លោក Alen Simonyan ប្រធានសភាអាម៉េនី ទទួលស្វាគមន៍លោកស្រី Nancy Pelosi ប្រធានសភាសហរដ្ឋអាម៉េរិក

​សភានៃសាធារណរដ្ឋអាម៉េនីបានឱ្យដឹងថា លោក Alen Simonyan ប្រធានសភាអាម៉េនីបានទទួលជួបគណៈប្រតិភូសភាមួយក្រុមដឹកនាំដោយលោកស្រី Nancy Pelosi ប្រធានសភាតំណាងសហរដ្ឋអាម៉េរិកដែលបានអញ្ជើញដល់ប្រទេសអាម៉េនី ក្នុងដំណើរទស្សនកិច្ចផ្លូវការមួយ កាលពីថ្ងៃអាទិត្យ ទី១៨ ខែកញ្ញា ឆ្នាំ២០២២។ ពិធីទទួល​លោកស្រីប្រធានសភាត្រូវបានធ្វើឡើង បន្ទាប់ពីការសន្ទនាជាលក្ខណៈ ឯកជនមួយរវាងដឹកនាំសភានៃប្រទេសទាំងពីរ។ ការពិភាក្សាបន្ត មានការចូលរួមពីភាគីទាំងសងខាង។

​លោក Simonyan បានកត់សម្គាល់ថា​ សហរដ្ឋអាម៉េរិកបានកាន់កាប់កន្លែងដ៏សំខាន់មួយនៅក្នុង ជីវិតនយោបាយ និងសេដ្ឋកិច្ចរបស់អាម៉េនី។ លោក Simonyan បានថ្លែងថា “ដំណើរទស្សនកិច្ចរបស់លោកស្រី Pelosi មកកាន់អាម៉េនី កើតមានឡើងនៅក្នុអំឡុងពេលដែលប្រទេសយើងជួបប្រទះនូវស្ថាន ភាពដ៏លំបាកបំផុត ហើយយើងសូម​សម្តែងកា​រដឹងគុណដោយការគោរព។ ចាប់តាំងពីថ្ងៃទី១៣ ខែកញ្ញា ឆ្នាំ២០២២មក សាធារណរដ្ឋអាស៊ែបៃហ្សង់បានចាប់ផ្តើមឈ្លានពានដំណាក់កាលថ្មីមួយទៀតមកលើ​អធិបតេយ្យភាពដែនដីរបស់អាម៉េនី។ កងទ័ពអាស៊ែបៃហ្សង់ មិនត្រឹមតែមានគោលដៅបាញ់ផ្លោងដ៏ឃោរឃៅមក លើទីតាំងព្រំដែនអាម៉េនីប៉ុណ្ណោះទេ ប៉ុន្តែបានបាញ់ផ្លោង​មកលើទីលំនៅរបស់ប្រជាជន និងហេដ្ឋារចនាសម្ព័ន្ធស៊ីវិលនានា ជាអកុសល យើងមានជនរងគ្រោះជាច្រើននាក់”។

​លោក Simonyan បានសម្តែងនូវការដឹងគុណចំពោះកិច្ចព្រមព្រៀងឈប់បាញ់ដ៏ផុយស្រួយដែល សហរដ្ឋអាម៉េរិកធ្វើជាអន្តរការី នាល្ងាចថ្ងៃទី១៤ ខែកញ្ញា និងបានសម្តែងនូវ​ការ​​ដឹងគុណដល់អាជ្ញាធរ សហរដ្ឋអាម៉េរិក ក្នុងនោះរួមទាំង សមាជិកសភាសហរដ្ឋអាម៉េរិកជាច្រើនរូប ដែលបានផ្តល់នូវការវាយតម្លៃ​យ៉ាងត្រឹមត្រូវលើស្ថានភាពវិវត្តន៍​ថ្មីៗ​នេះ។ ភាគីទាំងពីរក៏បានពិភាក្សាពីកិច្ចការពាក់ព័ន្ធនឹងសន្តិសុខអាម៉េនី និងក្នុងតំបន់ រួមទាំង ព័ត៌មានលម្អិតពាក់ព័ន្ធនឹងនីតិវិធីបន្ថែមទៀតនៅក្នុងក្រុមប្រឹក្សាសន្តិសុខ​របស់​អង្គការសហប្រជាជាតិ។

គម្រោងកិច្ចសហប្រតិបត្តិការអន្តរ-សភាក្នុងថ្ងៃអនាគត ក៏ត្រូវបានលើកយកមកពិភាក្សានៅក្នុងជំនួបនោះផងដែរ។ នៅចុងបញ្ចប់នៃជំនួប លោកប្រធានសភាអាម៉េនី និងលោកស្រីប្រធានសភាសហរដ្ឋ អាម៉េរិកបានចេញសេក្តីថ្លែងការណ៍មួយ។ ដោយសម្តែងនូវការដឹងគុណសម្រាប់ការទទួលស្វាគមន៍ លោកស្រីប្រធានសភាតំណាង​សហរដ្ឋអាម៉េរិកិរូបនេះ បានកត់សម្គាល់ថា សន្តិសុខគឺពិតជាមានសារៈសំខាន់ ខ្លាំងណាស់សម្រាប់ប្រទេសទាំងពីរ៕

http://ព័ត៌មានសភាអន្តរជាតិ ១៩-០៩-២២- ឈាវ សុផាត ប្រែសម្រួលពី៖ https://news.am/eng/news/720844.html