លោក Raja Pervaiz Ashraf ប្រធានរដ្ឋសភានៃសាធារណរដ្ឋឥស្លាមប៉ាគីស្ថាន

​លោក Raja Pervaiz Ashraf ប្រធានរដ្ឋសភានៃសាធារណរដ្ឋឥស្លាមប៉ាគីស្ថានបានថ្លែងថា សមាជិកសភានៃប្រទេសនានា នៅលើពិភពលោក គួរតែយល់ពីតួនាទី និងការរួម​ចំណែករបស់ខ្លួន ដើម្បីប្រសិទ្ធភាពនៃការកាត់បន្ថយបញ្ហាប្រឈមបម្រែបម្រួលអាកាសធាតុសកល ដែលជាការគំរាមកំហែងមួយដ៏ពិតប្រាកដដល់សន្តិសុខមនុស្សជាតិ។

​លោក Ashraf បានថ្លែងបែបនេះ នៅពេលលោកថ្លែងសុន្ទរកថាក្នុង “សិក្ខាសាលាថ្នាក់តំបន់លើកទី៣ របស់សហភាពអន្តរសភា(​IPU) ស្តីពីការសម្រេចបានគោលដៅ​អភិវឌ្ឍប្រកបដោយចីរភាព(SDGs) សម្រាប់សភាអាស៊ី-ប៉ាស៊ីហ្វិក” ដែលធ្វើឡើងនៅក្នុងវិមានសភាប៉ាគីស្ថាន​។ លោក Ashraf បានថ្លែងបន្តថា ប៉ាគី-ស្ថានស្ថិតក្នុងចំណាត់ទី៨ ក្នុងចំណោមប្រទេសដែលងាយរងគ្រោះបំផុតពីបម្រែបម្រួលអាកាសធាតុ បើទោះបីជាខ្លួនបានរួមចំណែកមិនដល់ ១%ផង ក្នុងការបំភាយកាបូនសកល។ ករណីទឹកជំនន់ថ្មីៗ​នេះក្នុង​ប្រទសប៉ាគីស្ថានបានបណ្តាលមានការបាប់បង់ជីវិតមនុស្សដ៏មានតម្លៃ និងបំផ្លិចបំផ្លាញនូវហេដ្ឋារចនាសម្ព័ន្ធជាមូលដ្ឋាន រួមមាន ផ្លូវថ្នល់ ផ្ទះសម្បែង សាលារៀន និងមូលដ្ឋានសុខាភិបាល ។ល។

​លោក​​ Ashraf បានថ្លែងថា សិក្ខាសាលាខាងលើនឹងផ្តល់ឱ្យយើងនូវឱកាសមួយទាន់ពេលវេលា ក្នុងការវាយតម្លៃឡើងវិញលើយុទ្ធសាស្រ្តជាតិ និងតំបន់​ ឆ្ពោះទៅសម្រេចបាន​គោលដៅ SDGs រហូតដល់ ឆ្នាំ២០៣០ បន្ទាប់ពីវិបត្តិសេដ្ឋកិច្ចសង្គមដ៏ធំធេងដែលយើងបានពើបប្រទះ ដោយសារតែការរាតត្បាតជា សកលនៃជំងឺកូវីដ-១៩។ សិក្ខាសាលា​នេះក៏នឹងជួយក្នុងការវាយតម្លៃលើបញ្ហាប្រឈមនៃការផ្តល់ការងារធ្វើសមរម្យ សមធម៌សុខភាព និងការធានានូវសន្តិសុខស្បៀងនៅក្នុងពិភពលោក ដែលបណ្តាលមកពីផល​ប៉ះពាល់អវិជ្ជមាននៃបម្រែបម្រួលអាកាសធាតុ នៅក្នុងទម្រង់នៃគ្រោះរាំងស្ងួតធ្ងន់ធ្ងរ នៅតំបន់ខ្លះ ប៉ុន្តែបែរជាមានទឹកជំនន់ភ្លាមៗ នៅក្នុងតំបន់ដទៃ។

លោក Ashraf បានធានាថា រដ្ឋសភាប៉ាគីស្ថាននឹងបន្តដើរតួនាទីបុរេសកម្ម ក្នុងនាមជារដ្ឋសមាជិកសហភាពអន្តរសភា(IPU) តាមរយៈការខិតខំប្រឹងប្រែងរួមគ្នា ដើម្បីពង្រឹង​ប្រជាធិបតេយ្យជាប្រពៃណី នៅក្នុងតំបន់អាស៊ី-ប៉ាស៊ីហ្វិក ដើម្បីដាក់ចេញនូវនវានុវត្តន៍ថ្មីនៃយន្តការសភា ដើម្បីធ្វើឱ្យក្លាយទៅជាទម្លាប់មួយសម្រាប់របៀបវារៈនៃការ​អភិវឌ្ឍន៍​​ឆ្នាំ២០៣០៕

http://ព័ត៌មានសភាអន្តរជាតិ ១៥-០៩-២២- ឈាវ សុផាត ប្រែសម្រួលពី៖ https://dailytimes.com.pk/996825/parliamentarians-need-to-play-role-to-address-climate-change-impacts-na-speaker/