លោក Wang Chen ជួបសន្ទនាការងារជាមួយនឹងលោកស្រី Ana Maria Mary Machado តាមរយៈប្រព័ន្ធនិម្មិត

កាលពីថ្ងៃសុក្រ ទី២២ ខែមេសា ឆ្នាំ២០២២ លោក Wang Chen អនុប្រធានគណៈកម្មាធិការអចិ ន្ត្រៃយ៍សភាប្រជាជននៃសាធារណរដ្ឋប្រជាមានិតចិន(NPC) បានជួបសន្ទនាការងារជាមួយលោកស្រី Ana Maria Mary Machado អនុប្រធានសភាអំណាចប្រជាជននៃសាធារណរដ្ឋគុយបា (រដ្ឋសភា) តាមរយៈ ប្រព័ន្ធនិម្មិត ។

ថ្លែងពីរដ្ឋធានីប៉េកាំង លោក Wang ដែលជាសមាជិកការិយាល័យនយោបាយនៃគណៈកម្មាធិការ មជ្ឈិមបក្សកុម្មុយនិស្តចិនបានហៅប្រទេសចិន និងគុយបាថា ជាមិត្តល្អ សមមិត្ត និងបងប្អូន ។ លោក Wang បានមានប្រសាសន៍ថា សភាប្រជាជនចិនបានត្រៀមខ្លួនរួចជាស្រេចក្នុងការធ្វើការជាមួយសភាអំណាចប្រជាជនគុយបា ដើម្បីអនុវត្តន៍ការឯកភាពដ៏សំខាន់ដែលសម្រេចបានដោយប្រមុខរដ្ឋនៃប្រទេស ទាំងពីរ និងផ្តល់តួនាទីពេញលេញដល់តួនាទីសកម្មរបស់សភា ។ លោក Wang បានមានប្រសាសន៍បន្ថែម ទៀតថា សភាប្រជាជនចិនមានឆន្ទៈក្នុងការធ្វើការជាមួយសភាអំណាចប្រជាជនគុយបា ដើម្បីខិតខំប្រឹងប្រែងឥតឈប់ឈរធ្វើឱ្យកាន់តែស៊ីជម្រៅនូវមិត្តភាពរវាងប្រទេសទាំងពីរ ជំរុញការអនុវត្តគំនិតផ្តួចផ្តើមសន្តិសុខសកល និងប្រឆាំងនឹងអនុត្តរភាព ព្រមទាំងពង្រីកកិច្ចសហប្រតិបត្តិការលើវិស័យផ្សេងៗ ពង្រឹង លទ្ធិប្រជាធិបតេយ្យ និងនីតិរដ្ឋ និងបើកឱ្យទូលាយនូវការយល់ដឹងថ្មីនៃសង្គមនិយម ។

លោកស្រី Machado បានថ្លែងអំណរគុណដល់ប្រទេសចិនសម្រាប់ការគាំទ្រយ៉ាងម៉ឺងម៉ាត់ចំពោះបុព្វហេតុដ៏ត្រឹមត្រូវរបស់គុយបា ។ លោកស្រី Machado បានមានប្រសាសន៍ថា ប្រទេសគុយបាអនុវត្តន៍ យ៉ាងម៉ឺងម៉ាត់នូវគោលនយោបាយចិនតែមួយ និងប្រឆាំងរាល់សកម្មភាពដែលជ្រៀតជ្រែកចូលកិច្ចការផ្ទៃក្នុងរបស់ប្រទេសចិន ។ លោកស្រី Machado បានមានប្រសាសន៍ទៀតថា សភាអំណាចប្រជាជនគុយបា ត្រៀមខ្លួនជាស្រេចដើម្បីធ្វើការផ្លាស់ប្តូរកិច្ចសហប្រតិបត្តិការឱ្យកាន់តែស៊ីជម្រៅជាមួយសភាប្រជាជនចិន និងធ្វើការរួមចំណែក ថ្មីក្នុងការលើកកម្ពស់មិត្តភាពប្រពៃណីរវាងប្រទេសទាំងពីរ ៕

http://ព័ត៌មានសភាអន្តរជាតិ ២៥-០៤-២២-ផាត់ ត្រដែត ប្រែសម្រួលពី៖ https://english.news.cn/20220422/122b26e93bcc4df992d0e6403e463109/c.html