លោកបណ្ឌិត Sidie Tunis ប្រធានសភាសហគមន៍សេដ្ឋកិច្ចនៃបណ្តារដ្ឋអាហ្រ្វិកខាងលិច(ECOWAS)

កាលពីថ្ងៃពុធ ទី១៧ ខែសីហា ឆ្នាំ២០២២ សភាសហគមន៍សេដ្ឋកិច្ចនៃបណ្តារដ្ឋអាហ្រ្វិកខាងលិច(ECOWAS) បានធ្វើការថ្កោលទោសដោយប្រើពាក្យពេចន៍ខ្លាំងៗ ទៅលើសកម្មភាពនៃអំពើហិង្សានៅក្នុងសាធារណរដ្ឋសៀរ៉ាឡេអូន ដែលនាំទៅដល់ការស្លាប់បាត់បង់ជីវិត    និងការបំផ្លិចបំផ្លាញទ្រព្យសម្បត្តិ។

លោកបណ្ឌិត Sidie Tunis ប្រធានសភា ECOWAS បានថ្លែងឱ្យដឹងបែបនេះនៅក្នុងទីក្រុង Banju ប្រទេសហ្គំប៊ី នៅឯកិច្ចប្រជុំរបស់គណៈកម្មាធិការរួមកិច្ចការនយោបាយ សន្តិភាព សន្តិសុខ និងយន្តការត្រួតពិនិត្យមើលឡើងវិញអាហ្រ្វិក(APRM): កិច្ចការនីតិកម្ម និងសិទ្ធិមនុស្ស/កិច្ចការសង្គម យែនឌ័រ និងការផ្តល់អំណាចដល់ស្រ្តី។ តំណាងដោយលោកស្រី  Adja Satu Camara Pinto អនុប្រធានសភាទី៤  លោកបណ្ឌិត Tunis បានស្នើដល់ភាគីពាក់ព័ន្ធទាំងអស់ត្រូវប្រកាន់ខ្ជាប់នូវនីតិរដ្ឋ ដែលជាមាគ៌ាដ៏ល្អបំផុតសម្រាប់ ដោះស្រាយស្ថានភាពលំបាក។ លោកប្រធានសភារូបនេះ បានកត់សម្គាល់ថា ប្រជាធិបតេយ្យជាច្រើននៅ ទូទាំងសកលលោកកំពុងតែឆ្លងកាត់ស្ថានភាពលំបាកដោយសារតែខ្វះទំនុកចិត្ត    និងការទទួលខុសត្រូវ។

មានភាពចាំបាច់ក្នុងការមានឆន្ទៈនយោបាយដើម្បីពង្រឹងស្ថាប័នជាពិសេស នៅក្នុងទ្វីបអាហ្រ្វិក ដើម្បីដោះស្រាយបញ្ហាប្រឈម។ លោក Tunis ក៏បានកោតសរសើរផងដែរដល់ប្រទេសសេណេហ្គាល់ ដែលបានរៀបចំការបោះឆ្នោតជ្រើសតាំងសមាជិកសភាប្រកបដោយសុខសន្តិភាព កាលពីថ្ងៃទី៣១ ខែ   កក្កដា ឆ្នាំ២០២២។ លោកបានធានាថា សភា      ECOWAS  នឹងធ្វើការពួតដៃគ្នាជាមួយសភានីតិកាលថ្មី ដើម្បី ផលប្រយោជន៍តំបន់អាហ្រ្វិកខាងលិច។

ជាមួយគ្នានោះផងដែរ លោក Fabakary Tombong Jatta ប្រធានសភាហ្គំប៊ីបានថ្លែងថា មានភាពចាំបាច់សម្រាប់អន្តរាគមន៍បុរេសកម្ម ដើម្បីទប់ស្កាត់អសន្តិសុខនៅក្នុង​តំបន់ ក្នុងគ្រាដែលសន្តិភាព និងសន្តិសុខ គឺពិតជាសំខាន់ខ្លាំងណាស់ សម្រាប់ការអភិវឌ្ឍ។ គួរបញ្ជាក់ផងដែរថា ពាក្យស្លោកនៃកិច្ចប្រជុំ ខាងលើដែលធ្វើឡើងរយៈពេល ៥ថ្ងៃ គឺ “សហគមន៍ជាប់ទាក់ទិននឹងសន្តិភាព សន្តិសុខ ប្រជាធិបតេយ្យ និងអភិបាលកិច្ចល្អ: ការប្រឈមក្នុងការអនុវត្តរបស់ខ្លួន និងការត្រួតពិនិត្យលើតួនាទីរបស់សភា ECOWAS”៕

http://ព័ត៌មានសភាអន្តរជាតិ ១៨-០៨-២២- ឈាវ សុផាត ប្រែសម្រួលពី៖ https://radionigeria.gov.ng/2022/08/17/ecowas-parliament-condemns-violence-in-sierra-leone/