លោកស្រី Sahiba Gafarov ប្រធានសភានៃសាធារណរដ្ឋអាស៊ែបៃហ្សង់

រដ្ឋធានីតាស្កិន៖ សារព័ត៌មានអាស៊ែបៃហ្សង់ Azernews បានរាយការណ៍ថា លោកស្រី  Sahiba Gafarov​ ប្រធានសភា (Milli Majlis)នៃសាធារណរដ្ឋអាស៊ែបៃហ្សង់ កំពុងតែបំពេញទស្សនកិច្ចការងារនៅក្នុងរដ្ឋធានីតាស្កិននៃសាធារណរដ្ឋអ៊ូសបេគីស្ថាន ចាប់ពីថ្ងៃទី០៧ ខែកញ្ញា ឆ្នាំ២០២២ ដើម្បីចូលរួមក្នុងកិច្ចប្រជុំកំពូលនៃបណ្តា​ប្រធានសភាជាស្រ្តីលើកទី១៤(14SWSP)។

​គេរំពឹងថា លោកស្រីប្រធានសភាអាស៊ែបៃហ្សង់រូបនេះនឹងឡើងថ្លែងសុន្ទរកថាស្តីពី “ការលុប​បំបាត់​ហានិភ័យចំពោះការស្ទុះងើបឡើងវិញជាសកល បន្ទាប់ពីជំងឺរាតត្បាត​ជាសក​លកូវីដ-១៩” នៅឯកិច្ចប្រជុំដំបូងនៃកិច្ចប្រជុំកំពូល 14SWSP។ ក្រោយបញ្ចប់កិច្ចប្រជុំកំពូលខាងលើនេះ សេចក្តីប្រកាសទីក្រុង​ តាស្កិនមួយនឹងត្រូវបានអនុម័ត​នៅពេលបញ្ចប់កិច្ចប្រជុំតុមូល ជាមួយនឹងអ្នកចូលរួមទាំងអស់ដែលជា  មេដឹកនាំសភានៃបណ្តាប្រទេសនានា។ ជាផ្នែកមួយនៃដំណើរទស្សនកិច្ច គេរំពឹងថា លោកស្រី Gafarov នឹងចួបជាមួយមេដឹកនាំសភាមួយចំនួន មកពីប្រទេសដែលចូលរួមក្នុងកិច្ចប្រជុំកំពូល 14SWSP។ ដំណើរទស្សនកិច្ចការងាររបស់លោកស្រី  Sahiba  Gafarov នឹងបន្តរហូតដល់ថ្ងៃទី១០ ខែកញ្ញា ឆ្នាំ២០២២។

​កិច្ចប្រជុំកំពូលនៃបណ្តាប្រធានសភាជាស្រ្តីលើកទី១៤(14SWSP) កោះប្រជុំដោយសហភាពអន្តរសភា(IPU) ក្នុងកិច្ចសហប្រតិបត្តិការយ៉ាងជិតស្និទ្ធជាមួយសភាជាន់ខ្ពស់ (Oliy Majlis) អ៊ូសបេគីស្ថាន បានធ្វើឡើងចាប់ពីថ្ងៃព្រហស្បតិ៍ ទី០៨ ដល់ថ្ងៃសុក្រ ទី០៩ ខែកញ្ញា ឆ្នាំ២០២២។ កិច្ចប្រជុំកំពូលមួយនេះ  ផ្តល់ឱ្យស្រ្តីនៅក្នុងមុខតំណែងកំពូល​នៃការធ្វើ​សេចក្តីសម្រេចចិត្តនៃស្ថាប័ននីតិប្បញ្ញត្តិនូវវេទិកាមួយ ក្នុងការផ្លាស់ប្តូរទស្សនៈ និងបទពិសោធគ្នាដែលជារបៀបវាៈនៃផលប្រយោជន៍ជាតិ និងអន្តរជាតិរបស់ខ្លួន។

គួរបញ្ជាក់ផងដែរថា កិច្ចប្រជុំកំពូលខាងលើនេះ គឺជាការបើកចំហដល់ប្រធានសភាជាស្រ្តីនៃ ​បណ្តាប្រទេសនានា ក៏ដូចជា ប្រធានសភាជាស្រ្តីថ្នាក់តំបន់ និងអន្តរជាតិ ដែលជា​សមាជិកបម្រុងរបស់សហភាពអន្តរសភា(IPU)។ ជាមួយគ្នានោះ ភ្ញៀវសម្រាំងពិសេស ក៏ត្រូវបានអញ្ជើញឱ្យចូលរួមក្នុងកិច្ចប្រជុំកំពូលនៃបណ្តាប្រធានសភាជាស្រ្តីលើកទី១៤(14SWSP) ផងដែរ៕

http://ព័ត៌មានសភាអន្តរជាតិ ០៩-០៩-២២- ឈាវ សុផាត ប្រែសម្រួលពី៖ https://www.azernews.az/nation/199008.html