លោក Li Zhanshu ប្រធានគណៈកម្មាធិការអចិន្រ្តៃយ៍នៃសភាប្រជាជនចិន(NPC)

រដ្ឋធានីប៉េកាំង​​​​​៖ លោក Li Zhanshu សមាជិកគណៈកម្មាធិការអចិន្រ្តៃយ៍នៃការិយាល័យនយោ- បាយនៃគណៈកម្មាធិការមជ្ឈិមបក្សកុម្មុយនិស្តចិន និងជាប្រធានគណៈកម្មាធិការអចិន្រ្តៃយ៍នៃសភាប្រជាជនចិន(NPC) បានទទួលចួបជាមួយលោក Andrey Denisov ឯកអគ្គរដ្ឋទូតសហព័ន្ធរុស្ស៊ី​ប្រចាំសាធា រណរដ្ឋប្រជាមានិតចិន ដែលត្រូវចប់អាណត្តិ។ ក្នុងអំឡុងពេលនៃជំនួបនោះ លោក Li បានវាយតម្លៃខ្ពស់ចំពោះការរួមចំណែកដ៏សំខាន់​របស់លោក Denisov សម្រាប់មិត្តភាពចិន-រុស្ស៊ី។

លោក Li បានថ្លែងថា ក្រោមមគ្គុទេសក៍ដឹកនាំរបស់ប្រមុខរដ្ឋនៃប្រទេសទាំងពីរ​ ចំណងទាក់ទង ចិន-រុស្ស៊ីតែងតែរក្សាបាននូវទិសដៅមួយដ៏​ត្រឹមត្រូវ។ ភាគីទាំងពីរបានគាំទ្រគ្នាទៅវិញទៅមកយ៉ាងរឹងមាំ បានពង្រឹងនូវជំនឿទុកចិត្តនយោបាយទៅវិញទៅមក បានពង្រឹងនូវកិច្ចសម្រប​សម្រួលជាយុទ្ធសាស្រ្ត និង កិច្ចសហប្រតិបត្តិការជាក់ស្តែងយ៉ាងស៊ីជម្រៅ។ លោក Li បានថ្លែងបន្ថែមថា ភាគីទាំងពីរបានបង្ហាញពីអត្ថន័យដ៏​សំបូរបែបនៃភាពជាដៃគូកិច្ចសហប្រតិបត្តិការយុទ្ធសាស្រ្តគ្រប់ជ្រុងជ្រោយ ក្នុងយុគសម័យថ្មី ជាមួយនឹងសកម្មភាពជាក់ស្តែង ដែលជាការសង្កត់ធ្ងន់​បន្ថែមពីតម្លៃដ៏ពិសេសនៃចំណងទាក់ទងរបស់ប្រទេសទាំងពីរ។

លោក Li បានថ្លែងបន្តថា សភាប្រជាជនចិនមានឆន្ទៈក្នុងការថែរក្សានូវការផ្លាស់ប្តូរគ្នាទៅវិញទៅមកនូវមិត្តភាពដ៏ជិតស្និទ្ធជាមួយសភា​នៃ​សហព័ន្ធរុស្ស៊ី ដោយផ្តល់នូវការធានាផ្លូវច្បាប់មួយដ៏រឹងមាំដើម្បីអភិវឌ្ឍន៍ចំណងទាក់ទងទ្វេភាគី និងកិច្ចសហប្រតិបត្តិការនៅក្នុងវិស័យនានា។ លោក Li បានវាយតម្លៃខ្ពស់ចំពោះការរួមចំណែកដ៏សំខាន់របស់លោក  Denisov  ចំពោះមិត្តភាពចិន-រុស្ស៊ី  និងសង្ឃឹមថា​ លោក Deni sov នឹងបន្តធ្វើកិច្ចខិតខំប្រឹងប្រែងឥតស្រាកស្រាន្ត ដើម្បីលើកកម្ពស់ការផ្លាស់ប្តូរទៅវិញទៅមក និងកិច្ចសហប្រតិបត្តិការរវាងប្រទេសទាំងពីរ។

ជាការឆ្លើយតប សម្រាប់ភាគីរុស្ស៊ី លោកឯកអគ្គរដ្ឋទូតសហព័ន្ធរុស្ស៊ីប្រចាំប្រទេសចិនដែលត្រូវចប់អាណត្តិ  Andrey  Denisov  បានថ្លែងថា  លោកមានឆន្ទៈក្នុងការបន្តជំរុញមិត្តភាពរវាងប្រទេសទាំងពីរ៕

http://ព័ត៌មានសភាអន្តរជាតិ ០២-០៩-២២- ឈាវ សុផាត ប្រែសម្រួលពី៖ http://english.news.cn/20220831/6d7a5e3648c1413f95230a1d9d9acfba/c.html