លោកស្រី Nancy Pelosi ប្រធានសភាតំណាងសហរដ្ឋអាម៉េរិក

ប្រធានសភាតំណាងសហរដ្ឋអាម៉េរិកដំណើរការតាមផែនការរបស់លោកស្រីក្នុងការធ្វើដំណើរទៅកាន់សាធារណរដ្ឋចិន(កោះតៃវ៉ាន់) និងកោះប្រជុំសភាដើម្បីបោះឆ្នោតអនុម័តសេចក្តីសម្រេចមួយបញ្ចប់គោល នយោបាយចិនតែមួយដែលហួសសម័យកាលហើយ។ នៅក្នុងលិខិតរួមគ្នាមួយផ្ញើជូនលោកស្រី  Pelosi កាលពីថ្ងៃទី២២ ខែកក្កដា ឆ្នាំ២០២២ សមាជិកសភាតំណាង លោក Tom Tiffany និងលោក Scott Perry បានជំរុញទឹកចិត្តឱ្យលោកស្រី “ទាត់ចោលនូវការជំទាស់ពីមេដឹកនាំចិន និងលោកប្រធានាធិបតី Joe Biden”។

លិខិតខាងលើមានខ្លឹមសារថា “ក្នុងនាមជាប្រធានសភាតំណាងសហរដ្ឋអាម៉េរិក លោកស្រីមិនចាំបាច់ ទាល់តែសោះក្នុងការស្នើសុំការអនុញ្ញាតពីជនផ្តាច់ការបរទេស ឬក្រសួងការបរទេសអាម៉េរិក ដើម្បីជជែកពិភាក្សាជាមួយមិត្តភកិ្ត ឬសម្ព័ន្ធមិត្តរបស់អាម៉េរិក”។ ផែនការធ្វើដំណើរទៅកាន់កោះតៃវ៉ាន់របស់លោកស្រី Pelosi ត្រូវបានរាយការណ៍ជាលើកដំបូងកាលពីថ្ងៃទី១៨ ខែកក្កដា ឆ្នាំ២០២២ ដោយសារព័ត៌មាន Financial Times ដែលបានដកស្រង់ប្រភពពីមនុស្ស ៦នាក់ដែលស្និទ្ធនឹងកិច្ចការមួយនេះដោយពួកគេបានថ្លែងថា លោកស្រីប្រធានសភាវ័យ ៨២ឆ្នាំរូបនេះមានផែនការដឹកនាំគណៈប្រតិភូមួយក្រុមទៅកាន់កោះ​តៃវ៉ាន់ នៅក្នុងខែសីហា ឆ្នាំ២០២២ ដើម្បីបង្ហាញការគាំទ្រដល់ទីក្រុងតៃប៉ិ ក្នុងគ្រាដែលកោះមួយនេះកំពុងតែប្រឈមនឹងការគាបសង្កត់ពីរដ្ឋាភិបាលទីក្រុងប៉េកាំងកាន់តែខ្លាំងឡើងៗ។

ប៉ុន្តែយ៉ាងណាក៏ដោយ កាលពីថ្ងៃទី២០ ខែកក្កដា ឆ្នាំ២០២២ លោក Biden បានប្រតិកម្មទៅនឹងសេចក្តីរាយការណ៍ពីការធ្វើដំណើរមួយនេះ ដោយលោកថ្លែងថា មន្រ្តីយោធាយល់ថា “វាមិនមែនជាគំនិតល្អក្នុងកាលៈទេសៈនេះទេ”។  ប៉ុន្តែលោកមិនដឹងថា ទស្សនកិច្ចរបស់លោកស្រី Pelosi  ធ្វើឡើងក្នុងឋានៈអ្វីទេ  ហើយលោក រំពឹងថានឹងជជែកពិភាក្សាជាមួយលោកប្រធានាធិបតីចិន  Xi Jingping ក្នុងពេល ១០ថ្ងៃទៀត។ គួរបញ្ជាក់ផងដែរថា ចិនដែលចាត់ទុកតៃវ៉ាន់ថាជាផ្នែកមួយនៃទឹកដីរបស់ខ្លួននោះ បានបង្ហាញការជំទាស់យ៉ាងខ្លាំងក្លាចំពោះពាក្យចចាមអារ៉ាមថា លោកស្រី Pelosi ធ្វើដំណើរទៅកោះតៃវ៉ាន់។ លោក Zhao Lijian អ្នកនាំពាក្យក្រសួងការបរទេសចិនបានស្នើឱ្យទីក្រុងវ៉ាស៊ីនតោនត្រូវ “បញ្ឈប់នូវការបង្កើតភាពតានតឹងលើច្រកសមុទ្រតៃវ៉ាន់”។

ប្រសិនបើពាក្យចចាមអារ៉ាមនៃការធ្វើដំណើរនេះជាការពិត នោះលោកស្រី Pelosi នឹងក្លាយជាប្រធានសភាអាម៉េរិកក្នុងតំណែងដំបូងគេ ដែលទស្សនកិច្ចកោះតៃវ៉ាន់ គិតចាប់តាំងពីឆ្នាំ១៩៩៧មក ដែលនៅពេលនោះលោកប្រធានសភា Newt Gingrich បានធ្វើដំណើរទៅកាន់ទីក្រុងតៃប៉ិ និងបានចួបជាមួយលោកប្រធានា ធិបតីតៃវ៉ាន់   Lee Teng-hui  ក្នុងពេលចំណងទាក់ទងច្រកសមុទ្រតៃវ៉ាន់-ចិន កំពុងមានភាពតានតឹងផងដែរ៕

http://ព័ត៌មានសភាអន្តរជាតិ ២៧-០៧-២២- ឈាវ សុផាត ប្រែសម្រួលពី៖ https://focustaiwan.tw/politics/202207250013