លោកបណ្ឌិត Narayan Khadka រដ្ឋមន្រ្តីក្រសួងការបរទេសនេប៉ាល់ និងលោក Li Zhanshu ប្រធានសភាប្រជាជនចិន

​​កាលពីថ្ងៃអង្គារ ទី១៣ ខែកញ្ញា ឆ្នាំ២០២២ លោក Li Zhanshu ប្រធានគណៈកម្មាធិការអចិន្រ្តៃយ៍នៃសភាប្រជាជនចិន(NPC) ដែលកំពុងបំពេញទស្សកិច្ចនៅក្នុងប្រទេស​នេប៉ាល់ នៅតែបន្តមមាញឹកក្នុងជំនួបនយោបាយ នៅក្នុងរដ្ឋធានីកដ្ឋមណ្ឌូ។ នាពេលរសៀលថ្ងៃដដែល លោក Li បានចួបសន្ទនាជាមួយ លោកបណ្ឌិត Narayan Khadka រដ្ឋមន្រ្តីក្រសួងការបរទេសនេប៉ាល់។ នាពេលព្រឹក លោក Li បានចួប សន្ទនាជាមួយលោក KP Oli ប្រធានបក្សកុម្មុយនិស្ត-ម៉ាកឡេនី (CPN-UML) និងលោក Pushpa Kamal Dahal Prachanda  ប្រធានមជ្ឈមណ្ឌលលទ្ធិម៉ៅនិយម។

​លោក Li គ្រោងនឹងចូលចួប លោកស្រី Bidya Devi Bhandari ប្រធានាធិបតីនេប៉ាល់ នៅឯវិមាន ប្រធានាធិបតី Rashtrapati Bhavan Sheetal Niwas នារសៀលថ្ងៃ​ពុធនេះ។ កាលពីថ្ងៃចន្ទ កន្លងមក សភានេប៉ាល់បាន និងសភាប្រជាជនចិន បានចុះហត្ថលេខាលើអនុស្សរណៈនៃការយោគយល់គ្នា ៦ចំណុច(MoU)។ លោក Agni Prasad Sapkota ប្រធានសភានេប៉ាល់ និងលោក Li បានចុះហត្ថលេខាលើកិច្ចព្រមព្រៀងខាងលើ នៅឯពិធីមួយដែលធ្វើឡើងនៅក្នុងវិមានសភា New Baneshwar។ ភាគីទាំងពីរនឹង ផ្លាស់ប្តូរព័ត៌មានសភា ការត្រួតពិនិត្យ និងការអនុវត្តអភិបាលកិច្ចគ្នាទៅវិញទៅមក។ អនុស្សរណៈខាងលើក៏បានលើកឡើងផងដែរពីគំនិតផ្តួចផ្តើមខ្សែក្រវាត់ និងផ្លូវ ដែលជា​គម្រោងប្រកបដោយមហិច្ឆតាមួយ របស់សាធារណរដ្ឋប្រជាមានិតចិន។

អនុលោមតាមកិច្ចព្រមព្រៀងភាគីដដែល ទាំងពីរបានព្រមព្រៀងគ្នាពង្រឹងកិច្ចសហប្រតិបត្តិការក្រោមក្របខ័ណ្ឌអង្គការសភាតំបន់ និងអន្តរជាតិ រួមទាំង សហភាព​អន្តរ​សភា​(IPU)  និងកិច្ចការដែលជាប្រយោជន៍រួម។ គួរបញ្ជាក់ផងដែរថា លោក Li បានអញ្ជើញដល់ព្រលានយន្តហោះអន្តរជាតិ Tribhu van ក្នុងទីក្រុងកដ្ឋមណ្ឌូ កាលពីថ្ងៃចន្ទដើម​សប្តាហ៍ ដោយបានដឹកនាំគណៈប្រតិភូដែលមានសមាជិកប្រមាណ ១០០នាក់។ លោក Li កំពុងបំពេញទស្សនកិច្ចផ្លូវការរយៈពេល ៤ថ្ងៃ នៅក្នុងប្រទេសនេប៉ាល់ តបតាមការ​អញ្ជើញរបស់លោក Agni Prasad Sapkota ប្រធានសភានេប៉ាល់។ លោកប្រធានសភាប្រជាជនចិនរូបនេះនឹងធ្វើមាតុភូមិនិវត្តន៍ត្រឡប់មកកាន់មាតុប្រទេសវិញ នៅថ្ងៃព្រហស្បតិ៍ ទី១៥ ខែកញ្ញា  ឆ្នាំ២០២២ តាមជើងយន្តហោះពិសេសមួយ៕

http://ព័ត៌មានសភាអន្តរជាតិ ១៤-០៩-២២- ឈាវ សុផាត ប្រែសម្រួលពី៖ https://english.khabarhub.com/2022/13/272518/