លោក Juan Miguel Zubiri ប្រធានព្រឹទ្ធសភា និងលោក Ferdinand Martin Romualdez ប្រធានសភាតំណាង

កាលពីថ្ងៃចន្ទ ទី២៥ ខែកក្កដា ឆ្នាំ២០២២ សមាជិកសភាទាំងពីរថ្នាក់នៃសាធារណរដ្ឋហ្វីលីពីនបានបោះឆ្នោតជ្រើសតាំងប្រធានព្រឹទ្ធសភាថ្មី និងប្រធានសភាតំណាងថ្មី នៅមុនពេលដែលលោក Ferdinand “Bongbong” Marcos Jr.ប្រធានាធិបតីហ្វីលីពីន ឡើងថ្លែងសុន្ទរកថាថ្នាក់ជាតិ(Sona)ជាលើកទី១របស់លោក។ លោក Juan Miguel Zubiri ត្រូ​វបានជាប់ឆ្នោតដោយ ១៩សំឡេង នៃសមាជិកព្រឹទ្ធសភា ២៤រូប ក្លាយជាប្រធានព្រឹទ្ធសភានីតិកាលទី១៩។ លោក Ferdinand Martin Romualdez ត្រូវបានជ្រើសតាំងជាប្រធានសភាតំណាង​ ដោយទទួលបានការគាំទ្រ ២៨៣សំឡេង ២២សំឡេងមិនបោះឆ្នោត ៤សំឡេងអនុបវាទ និង ១សំឡេង បោះឆ្នោតជំទាស់។

លោក Romualdez ដែលជាប្រធានគណបក្ស Lakas-CMD គឺជាបងប្អូនជីដូនមួយរបស់លោក ប្រធានាធិបតី Marcos។ ទាំងលោក  Zubiri   និងលោក  Romualdez បានស្បថចូលកាន់តំណែង ក្រោយពីការបោះឆ្នោត។ នៅក្នុងការថ្លែងសុន្ទរកថាទទួលយកតំណែង លោក Zubiri បានថ្លែងថា សភានីតិកាលទី១៩នឹងមានការងារដែលត្រូវបំពេញជាច្រើនសន្ធឹក ហើយព្រឹទ្ធសភានឹងផ្តល់នូវដំណោះស្រាយ ជាជាងការចាប់កំហុស លោកសូមធានានូវ “ការដឹកនាំមួយប្រកបដោយការពិគ្រោះយោបល់ និងការកសាងនូវការមូលមតិគ្នា”។ ព្រឹទ្ធសភានឹងគាំទ្រនូវរាល់ការកសាងជាតិឡើងវិញ និងកិច្ចខិតខំប្រឹងប្រែងដើម្បីសង្គមជាតិ មិនមែនគ្រាន់តែជាការវាយប្រហារតាមប្រព័ន្ធបណ្តាញសង្គមនោះឡើយ។

សម្រាប់លោក Romualdez វិញ បានប្តេជ្ញាធានាថា សភាតំណាងហ្វីលីពីន “តំណាងនូវឆន្ទៈរបស់ ប្រជាជនយ៉ាងពិតប្រាកដ”។ “យើងនឹងធ្វើការពួតដៃគ្នា ដើម្បីធានាការអនុម័តបានលឿនរហ័សនូវវិធានការនានាដែលសង្គមយើងត្រូវការជាចាំបាច់…ជាមួយនឹងគោលដៅរួម គ្មានអ្វីដែលយើងមិនអាចធ្វើបាននោះឡើយ”។ លោកក៏បានសន្យាដែរថា លោកនឹងចូលរួមទុក្ខលំបាកនៅតាមមណ្ឌលបោះឆ្នោតទាំងអស់របស់សមាជិកសភា ហើយលោកក៏មិនគាំទ្រភាគីណាមួយដែរ។ លោក Romualdez បានថ្លែងបន្តថា “ការបែងចែកធនធាននានា សម្រាប់ការអភិវឌ្ឍតំបន់របស់យើង មិនថាជំនឿនយោបាយណាមួយឡើយនឹងត្រូវបាន ធ្វើឡើងដោយភាពត្រឹមត្រូវ និងសមភាព”។ គ្រួសារណាមួយក៏ដោយត្រូវតែធ្វើបរិយាបន្នទៅក្នុងរបៀបវារៈនីតិប្បញ្ញត្តិ ដោយមិនត្រូវទុកនរណាម្នាក់ចោលឡើយ៕

http://ព័ត៌មានសភាអន្តរជាតិ ២៦-០៧-២២- ឈាវ សុផាត ប្រែសម្រួលពី៖ https://www.sunstar.com.ph/article/1935922/manila/local-news/zubiri-elected-senate-president-romualdez-as-house-speaker