លោក Kishida Fumio នាយករដ្ឋមន្ត្រីជប៉ុន

លោក Kishida Fumio នាយករដ្ឋមន្ត្រីជប៉ុន បានថ្លែងថា លោកនឹងពន្យល់ក្នុងសភា ថាតើហេតុអ្វី បានជារាជរដ្ឋាភិបាលជប៉ុន គ្រោងរៀបចំពិធី​បុណ្យសពរបស់អតីតនាយករដ្ឋមន្ត្រី Abe Shinzo។ ការថ្លែងរបស់លោក Kishida បែបនេះ ធ្វើឡើង បន្ទាប់ពីសមាជិកសភាគណបក្ស​ប្រឆាំងជាច្រើនរូបបានទាមទារឱ្យរាជរដ្ឋាភិបាលរបស់លោកផ្សព្វផ្សាយអំពីតម្លៃនៃសន្តិសុខសម្រាប់ព្រឹត្តិការណ៍នេះ។

លោក Kishida បានធ្វើសន្និសីទសារព័ត៌មានមួយតែម្នាក់ឯងលើកដំបូង ចាប់តាំងពីលោកបានជាសះស្បើយពីជំងឺកូវីដ-១៩ មក។ ថ្លែងបា្រប់អ្នក​សារព័ត៌មាន លោក Kishida បានសន្យាថា នឹងជម្រាបជូនសាធារណជនអំពី សារៈសំខាន់នៃពិធីបុណ្យសពនៅខែកញ្ញា ឆ្នាំ២០២២ ខាងមុខនេះ។

លោក Kishida បានថ្លែងបន្តទៀតថា «ដោយសារនាយករដ្ឋមន្ត្រីជាអ្នកសម្រេចរៀបចំពិធីបុណ្យសពជាតិនេះ ខ្ញុំត្រូវទទួលខុសត្រូវចំពោះការរិះគន់​ពី​មជ្ឈដ្ឋាននានា និងឆ្លើយតបនឹងការរិះគន់នេះដោយផ្ទាល់។ យើងនឹងខិតខំព្យាយាមឱ្យអស់ពីសមត្ថភាពដើម្បីផ្តល់ការពន្យល់លម្អិតនូវ​អ្វីដែល​រដ្ឋបាលរបស់ លោកបានសន្យាធ្វើ ចាប់តាំងពីចូលកាន់តំណែងមក»។

លោក Kishida បានបន្តទៀតថា លោក Abe ជាមនុស្សមានឥទ្ធិពល មិនគ្រាន់តែក្នុងប្រទេសជប៉ុនប៉ុណ្ណោះទេ ប៉ុន្តែថែមទាំងមានឥទ្ធិពលនៅ​ជុំវិញ​ពិភពលោកផងដែរ។ លោក Kishida បានថ្លែងទៀតថា ពិធីបុណ្យសពនេះ នឹងផ្តល់ឱកាសសម្រាប់ថ្នាក់ដឹកនាំអន្តរជាតិសម្តែងនូវសមានទុក្ខ​របស់ខ្លួន។ លោក Kishida ក៏បានថ្លែងផងដែរថា ពិធីបុណ្យសពនេះ នឹងបង្ហាញថា​ រាជរដ្ឋាភិបាលជប៉ុន មិនអត់ឱនឱ្យបានឡើយនូវរាល់​សកម្មភាព​រំលោភបំពានបែបនេះ។

អតីតមេដឹកនាំជប៉ុនរូបនេះ ត្រូវបានគេធ្វើឃាតក្នុងអំឡុងពេលយុទ្ធនាការឃោសនាបោះឆ្នោត ជ្រើសតាំងសមាជិកសភាជាន់ខ្ពស់ជប៉ុន កាលពី​ថ្ងៃទី០៨ ខែកក្កដា ឆ្នាំ២០២២។ បុរសជាជនសង្ស័យក្នុងករណីឃាតកម្មនេះ បាននិយាយប្រាប់នគរបាលថា ខ្លួនជឿជាក់ថា លោក Abe បានជាប់ពាក់ព័ន្ធនឹងការបង្រួបបង្រួមព្រះវិហារសាសនាគ្រិស្តមួយកន្លែង។ បុរសជាជនសង្ស័យរូបនេះបានអះអាងថា ក្រុមនេះបានធ្វើឱ្យគ្រួសារ​របស់លោកក្ស័យធន៕

http://ព័ត៌មានសភាអន្តរជាតិ ០១-០៩-២២- កែវ ធាវីប្រែសម្រួលពី៖ https://www3.nhk.or.jp/nhkworld/en/news/20220831_30/