លោក Maeda Tadashi អភិបាលធនាគារជប៉ុន JBIC និងលោក Vuong Dinh Hue ប្រធានរដ្ឋសភាវៀតណាម

លោក Vuong Dinh Hue ប្រធានរដ្ឋសភានៃសាធារណរដ្ឋសង្គមនិយមវៀតណាម បានទទួលចួប លោក Maeda Tadashi ទេសាភិបាលធនាគារជប៉ុនសម្រាប់កិច្ចសហប្រតិបត្តិការអន្តរជាតិ(JBIC) នា  រដ្ឋធានីហាណូយ​ប្រទេសវៀតណាម កាលពីថ្ងៃសុក្រ ទី២២ ខែកក្កដា ឆ្នាំ២០២២កន្លងមក។ ក្នុងជំនួបនោះ លោក Hue បានវាយតម្លៃខ្ពស់ចំពោះការផ្តល់អនុសាសន៍របស់លោក Maeda ដល់ភាគីវៀតណាមសម្រាប់ការផ្លាស់ប្តូរថាមពល។

ស្វាគមន៍មេដឹកនាំធនាគារជប៉ុន JBIC ​លោក Hue បានថ្លែងថា រដ្ឋសភាវៀតណាម គាំទ្រភាពជាដៃគូយុទ្ធសាស្រ្តវៀតណាម-ជប៉ុន ដើម្បីពង្រឹងកាន់តែខ្លាំងក្លាថែមទៀត តាមបែបផែនមួយគ្រប់ជ្រុងជ្រោយ និងជាក់លាក់។ វៀតណាម និងជប៉ុនមានសក្តានុពលជាច្រើនបំពេញគ្នាទៅវិញទៅមក​ ប្រទេសទាំងពីរ គឺជាហត្ថលេខីនៃ កិច្ចព្រមព្រៀងគ្រប់ជ្រុងជ្រោយ និងវឌ្ឍនភាព សម្រាប់ភាពជាដៃគូអន្តរ-ប៉ាស៊ីហ្វិក(CPTPP) និងកិច្ចព្រមព្រៀងភាពជាដៃគូសេដ្ឋកិច្ចគ្រប់ជ្រុងជ្រោយតំបន់(RCEP)។ លោក Maeda បាន  ថ្លែងថា​ ធនាគាររបស់លោកបានដើរតួនាទីដ៏សំខាន់ ក្នុងការផ្តល់នូវឥណទាន និងថវិកាសម្រាប់គម្រោង កិច្ចសហប្រតិបត្តិការអន្តរជាតិរបស់ជប៉ុន។

លោក Maeda បានកត់សម្គាល់ថា ធនាគារ JBIC បានជំរុញគំនិតផ្តួចផ្តើមបង្កើត “សហគមន៍បំភាយឧស្ម័នកម្រិតសូន្យទ្វីបអាស៊ី” និងគំនិតផ្តួចផ្តើមការផ្លាស់ប្តូរថាមពលក្នុងប្រទេសជប៉ុន។ លោកក៏បានផ្តល់ ជាអនុសាសន៍ជាច្រើនជួយដល់វៀតណាមឱ្យយល់ដឹងពីការប្តេជ្ញាចិត្តដើម្បីសម្រេចបានការបំភាយឧស្ម័ន កម្រិតសូន្យត្រឹមឆ្នាំ២០៥០ នៅឯសន្និសីទស្តីពីបម្រែបម្រួលអាកាសធាតុលើកទី២៦ (COP26)របស់អង្គការសហប្រជាជាតិក្នុងពីឆ្នាំ២០២១។ លោក Hue​ បានឆ្លើយតបថា ការសម្រេចបានការបំភាយឧស្ម័ន កម្រិតសូន្យត្រឹមឆ្នាំ២០៥០ គឺជាបញ្ហាប្រឈមសម្រាប់វៀតណាម ប៉ុន្តែយ៉ាងណាក៏ដោយជាមួយនឹងការ ជឿជាក់លើខ្លួនឯង និងកិច្ចសហប្រតិបត្តិការពីដៃគូបរទេស រួមទាំង ជប៉ុនផងដែរ វៀតណាមនឹងសម្រេចគោលដៅ។

រដ្ឋសភាវៀតណាម កំពុងតែពិនិត្យមើលឡើងវិញច្បាប់ស្តីពីប្រេងនិងឧស្ម័ន និងសេចក្តីព្រាងច្បាប់ស្តីពីអគ្គិសនី ក៏ដូចជា ផែនការមេផ្សេងៗទៀត ព្រមទាំង គោលនយោបាយសំខាន់ៗរបស់ប្រទេសជាតិ។ លោក Hue ជឿជាក់ថា ប្រទេសជប៉ុននឹងបន្តធ្វើជាដៃគូដ៏សំខាន់ និងគួរឱ្យទុកចិត្តបាន ដើម្បីបំពេញ    គោលដៅបន្សាំបម្រែបម្រួលអាកាសធាតុ  ការផ្លាស់ប្តូរថាមពល  និងការប្តេជ្ញាចិត្តតាមសន្និសីទ  COP26៕

http://ព័ត៌មានសភាអន្តរជាតិ ២៥-០៧-២២- ឈាវ សុផាត ប្រែសម្រួលពី៖ https://en.vietnamplus.vn/na-chairman-hosts-jbic-leader/234269.vnp