មើលលម្អិត

146th IPU Assembly ៖ សមាជិកសភាអាហ្រ្វិកខាងត្បូង អំពាវនាវឱ្យមាន ការតែងតាំងអគ្គលេខាធិការអង្គការសហប្រជាជាតិ ជាស្រ្តីដំបូងគេ

លោក Cedric Frolick សមាជិកសភានៃសាធារណរដ្ឋអាហ្វ្រិកខាងត្បូង

ប្រតិភូសមាជិកសភានៃសាធារណរដ្ឋអាហ្រ្វិកខាងត្បូង ប្រចាំមហាសន្និបាតសហភាពអន្តរសភាលើកទី១៤៦ (146^th IPU Assembly) ដែលធ្វើឡើងនៅក្នុងរាជធានីម៉ាណាម៉ា នៃព្រះរាជាណាចក្របារ៉ែន បានអំពាវនាវឱ្យមានការតែងតាំងអគ្គលេខាធិការអង្គការសហប្រជាជាតិ(UN) ជាស្ត្រីដំបូងគេបំផុត មិនធ្លាប់មាន។ ប្រសិនបើស្រ្តី ត្រូវបានបោះឆ្នោតជ្រើសតាំង នោះវាគឺជាលើកដំបូងបំផុតនៅក្នុងប្រវត្តិសាស្រ្ត ៧៥ឆ្នាំ របស់ស្ថាប័នអន្តរជាតិមួយនេះ។ អនុសាសន៍របស់ប្រតិភូសមាជិកសភាអាហ្វ្រិកខាងត្បូង បានស្នើឡើងទៅកាន់គណៈកម្មាធិការ កិច្ចការអង្គការសហប្រជាជាតិ ក្នុងឱកាសនៃមហាសន្និបាត។ លោក Cedric Frolick ប្រធានគណៈកម្មាធិការត្រួតពិនិត្យ និងបច្ចេកវិទ្យាព័ត៌មាននិងទូរគមនាគមន៍ នៃរដ្ឋសភាអាហ្រ្វិកខាងត្បូងបានថ្លែងថា បើទោះបីជាអង្គការសហប្រជាជាតិបានប្តេជ្ញាចិត្តចំពោះសិទ្ធិស្រ្តី ប៉ុន្តែជាក់ស្តែង ការផ្លាស់ប្តូរនេះមានភាពយឺតយ៉ាវ។ មហាសន្និបាតអង្គការសហប្រជាជាតិ បានត្រួសត្រាយផ្លូវមុនគេថាសិទ្ធិស្រ្តី ជាសិទ្ធិមនុស្សតាំងពី ឆ្នាំ១៩៤៨មកតាមរយៈការអនុម័តសេចក្តីប្រកាសសកលស្តីពីសិទ្ធិមនុស្សទទួលស្គាល់...មនុស្សលោក ទាំងអស់កើតមកមានសេរីភាព និងស្មើភាពក្នុងសេចក្តីថ្លៃថ្នូរ និងសិទ្ធិ។ ក្រោយ៧៥ឆ្នាំ នៃការអនុម័តឯកសារដ៏សំខាន់មួយនេះ មានស្រ្តីតែ ៤រូបប៉ុណ្ណោះ ត្រូវបានបោះឆ្នោតជ្រើសតាំងជាប្រធានមហាសន្និបាត UN ហើយអនុបាតរវាងបុរស និងស្ដ្រីជាអគ្គលេខាធិការ UN ៩ទល់នឹង ០។ លោក Frolick “ក្នុងខែកញ្ញា ឆ្នាំ២០២២ នៅពេលប្រជុំកម្រិតខ្ពស់របស់ UN នៃមេដឹកនាំពិភពលោក ក្នុងចំណោម វាគ្មិន ១៩០រូប មានស្រ្តីតែ ២៣រូបប៉ុណ្ណោះ”។ សមភាពយែនឌ័រគឺជាភាពចាំបាច់សម្រាប់មុខតំណែងជាមេដឹកនាំ។ លោក Frolick ក៏បានថ្លែងផងដែរថា ការស្រាវជ្រាវបានរកឃើញថា ប្រទេសភាគច្រើនដែលមានមេដឹកនាំជាស្រ្តី បានធ្វើឱ្យមានភាពខុសគ្នានៅកម្រិតថ្នាក់ជាតិ ដោយពួកគេផ្តោតលើច្បាប់ និងគោលនយោបាយដែលលើកកម្ពស់សមភាពយែនឌ័រ និងធ្វើបានប្រសើរជាងច្រើនពាក់ព័ន្ធនឹងគោលដៅអភិវឌ្ឍន៍ប្រកបដោយចីរភាព (SDGs) របស់អង្គការសហប្រជាជាតិ។ គួរបញ្ជាក់ផងដែរថា “អាហ្វ្រិកខាងត្បូងគឺជាសមាជិកស្ថាបនិក ១ ក្នុងចំណោម ៥១ នៃអង្គការ UN ចាប់តាំងពីឆ្នាំ១៩៤៥មក។ ប្រទេសនេះបានតែងតាំង ស្រ្តីដំបូងគេឱ្យធ្វើជាឯកអគ្គរដ្ឋទូតអាហ្វ្រិកខាងត្បូងប្រចាំនៅ UN ចាប់តាំងពីខ្លួនបានចូលក្នុងអង្គការ UN វិញ នៅឆ្នាំ១៩៩៤”។ នេះគឺជាការធ្វើតេស្តចំពោះកិច្ចខិតប្រឹងប្រែងរបស់ប្រទេស ធ្វើឡើងដើម្បីធានាថា ពិតជាមានសមភាពយែនឌ័រនៅក្នុងអង្គការ UN៕

ព័ត៌មានសភាទ្វីបអាហ្វ្រិក ១៦-០៣-២៣- ឈាវ សុផាត ប្រែសម្រួលពី៖ https://www.sanews.gov.za/south-africa/sa-calls-appointment-first-female-un-secretary-general

សភាបណ្តាទ្វីបពាក់ព័ន្ធ៖

ទ្វីអាស៊ី និងអូសេអានី

ទ្វីបអឺរ៉ុប

ទ្វីបអាមេរិក

ទ្វីបអាហ្វ្រិក