លោកស្រី Roberta Metsola ប្រធានសភាអឺរ៉ុប

​វិបត្តិស្បៀងអាហារនៅទ្វីបអាហ្រ្វិកអាចនាំឱ្យមាន “ចលនាទ្រង់ទ្រាយធំ” នៃជនទេសន្តរប្រវេសន៍មកកាន់សហភាពអឺរ៉ុប។ លោកស្រី Roberta Metsola ប្រធានសភាអឺរ៉ុបបានថ្លែងប្រាប់សារព័ត៌មាន ​Lusa ដែលជាដៃគូរបស់ប្រព័ន្ធផ្សព្វផ្សាយព័ត៌មាន EURACTIV បែបនេះ នៅក្នុងបទ​សម្ភាសមួយ មុនពេលលោកស្រី​ធ្វើដំណើរទស្សនកិច្ចរយៈពេល ២ថ្ងៃ ទៅកាន់ប្រទេសព័រទុយហ្គាល់។​ លោកស្រី Metsola បានថ្លែងបន្ថែមថា អស្ថិរភាពនយោបាយនៅទូទាំងប្លុក ក៏កំពុងមានការកើនឡើងផងដែរ ដោយសារតែវោហាសាស្រ្តប្រជានិយមជន(populist rhetoric)។

​លោកស្រី​ប្រធានសភាអឺរ៉ុបរូបនេះបានថ្លែងបន្តថា “ក្តីព្រួយបាម្ភជាយូរមកហើយរបស់លោកស្រីនោះ គឺការប្រឈមនឹងការផ្គត់ផ្គង់ដែលយើងមាន​ក្នុងការដឹកជញ្ជូន គ្រាប់ធញ្ញជាតិ ស្បៀងអាហារ ទំនិញចាំបាច់ប្រើប្រាស់ប្រចាំថ្ងៃ និងជី ជាដើម មកកាន់បណ្តាប្រទេសក្នុងទ្វីបអាហ្រ្វិកនឹងបន្តក្លាយជា​បញ្ហាប្រឈមដ៏ធំមួយ”។ នេះមានន័យថា វាមិនមែនគ្រាន់តែជាវិបត្តិថាមពលប៉ុណ្ណោះទេ ប៉ុន្តែក៏ជាវិបត្តិអត់ឃ្លាន វិបត្តិស្បៀងអាហារផងដែរ នៅក្នុងទ្វីបអាហ្រ្វិក។ លោកស្រីបានទាញហេតុផលថា សហភាពអឺរ៉ុបចាំបាច់ត្រូវតែ “ត្រៀមរៀបចំសម្រាប់ការទទួលយកការធ្វើដំណើរទ្រង់ទ្រាយធំ​របស់ប្រជាជនអាហ្រ្វិក   មកកាន់សហភាពអឺរ៉ុប”។

​យើងក៏ត្រូវយល់ដឹង និងពន្យល់ដល់ប្រជាជន និងចំនួនប្រជាជនរបស់យើងថា យើងកំពុងចូលក្នុងអំឡុងពេលនៃភាពមិនអំណោយផល​ដ៏ធ្ងន់ធ្ងរមួយ ប៉ុន្តែវាមិនមែនតែយើងទេ វាស្ថិតក្នុងកម្រិតសកល   ទៅហើយ។ លោកស្រី Metsola បានសង្កត់ធ្ងន់បែបនេះ​ ដោយរំលឹកដល់វិបត្តិជាច្រើន ដូចជា វិបត្តិថាមពល និងវិបត្តិនៃការឡើងថ្លៃដែលសហភាពអឺរ៉ុបកំពុងតែប្រឈមផងដែរ។

សហភាពអឺរ៉ុបបានទទួលយកប្រជាជនអ៊ុយក្រែនរាប់ម៉ឺននាក់ តាមរយៈការការពារបណ្តោះអាសន្ន ហើយក៏មានអ្នកខ្លះបានត្រឡប់ទៅកាន់ ប្រទេសរបស់ពួកគេវិញហើយដែរ។ ប៉ុន្តែយ៉ាងណាក៏ដោយ “យើងមិនទាន់មានល្បឿនលឿនគ្រប់គ្រាន់ក្នុងការដោះស្រាយអ្វី ដែលនឹងកើត​មានឡើងពិតប្រាកដក្នុងពេល ឆាប់ៗនេះ ហើយរដូវរងាដ៏អាក្រក់នឹងវាយប្រហារមនុស្សគ្រប់គ្នាពាក់ព័ន្ធនឹងការកើនឡើងនៃវិបត្តិ”។ ដូច្នឹង យើងចាំបាច់ត្រូវចៀសវាងនូវ “វោហាសាស្រ្តប្រជានិយមជនដែលនឹងធ្វើឱ្យអស្ថិរភាពនយោបាយអាចនឹងកើតមានឡើងភ្លាមៗ”៕

http://ព័ត៌មានសភាអន្តរជាតិ ០២-០៩-២២- ឈាវ សុផាត ប្រែសម្រួលពី៖ https://www.euractiv.com/section/politics/short_news/eu-parliament-chief-warns-of-mass-migration-due-to-africa-food-crisis/,