សភាសហភាពអឺរ៉ុបស៊ើបអង្កេតលើសំណុំរឿងចារកម្មដែលមិនអាចអត់ឱនឱ្យបានលើសមាជិកសភាប្រទេសក្រិក

រដ្ឋធានីព្រុចសែល៖ អ្នកនាំពាក្យប្រធានសភាសហភាពអឺរ៉ុប បានថ្លែងអំពីរឿងអាស្រូវចារកម្ម              នៅពេលថ្មីៗនេះ របស់ក្រុមសមាជិកសភាសហភាពអឺរ៉ុបថា សភាសហភាពអឺរ៉ុប នឹងសហការជាមួយអាជ្ញាធរនៃសាធារណរដ្ឋក្រិក ដើម្បីស៊ើបអង្កេតលើចារកម្មរដ្ឋ ដែលមិនអាចលើកលែង និងអត់ឱនឱ្យបាន។ ប្រធានាធិបតីក្រិក បានអំពាវនាវឱ្យស៊ើបអង្កេតលើការថតសំឡេង ដោយភ្នាក់ងារស៊ើបការសម្ងាត់រដ្ឋ របស់លោក Nikos Androulakis ប្រធានគណបក្ស PASOK សង្គមនិយមក្រិក និងសមាជិក​សភាសហភាពអឺរ៉ុប ១ រូប។

ការស៊ើបការណ៍ខុសច្បាប់នៃទំនាក់ទំនងរបស់សមាជិកសភានានា គឺមិនអាចអត់ឱន និងលើកលែងបានឡើយ នេះបើតាមការឱ្យដឹងពីលោកស្រី Roberta Metsola អ្នកនាំពាក្យប្រធានសភាសហភាពអឺរ៉ុប។ ការរំលោភបំពានបែបនេះ​ ទៅលើគោលការណ៍ និងតម្លៃ ដែលជាគ្រឹះនៃប្រព័ន្ធ​លទ្ធិប្រជាធិបតេយ្យរបស់យើង គឺមិនអាចអត់ឱនឱ្យបានឡើយ។

សមាជិកសភាសហភាពអឺរ៉ុប ៧០៥ រូប ដែលជាស្ថាបនិកតាក់តែងគោលនយោបាយរបស់សហភាព អឺរ៉ុប បានបង្កើតគណៈកម្មាធិការស៊ើបអង្កេត​មួយរួចហើយ លើការប្រើប្រាស់កម្មវិធីកុំព្យូទ័រ Pegasus spyware ក្នុងប្រទេសជាសមាជិករបស់សហភាពអឺរ៉ុប ២៧ ប្រទេស។ រឿងអាស្រូ​វរបស់កម្មវិធីកុំព្យូទ័រ Pegasus ដែលបានកើតឡើងកាលពីឆ្នាំ២០២១ នោះ បានអង្រួនប្រទេសមួយចំនួនរបស់សហភាពអឺរ៉ុប ដូចជា ប្រទេសបារាំង និងប្រទេសប៉ូឡូញ ជាដើម។ លោកស្រី Metsola ចង់ឱ្យគណៈកម្មាធិការនេះ ត្រួតពិនិត្យលើសំណុំរឿងរបស់ប្រទេសក្រិកនេះ និងលើការហាមឃាត់ការអនុវត្តខុសច្បាប់ក្នុងសហភាពអឺរ៉ុប នេះបើតាមការឱ្យដឹងពីអ្នកនាំពាក្យប្រធានសភាសហភាពអឺរ៉ុបរូបនេះ ។

លោកស្រី Metsola បានឱ្យដឹងទៀតថា សភាសហភាពអឺរ៉ុប បានទទួលរួចហើយនូវសំណើសុំព័ត៌មានលើកដំបូងពីអាជ្ញាធរក្រិក ហើយនឹងស្វែងរកព័ត៌មានរួមគ្នាក្នុងរយៈពេលប៉ុន្មានថ្ងៃខាងមុខនេះ៕

http://ព័ត៌មានសភាអន្តរជាតិ ១៨-០៨-២២- កែវ ធាវីប្រែសម្រួលពី៖ https://nationalpost.com/pmn/news-pmn/crime-pmn/eu-parliament-to-help-probe-inexcusable-spying-on-greek-