លោក Igor Grosu​ ប្រធានសភានៃសាធារណរដ្ឋម៉ុលដាវី

រដ្ឋធានីជីស៊ីណូ៖ កាលពីថ្ងៃអាទិត្យ ទី២៩ ខែឧសភា ឆ្នាំ២០២២ លោក Igor Grosu ប្រធានសភានៃសាធារណរដ្ឋម៉ុលដាវី បានថ្លែងថា ប្រធានសភាទាំង៨ ប្រទេស នៃតំបន់ណ័រឌិក និងបាល់ទិក​ ហៅកាត់ថា «NB8»នឹងអញ្ជើញទៅបំពេញទស្សនកិច្ច នៅក្នុងសាធារណរដ្ឋម៉ុលដាវី នៅថ្ងៃទី៣១ ខែឧសភា​ ឆ្នាំ ២០២២ ដើម្បីបើកកិច្ចប្រជុំរួមគ្នាមួយ។.

សភាម៉ុលដាវី បានចេញសេចក្តីថ្លែងការណ៍មួយថា “ប្រធានសភាទាំង ៨ប្រទេស នៃតំបន់ណ័រឌិក និងបាល់ទិក (NB8)នឹងអញ្ជើញមកបំពេញទស្សនកិច្ចរួមគ្នាជាផ្លូវការ ទៅកាន់ប្រទេសម៉ុលដាវី តបតាម ការគំនិតផ្តួចផ្តើមរបស់លោកប្រធានសភា Igor Grosu។ ដំណើរទស្សនកិច្ចរួមគ្នានេះនឹងធ្វើឡើងដើម្បី ចូលរួមក្នុងវេទិកាសភាក្នុងប្រទេសម៉ុលដាវី នៅថ្ងៃអង្គារ ទី៣១ ខែឧសភា ដែលនៅទីនោះកិច្ចប្រជុំនៃបណ្តាប្រធានសភាប្រទេសលីទុយអានី ដាណឺម៉ាក អេស្តូនី ហ្វាំងឡង់ អ៊ីស្លង់ ឡេតូនី ន័រវែស និងស៊ុយអែតមួយនឹងត្រូវបានធ្វើឡើង”។

របៀបវារៈនៃដំណើរទេស្សនកិច្ចខាងលើ រួមមាន ជំនួបរួមមួយ ជំនួបជាមួយមេដឹកនាំក្រុមនានាក្នុង សភាម៉ុលដាវី និងជំនួបជាមួយលោកស្រី Natalia Gavrilitsa នាយករដ្ឋមន្រ្តីម៉ុលដាវី ក៏ដូចជា ដំណើរទស្សនកិច្ចទៅកាន់មណ្ឌលស្នាក់អាស្រ័យបណ្តោះអាសន្នសម្រាប់ជនភៀសខ្លួន   នៅក្នុងទីក្រុងជីស៊ីណូ។

គួរបញ្ជាក់ផងដែរថា ពាក្យកាត់ «NB8» គឺជាទម្រង់នៃកិច្ចសហប្រតិបត្តិក្រៅផ្លូវការមួយ ដែលកិច្ចប្រជុំដំបូងរបស់រដ្ឋមន្រ្តីក្រសួងការបរទេសនៃបណ្តារដ្ឋជាសមាជិក បានធ្វើឡើងក្នុងខែធ្នូ ឆ្នាំ១៩៩០។ ក្រុមប្រទេស NB8 រួមមាន ប្រទេសដាណឺម៉ាក អេស្តូនី ហ្វាំងឡង់ អ៊ីស្លង់ ឡេតូនី លីទុយអានី ន័រវែស និងស៊ុយអែត៕

http://ព័ត៌មានសភាអន្តរជាតិ ៣០-០៥-២២- ឈាវ សុផាត ប្រែសម្រួលពី៖ https://www.urdupoint.com/en/world/parliament-speakers-of-8-baltic-nordic-count-1517544.html