រូបទង់ជាតិចក្រភពអង់គ្លេស និងសាធារណរដ្ឋឥស្លាមប៉ាគីស្ថាន

គណៈកម្មាធិការអភិវឌ្ឍន៍អន្តរជាតិនៃសភាចក្រភពអង់គ្លេស(IDC) បានហៅជំនួយហិរញ្ញវត្ថុរបស់អង់គ្លេសជួយដល់គ្រោះមហន្តរាយ ទឹកជំនន់នៅក្នុងសាធារណរដ្ឋឥស្លាមប៉ាគីស្ថានថា “ជារឿងគួរឱ្យអស់សំណើច”។ លោកស្រី Sarah Champion ប្រធានគណៈកម្មាធិការ IDC បានសរសេរលិខិតទៅកាន់   លោកស្រី Liz Truss រដ្ឋមន្រ្តីក្រសួងការបរទេសចក្រភពអង់គ្លេសមានខ្លឹមសារថា ជំនួយហិរញ្ញវត្ថុជាទឹក ប្រាក់ ១.៥លានផោន ដែលប្រកាសចេញកាលពីសប្តាហ៍មុនដល់ប្រទេសប៉ាគីស្ថាន ដែលទឹកប្រាក់នេះស្មើនឹង៥សេនតែប៉ុណ្ណោះ សម្រាប់ជនរងគ្រោះ​ទឹកជំនន់ ១រូប ខណៈដែលទឹកជំនន់បានបំផ្លិចបំផ្លាញជិត ៧០០,០០០ខ្នងផ្ទះ នៅក្នុងប្រទេសប៉ាគីស្ថាន។

លោកស្រី Champion បានថ្លែងថា លោកស្រីមានអារម្មណ៍ថា មានភាពអាម៉ាស់តាមរយៈទឹកប្រាក់ជំនួយហិរញ្ញវត្ថុដ៏តិចតួចមិនសមល្មមនេះ និងបានថ្លែងបន្ថែមថា ចក្រភពអង់គ្លេសកំពុងតែមិនផ្តល់ជំនួយ អ្វីសោះ ក្នុងពេលដែលអង់គ្លេសកំពុងតែកាត់ចេញទឹកប្រាក់ពីជំនួយដែលមាន​ស្រាប់ទៅកាន់ប៉ាគីស្ថាន។ វាការឆ្លើយតបដ៏គួរឱ្យអស់សំណើចរបស់រាជរដ្ឋាភិបាលអង់គ្លេស ចំពោះគ្រោះមហន្តរាយមនុស្សធម៌មួយនេះ​មានន័យស្មើនឹងមិនបានជួយអ្វីសោះ។

លោកស្រី Champion បានសង្កត់ធ្ងន់ថា ការឆ្លើយតបរបស់អង់គ្លេសចំពោះទឹកជំនន់នេះ បានឆ្លុះ បញ្ចាំងពីការប្រកាន់ខ្ជាប់នូវគោលនយោបាយ​ព្រងើយកន្តើយរបស់លោកនាយករដ្ឋមន្រ្តី Boris Johnsonនិងរាជរដ្ឋាភិបាលរបស់គាត់ចំពោះប៉ាគីស្ថាន ដែលបានទម្លាក់លេខរៀងពីលំដាប់ទី១ មកទី៧ ក្នុងបញ្ជី អ្នកទទួលជំនួយរបស់អង់គ្លេសចាប់តាំងពីឆ្នាំ២០១៩មក។ លោកស្រីក៏បានស្នើឱ្យលោកស្រី Truss ចេញសេចក្តីថ្លែងការណ៍​ជាបន្ទាន់មួយ​អំពីភយន្តរាយនេះ។ អ្នកនាំពាក្យក្រសួងការបរទេសអង់គ្លេសបានអះអាងថា បានទទួលលិខិតរបស់លោកស្រី Champion រួចហើយ ដូច្នឹងក្រសួងនឹងចេញសេចក្តីឆ្លើយតបមួយ។

លោក Johnson បានបង្ហាញក្តីអាណិតអាសូរចំពោះប្រជាជនប៉ាគីស្ថាន និងបានហៅភយន្តរាយនេះថាជា “ទុក្ខសោកដ៏ក្រៀមក្រំបំផុត”មួយ។ គួរបញ្ជាក់ផងដែរថា កន្លងមកប៉ាគីស្ថានគឺជាអ្នកទទួលជំនួយទ្វេភាគីដ៏ធំបំផុតមួយនៃកម្មវិធីជំនួយអភិវឌ្ឍន៍ផ្លូវការរបស់អង់គ្លេសក្នុងរវាង​ឆ្នាំ២០១៥  និងឆ្នាំ២០១៩៕

http://ព័ត៌មានសភាអន្តរជាតិ ០១-០៩-២២- ឈាវ សុផាត ប្រែសម្រួលពី៖ https://propakistani.pk/2022/08/31/british-parliament-calls-uks-flood-donation-for-pakistan-laughable/.