មើលលម្អិត

គណៈកម្មាធិការមួយរបស់រដ្ឋសភាថៃ យល់ស្របលើសំណើសុំបើកកាស៊ីណូ ៥ កន្លែង

គណៈកម្មាធិការរបស់រដ្ឋសភាថៃយល់ស្របលើសំណើសុំបើកកាស៊ីណូ ៥ កន្លែង

គណៈកម្មាធិការមួយរបស់រដ្ឋសភានៃព្រះរាជាណាចក្រថៃ ដែលកំពុងតែពិនិត្យមើលលើបញ្ហា កន្លែងកម្សាន្តកាស៊ីណូរបស់ជាតិនោះ បានយល់ស្របតាមសំណើឱ្យមានកន្លែងកម្សាន្តនេះ រហូត ដល់ទៅ ៥ កន្លែង នៅទូទាំងប្រទេស ខណៈដែលអ្នកដឹកនាំការអភិវឌ្ឍសេដ្ឋកិច្ចបានកំណត់ទីតាំងរួចហើយ។ ទីតាំងកន្លែងកម្សាន្តកាស៊ីណូចំនួន ៥ កន្លែង ដែលត្រូវបានលើកឡើងនោះ រួមមាន ខេត្ត Chiang Rai ឬ ខេត្ត Chiang Mai ភាគខាងជើង, ទីក្រុង Pattaya ភាគខាងកើត, ខេត្ត Phuket, ខេត្ត Phang-nga, និងខេត្ត Krabi ភាគខាងត្បូង, ខេត្ត Ubon Ratchathani, ខេត្ត Udon Thani និងខេត្ត Khon Kaen ភាគឦសាន និងរាជធានីបាងកក។ គំនិតខាងលើនេះ ត្រូវបានគេសង្ឃឹមថា នឹងអាចត្រូវបានគេដាក់ស្នើទៅរាជរដ្ឋាភិបាល នេះបើយោងតាមសេចក្តីរាយការណ៍ដែលបានចេញផ្សាយនៅលើបណ្តាញទំនាក់ទំនងសង្គមនានា កាលពីថ្ងៃ ព្រហស្បតិ៍ ទី៣០ ខែមិថុនា ឆ្នាំ២០២២ ដែលត្រូវបានគេដកស្រង់សំដីរបស់ថ្នាក់ដឹកនាំគណៈកម្មាធិការនេះ រួមទាំងលោក Pichet Chuamuangphan អនុប្រធានទី២ គណៈកម្មាធិការនេះផងដែរ។ ភាពស្របច្បាប់បែបនេះ នឹងត្រូវឆ្លងកាត់ការធ្វើវិសោធនកម្មលើច្បាប់ស្តីពី ការគ្រប់គ្រងល្បែងស៊ីសង រួមនឹងសំណើច្បាប់មួយទៀត ដែលនឹងត្រូវបញ្ជូនទៅរដ្ឋសភានៅខែវិច្ឆិកា ឆ្នាំ២០២២ ខាងមុខ នេះបើយោងតាមការដកស្រង់សំដីរបស់លោក Pichet ។ ប្រជាពលរដ្ឋដែលមានអាយុចាប់ពី២០ ឆ្នាំ ឬលើលពី២០ ឆ្នាំ នៅក្នុងអ្វីដែលពាក់ព័ន្ធក្នុងរបាយ-ការណ៍ ដែលមានស្ថានភាពហិរញ្ញវត្ថុរឹងមាំ នឹងត្រូវបានគេអនុញ្ញាតឱ្យចូលក្នុងកន្លែងកម្សាន្តបែបនេះ។ មន្ត្រីរាជរដ្ឋាភិបាល នឹងមិនត្រូវបានអនុញ្ញាតឱ្យចូលឡើយ លុះត្រាតែមន្ត្រីទាំងនោះ មានបេសកកម្មពិសេស។ លោក Pichet ត្រូវបានគេដកស្រង់សំដីថា គណៈកម្មាធិការនេះ នឹងស្នើឱ្យរាជរដ្ឋាភិបាលអនុញ្ញាតផ្តល់សម្បទានឱ្យមានភាពងាយស្រួល ជាមួយនឹងការវិនិយោគលើវិស័យឯកជន។ អនុលោមតាមផែនការនេះ រាជរដ្ឋាភិបាល នឹងរំពឹងថា ការយកពន្ធ ៣០% លើពន្ធដែលបានមកពីកន្លែងកម្សាន្តនានា។ របាយការណ៍នេះ មិនបានបញ្ជាក់ច្បាស់ ថាតើនោះជាពន្ធ ៣០% លើប្រាក់ចំណូលល្បែងស៊ីសងសរុបរបស់កាស៊ីណូ ឬថាតើអាចមានរចនាសម្ព័ន្ធផ្សេងទៀតមួយចំនួនដើម្បីដាក់បន្ទុកពន្ធលើរបរអាជីវកម្មបែបនេះ ឬយ៉ាងណា។ គណៈកម្មាធិការរដ្ឋសភានេះ មានជំនឿថា ផែនការនេះ នឹងជួយទប់ស្កាត់ល្បែងស៊ីសងខុសច្បាប់ និងសកម្មភាពឧក្រិដ្ឋកម្មផ្សេងៗ។ គណៈកម្មាធិការនេះត្រូវបានបង្កើតឡើងកាលពីដើមខែធ្នូ ឆ្នាំ២០២១ ដើម្បីពិនិត្យមើលលើបញ្ហានៃការបង្កើតទីតាំងល្បែងស៊ីសងក្នុងប្រទេសថៃ៕

ព័ត៌មានសភាអន្តរជាតិ ០១-០៧-២២- កែវ ធាវីប្រែសម្រួលពី៖ https://www.ggrasia.com/5-casino-thai-market-ok-says-national-assembly-committee/

សភាបណ្តាទ្វីបពាក់ព័ន្ធ៖

ទ្វីអាស៊ី និងអូសេអានី

ទ្វីបអឺរ៉ុប

ទ្វីបអាមេរិក

ទ្វីបអាហ្វ្រិក