកសភា កាលពីថ្ងៃទី១១  ខែកញ្ញា ឆ្នាំ២០២២។​

មេដឹកនាំគណបក្ស Moderate លោក Ulf Kristersson ត្រូវបានប្រគល់អាណត្តិឱ្យព្យាយាមបង្កើត រាជរដ្ឋាភិបាលថ្មីមួយ ក្រោយពីជិត ១ទសវត្សរ៍ នៃការកាន់អំណាច​ក្រោមការ​​​​​​ដឹកនាំរបស់គណបក្សសង្គមប្រជាធិបតេយ្យ។ គេរំពឹងទុកជាទូទៅថា គណបក្សនេះនឹងបង្កើតគណៈរដ្ឋមន្រ្តីសំឡេងភាគតិចរបស់ខ្លួន ដែលគាំទ្រដោយគណបក្ស​ប្រឆាំងនឹងជនអន្តោប្រវេសន៍ គឺគណបក្ស Sweden Democrats។ លោកប្រធានសភាស៊ុយអែត Anders Norlen បានថ្លែងប្រាប់សន្និសីទសារព័ត៌មានមួយកាលពីថ្ងៃចន្ទថា លោក Kristersson​ នឹងធ្វើសេចក្តីរាយការណ៍ស្តីពីវឌ្ឍនភាពនៃកិច្ចខិតខំប្រឹងប្រែងរបស់ខ្លួន នៅថ្ងៃទី២៨ ខែកញ្ញា ឆ្នាំ២០២២ ខាងមុខនេះ។ ប៉ុន្តែយ៉ាងណាក៏ដោយ លោកប្រធានសភារូបនេះ បានបដិសេធក្នុងការនិយាយថា ពេលណាសភាស៊ុយអែតនឹងបោះឆ្នោតផ្តល់សេចក្តីទុកចិត្តលើរាជរដ្ឋាភិបាលថ្មី។

ខណៈដែលគណបក្ស Sweden Democrats ទទួលបានអាសនៈនៅក្នុងសភា ច្រើនជាងគណបក្ស Moderate នោះ ប៉ុន្តែលោក Kristersson ទទួលបានការគាំទ្រទូលំទូលាយ​ជាង ក្នុងចំណោមគណបក្សដទៃទៀត ដូច្នឹងហើយគេមើលឃើញថា លោក Kristersson នឹងក្លាយជានាយករដ្ឋមន្រ្តីនីតិកាលថ្មី។ ដូចគ្នានេះដែរ លោក Anders Norlen ទទួល​បានការគាំទ្រយ៉ាងទូលំទូលាយរក្សាបានតំណែងជាប្រធាន សភា ដែលជាតំណែងមួយដែលលោកទទួលបានចាប់តាំងពីឆ្នាំ២០១៨មក៕

http://ព័ត៌មានសភាអន្តរជាតិ ២៧-០៩-២២- ឈាវ សុផាត ប្រែសម្រួលពី៖ https://www.reuters.com/world/europe/swedish-parliament-reappoints-moderates-party-speaker-2022-09-26/