មើលលម្អិត

ប្រធានសភាតួកគី៖ ការជួយរំលែកបន្ទុកសកលលើបញ្ហាទេសន្តរប្រវេសន៍ មានសារៈសំខាន់ណាស់

លោក Mustafa Şentop ប្រធានសភាតួកគីថ្លែងបិទសុន្ទរកថា ក្នុងសន្និសីទសភាសកលស្តីពីទេសន្តរប្រវេសន៍

លោក Mustafa Şentop ប្រធានសភានៃសាធារណរដ្ឋតួកគីបានគូសបញ្ជាក់ថា យើងទាំងអស់គ្នាត្រូវជួយសម្រាលបន្ទុកដ៏ធ្ងន់ធ្ងរនៃទេសន្តរប្រវេសន៍របស់ប្រទេសនានា។ “យើងអាចពង្រឹងសាមគ្គីភាពតាម រយៈការទទួលយកជនភៀសខ្លួនមកកាន់ប្រទេសរបស់យើងដោយស្របច្បាប់ និងស្មើភាពអនុលោមតាមវិធាននៃច្បាប់អន្តរជាតិ”។ លោក Şentop បានថ្លែងបែបនេះក្នុងអំឡុងពេលលោកថ្លែងបិទសុន្ទរកថា នៅឯសន្និសីទសភាសកលស្តីពីទេសន្តរប្រវេសន៍។ លោក Şentop បានបន្តថា ការរំលែកបន្ទុកនេះ គួរតែមានរូបភាពលើសពីការផ្តល់ជំនួយហិរញ្ញវត្ថុទៅដល់ប្រទេសទទួលជនភៀសខ្លួន។ ការរួបរួមជាសកលដើម្បីទេសន្តរប្រវេសន៍ដែលអនុម័តក្នុងឆ្នាំ២០១៨ ដោយអង្គការសហប្រជាជាតិ គឺជាផែនទីបង្ហាញផ្លូវមួយដ៏សំខាន់សម្រាប់ប្រទេសនានា ហើយវាជារឿងចាំបាច់សម្រាប់ពង្រីកវិសាលភាពនៃការអនុវត្តកិច្ចព្រមព្រៀងពាក់ព័ន្ធ។ រដ្ឋជាសមាជិកអង្គការសហប្រជាជាតិបានអនុម័តនូវការរួបរួមជាសកលដើម្បីសុវត្ថិភាព សណ្តាប់ធ្នាប់ និងភាពទៀងទាត់នៃទេសន្តរប្រវេសន៍ក្នុងសន្និសីទអន្តរ-រដ្ឋាភិបាលដែលធ្វើឡើងក្នុងទីក្រុងMarrakechប្រទេសម៉ារ៉ុក កាលពីខែធ្នូឆ្នាំ២០១៨។ លោក Şentop បានថ្លែងថា ធាតុផ្សំដ៏សំខាន់ផ្សេងទៀត ក្នុងការប្រយុទ្ធប្រឆាំងនឹងទេសន្តរប្រវេសន៍មិនប្រក្រតី គឺការធានាសន្តិសុខព្រំដែន។ ក្នុងន័យនេះប្រទេសរបស់យើង ដែលស្ថិតក្រោមសម្ពាធធ្ងន់ធ្ងរនៃទេសន្តរប្រវេសន៍ បានធ្វើ និងបន្តធ្វើការវិនិយោគដ៏ធំ នៅព្រំដែនភាគខាងកើតក្នុងប៉ុន្មានឆ្នាំថ្មីៗនេះ។ តួកគី គឺជាចំណុចឆ្លងកាត់ដ៏សំខាន់មួយសម្រាប់ជនស្វែងសិទ្ធិជ្រកកោន ប៉ុនប៉ងឆ្លងទៅទ្វីបអឺរ៉ុប ដើម្បីចាប់ផ្តើម ជីវិតថ្មី ជាពិសេស ជនទាំងឡាយណាដែលរត់ភៀសខ្លួនពីសង្រ្គាម និងការធ្វើទុក្ខបុកម្នេញជាដើម។ ការរំលោភបំពានលើសិទ្ធិរបស់ជនភៀសខ្លួន ត្រូវតែរារាំងផងដែរ ក្នុងពេលចាត់វិធានការដើម្បីសន្តិសុខព្រំដែន។ តួកគីដែលបានទទួលយកជនភៀសខ្លួនក្នុងចំនួនច្រើនបំផុតនៅក្នុងពិភពលោក ក្នុងរយៈពេល ៨ឆ្នាំ ចុងក្រោយនេះ និងទទួលបានបទពិសោធពិតប្រាកដក្នុងការប្រយុទ្ធប្រឆាំងនឹងទេសន្តរប្រវេសន៍មិនប្រក្រតី នោះ បានបង្ហាញឱ្យឃើញម្តងទៀតតាមរយៈសន្និសីទមួយនេះ ដែលតួកគីតែងតែបើកចំហក្នុងការចែករំលែកបទពិសោធនៅក្នុងវិស័យនេះ។ គួរបញ្ជាក់ផងដែរថា សន្និសីទសភាសកលស្តីពីទេសន្តរប្រវេសន៍ ដែលធ្វើឡើងរយៈពេល២ថ្ងៃ សហការរៀបចំឡើងដោយសភាតួកគី និងសហភាពអន្តរ-សភា(IPU) ក្នុង ទីក្រុង Istanbul ប្រទេសតួកគី បានបិទបញ្ចប់កាលពីថ្ងៃអង្គារ ទី២១ ខែ មិថុនា ឆ្នាំ២០២២៕ ព័ត៌មានសភាអន្តរជាតិ ២៤-០៦-២២- ឈាវ សុផាត ប្រែសម្រួលពី៖ https://www.dailysabah.com/politics/diplomacy/global-burden-sharing-on-migration-vital-turkish-parliament-speaker

សភាបណ្តាទ្វីបពាក់ព័ន្ធ៖

ទ្វីអាស៊ី និងអូសេអានី

ទ្វីបអឺរ៉ុប

ទ្វីបអាមេរិក

ទ្វីបអាហ្វ្រិក