លោក Arif Alvi ប្រធានាធិបតីនៃសាធារណរដ្ឋឥស្លាមប៉ាគីស្ថាន

រដ្ឋធានីអ៊ីស្លាប៉ាបាដ៖ តាមសេចក្តីរាយការណ៍របស់សារព័ត៌មាន ARY News កាលពីថ្ងៃព្រហស្បតិ៍ ទី២១ ខែកក្កដា ឆ្នាំ២០២២ បានឱ្យដឹងថា លោក Arif Alvi ប្រធានាធិបតីនៃសាធារណរដ្ឋឥស្លាមប៉ាគីស្ថាន នឹងកោះបើកសម័យប្រជុំសភាជាន់ទាបរបស់ខ្លួន នៅថ្ងៃពុធ ទី២៧ ខែកក្កដា ឆ្នាំ២០២២​ ខាងមុខនេះ។

មាត្រា ៥៤ នៃរដ្ឋធម្មនុញ្ញចែងថា ប្រធានាធិបតីប៉ាគីស្ថាន មានសិទ្ធិកោះបើកសម័យប្រជុំ សភាជាន់ទាប។ កាលពីដើមខែមិថុនា ឆ្នាំ២០២២ លោក Arif Alvi ប្រធានាធិបតីប៉ាគីស្ថាន បានបញ្ជូនសេចក្តីព្រាងច្បាប់ការិយាល័យគណនេយ្យភាពជាតិ និងសេចក្តីព្រាងច្បាប់ស្តីពីកំណែទម្រង់វិសោធនកម្មច្បាប់បោះឆ្នោតទៅនាយករដ្ឋមន្ត្រី ដើម្បីពិនិត្យ និងសម្រេចឡើងវិញ។ សេចក្តីព្រាងច្បាប់នេះ ត្រូវបានបញ្ជូនទៅលោក Shehbaz Sharif​ នាយករដ្ឋមន្ត្រីប៉ាគីស្ថាន រួចហើយ ដោយអនុលោមតាមមាត្រា ៧៥ (B) នៃរដ្ឋធម្មនុញ្ញ។

ប្រមុខរដ្ឋរូបនេះ បានណែនាំឱ្យគណៈកម្មាធិការជំនាញសភាពិនិត្យសេចក្តីព្រាងច្បាប់ទាំងពីរឡើងវិញ។ សេចក្តីព្រាងច្បាប់នេះ ត្រូវបានអនុម័តយ៉ាងប្រញាប់ដោយសភាជាន់ទាប កាលពីថ្ងៃទី០៦ ខែឧសភា ឆ្នាំ២០២២ និងអនុម័តដោយសភាជាន់ខ្ពស់ កាលពីថ្ងៃទី២៧ ខែឧសភា ឆ្នាំ២០២២ នេះបើតាមការកត់សម្គាល់របស់លោក Arif Alvi។

ប្រធានាធិបតីរូបនេះ បានបន្ថែមទៀតថា អ្នកជំនាញច្បាប់ និងអង្គការសង្គមស៊ីវិលនានា គួរតែត្រូវបានចូលរួម មុនការតាក់តែងសេចក្តីព្រាងច្បាប់ទាំងនេះ។ ប្រមុខរដ្ឋរូបនេះក៏ធ្លាប់បានណែនាំផងដែរ ឱ្យផ្តល់សិទ្ធិបោះឆ្នោតជូនប្រជាពលរដ្ឋប៉ាគីស្ថានដែលរស់នៅឯនាយសមុទ្រ កាលពីឆ្នាំ២០១៤ និង ២០១៨។ ប្រជាពលរដ្ឋប៉ាគីស្ថានដែលរស់នៅឯនាយសមុទ្រ អាចត្រូវបានផ្តល់លទ្ធភាពបោះឆ្នោត តាមរយៈការរីកចម្រើនផ្នែកបច្ចេកវិទ្យា អនុលោមតាមមាត្រា ១៧ នៃរដ្ឋធម្មនុញ្ញ៕

http://ព័ត៌មានសភាអន្តរជាតិ ២២-០៧-២២- កែវ ធាវីប្រែសម្រួលពី៖ HTTPS://ARYNEWS.TV/PRESIDENT-ARIF-ALVI-SUMMONS-NA-SESSION-ON-JULY-27/