លោក Nabih Berri ប្រធានសភានៃសាធារណរដ្ឋលីបង់

​នៅក្នុងកិច្ចប្រជុំសភានៃសាធារណរដ្ឋលីបង់ កាលពីថ្ងៃចន្ទ ទី២៦ ខែកញ្ញា ឆ្នាំ២០២២ បានអនុម័ត សេចក្តីព្រាងច្បាប់ថវិកាជាតិឆ្នាំ២០២២។ ការអនុម័តនេះ ធ្វើឡើងតែ ៣ខែ មុនពេលដាច់ឆ្នាំ២០២២។ សេចក្តីព្រាងច្បាប់មួយនេះ រួមបញ្ចូល អត្រាប្តូរប្រាក់ដែលនៅពេលនេះបានធ្លាក់ចុះ ២ដង ទាបជាងតម្លៃ ជាក់ស្តែងនៅក្នុងប្រទេស​មួយនេះ។

​សមាជិកសភាចំនួន ៦៣រូប នៃ១២៨រូប បានបោះឆ្នោតគាំទ្រថវិកាជាតិឆ្នាំ២០២២ និង ៣៧រូប បោះឆ្នោតអនុបវាទ។ ការអនុម័តថវិកាខាងលើ បើទោះបីជាយឺតយ៉ាវ​ខ្លាំងបែបនេះក៏ដោយប៉ុន្តែវាជាតម្រូវការចាំបាច់ ដើម្បីបញ្ចៀសរលកនៃការរិះគន់ជាថ្មីពីមូលនិធិរូបិយវត្ថុអន្តរជាតិ(IMF) ដែលបានរិះគន់ អាជ្ញាធរលីបង់ចំពោះការអនុវត្ត​កំណែទម្រង់​ដ៏យឺតយ៉ាវរបស់ខ្លួន។ សេចក្តីព្រាងច្បាប់ថវិកាខាងលើបាន ប្រមើមើលពីការបង្កើនប្រាក់បៀវត្សរ៍មន្រ្តីរាជការស៊ីវិល ពី ៥លាន ទៅ ១២លាន liras (ប្រមាណពី​១៣៥ ទៅ ៣២៥ដុល្លារស.រ.អា នៅក្នុងអត្រាប្តូរប្រាក់ក្នុងទីផ្សារងងឹត)។ ថវិកាចំណាយ គ្រោង ៤១លានលាន liras និងប្រាក់ចំណូលប្រមាណ ២៩.៩លានលាន liras។

​កិច្ចប្រជុំសភាខាងលើ ត្រូវបានក្រុមបាតុករលីបង់រាប់ពាន់នាក់ប៉ុនប៉ងចូលលុកលុយក្នុងអាគារសភា ប៉ុន្តែត្រូវបានកងទ័ព និងនគរបាលជាតិរារាំងពួកគេ។ ក្រុមបាតុករបាន​បញ្ជូនប្រតិភូចរចាជាមួយសមាជិកសភា​ និងលោក Maurice Salim ដែលជារដ្ឋមន្រ្តីក្រសួងការពារជាតិនៃរដ្ឋាភិបាលបណ្តោះអាសន្នលីបង់ ដែលនៅទីបំផុតលោករដ្ឋមន្រ្តី​រូបនេះ​បានប្តេជ្ញាថានឹងបង្កើនប្រាក់បៀវត្សរ៍ ១ទ្វេជាបី ជូនបុគ្គលិកយោធា និងយោធិនចូលនិវត្តន៍។ មូលនិធិរូបិយវត្ថុអន្តរជាតិ(IMF) និងរដ្ឋាភិបាលលីបង់ សម្រេចបាន​កិច្ចព្រមព្រៀងមួយកាលពីខែមេសា ឆ្នាំ២០២២ ដែលប្រទេសមួយនេះនឹងទទួលបានថវិកាប្រមាណជា ៣ពាន់លានដុល្លារ ក្នុងរយៈពេល ៤ឆ្នាំ។

គួរបញ្ជាក់ផងដែរថា ប្រទេសលីបង់បានស្ថិតក្នុងវិបត្តិហិរញ្ញវត្ថុ និងសេដ្ឋកិច្ចដ៏ធ្ងន់ធ្ងរជាង ២ឆ្នាំកន្លងមកនេះ ជាមួយនឹងភាពតានតឹងនយោបាយ និងសង្គម។ នៅចំពេលនៃ​វិបត្តិនេះ ប្រព័ន្ធធនាគារស្ទើរតែ លែងដំណើរការទាំងស្រុង រូបិយបណ្ណជាតិបានធ្លាក់ថ្លៃជាង ២០ដង បើប្រៀបធៀបនឹងប្រាក់ដុល្លារ​បណ្តាលឱ្យជាង ៧០% នៃចំនួនប្រជាជន​លីបង់បានធ្លាក់ចុះក្រោមបន្ទាត់នៃភាពក្រីក្រ៕

http://ព័ត៌មានសភាអន្តរជាតិ ២៧-០៩-២២- ឈាវ សុផាត ប្រែសម្រួលពី៖ https://www.urdupoint.com/en/business/update-lebanese-parliament-adopts-budget-fo-1569001.html