លោក Kim Jin-pyo ប្រធានរដ្ឋសភាកូរ៉េខាងត្បូង (មុខគេ) ថ្លែងក្នុងកិច្ចប្រជុំជាមួយគណៈប្រតិភូសភា សហរដ្ឋអាមេរិក នាថ្ងៃទី០៥ ខែកញ្ញា ឆ្នាំ២០២២ (Yonhap)

​រដ្ឋធានីសេអ៊ូល៖ កាលពីថ្ងៃចន្ទ ទី០៥ ខែសីហា ឆ្នាំ២០២២ ខុទ្ទកាល័យប្រធានរដ្ឋសភានៃ​សាធារណរដ្ឋកូរ៉េ (កូរ៉េខាងត្បូង)​ បានឱ្យដឹងថា លោក Kim Jin-pyo​ ប្រធានរដ្ឋសភាកូរ៉េខាងត្បូងបាន ជួបពិភាក្សាការងារជាមួយគណៈប្រតិភូសភាសហរដ្ឋអាមេរិក​ ហើយបានលើកឡើងពីការព្រួយ​បារម្ភរបស់ កូរ៉េខាងត្បូងលើច្បាប់ស្តីពី ការកាត់បន្ថយអតិផរណារបស់សហរដ្ឋអាមេរិក (Inflation Reduction Act, IRA)។ ក្នុងជំនួបជាមួយ​គណៈប្រតិភូសភាសហរដ្ឋអាមេរិក ដែលដឹកនាំដោយលោកស្រី Stephanie Murphy សមាជិកាសភាតំណាងសហរដ្ឋអាមេរិកនោះ លោក Kim បានអំពាវនាវឱ្យសភាសហរដ្ឋអាមេរិក ធ្វើ វិសោធនកម្មច្បាប់ស្តីពី ការកាត់បន្ថយអតិផរណានេះឡើងវិញ ដើម្បីការពារកុំឱ្យមានហានិភ័យ​កើតឡើង​ដល់ក្រុមហ៊ុនផលិតរថយន្តរបស់កូរ៉េខាងត្បូង។ នេះបើយោងតាមកិច្ច​ព្រមព្រៀងពាណិជ្ជកម្មសេរីរវាងប្រទេសទាំងពីរ។

​លោក Kim ក៏បានថ្លែងផងដែរថា ផែនការវិនិយោគរបស់កូរ៉េខាងត្បូងក្នុងសហរដ្ឋអាមេរិកអាចត្រូវបានពន្យារពេល ប្រសិនបើក្រុមហ៊ុនផលិត​រថយ​ន្តកូរ៉េខាងត្បូង ដូចជា ក្រុមហ៊ុន Hyundai Motor Co ទទួលរងការធ្លាក់ចុះតម្លៃភាគហ៊ុនរបស់ខ្លួន ដោយសារច្បាប់ស្តីពី ការកាត់បន្ថយ​អតិផរណានេះ។

​ច្បាប់ស្តីពី ការកាត់បន្ថយអតិផរណានេះ ត្រូវបានចុះហត្ថលេខាដោយលោក Joe Biden ប្រធានាធិបតី សហរដ្ឋអាមេរិក កាលពីខែសីហា ឆ្នាំ២០២២ សម្រាប់ផ្តល់ឥណទានពន្ធដល់អ្នកទិញរថយន្តប្រើអគ្គិសនីផលិតតែក្នុងតំបន់អាមេរិកខាងជើងប៉ុណ្ណោះ  ដែលបង្កឱ្យមានការព្រួយ​បារម្ភថា ក្រុមហ៊ុនផលិតរថយន្ត នៅកូរ៉េខាងត្បូង​ នឹងបាត់បង់កម្លាំងពលកម្មក្នុងទីផ្សាសហរដ្ឋអារមរិក ខណៈដែលពួកគេផលិតរថយន្តប្រើអគ្គិសនី​នៅរោងចក្រក្នុងស្រុកសម្រាប់ការនាំចេញ។

ខុទ្ទកាល័យលោក Kim បានឱ្យដឹងថា ប្រទេសទាំងពីរបានយល់ស្របលើការគាំទ្រសេចក្តីសម្រេច របស់សភា ក្នុងអំឡុងពេលនៃការប្រារព្ធខួប​លើកទី​៧០ នៃទំនាក់ទំនងមិត្តភាពរវាងរដ្ឋាភិបាល​ទីក្រុង សេអូល និងរដ្ឋាភិបាលទីក្រុងវ៉ាស៊ីនតោន។ លោកស្រី Murphy ត្រូវបានគេដកស្រង់​សំដីដែលបានថ្លែងថា សម្ព័ន្ធមិត្តរវាងប្រទេសទាំងពីរ គឺជាសម្ព័ន្ធមិត្តមួយក្នុងចំណោមសម្ព័ន្ធមិត្តដ៏មានឥទ្ធិពលបំផុតក្នុងប្រវត្តិសាស្ត្រ ហើយប្រទេស​ទាំងពីរគួរតែធ្វើការងាររួមគ្នាដើម្បីពង្រឹងកិច្ចសហប្រតិបត្តិការលើវិស័យសន្តិសុខ វិនិយោគ និងវិស័យផ្សេងៗទៀត៕

http://ព័ត៌មានសភាអន្តរជាតិ ០៦-០៩-២២- កែវ ធាវីប្រែសម្រួលពី៖ https://en.yna.co.kr/view/AEN20220905008300315