មើលលម្អិត

សភាជាន់ទាបរុស្ស៊ីពិនិត្យ និងអនុម័តលើសេចក្តីព្រាងច្បាប់ដើម្បី បន្ថែមទម្ងន់ទោសលើបទល្មើសធ្វើទារុណកម្ម

រដ្ឋធានីមូស្គូ៖ កាលពីថ្ងៃពុធ ទី២២ ខែមិថុនា ឆ្នាំ២០២២ សភាជាន់ទាបសហព័ន្ធរុស្ស៊ី (State Duma) បានពិនិត្យ និងអនុម័តលើកចុងក្រោយលើសេចក្តីព្រាងច្បាប់មួយ ដាក់ឱ្យជាប់ពន្ធនាគារ រហូតដល់ ១៥ ឆ្នាំ ចំពោះបទល្មើសធ្វើទារុណកម្ម។ គោលបំណងនៃសេចក្តីព្រាងច្បាប់នេះ គឺកំណត់អំពីប្រភេទទារុណទណ្ឌកម្មនានា សកម្មភាពគំរាមកំហែងលើបុគ្គល ឬការបង្ខំមនុស្សណាម្នាក់ឱ្យប្រព្រឹត្តសកម្មភាពអ្វីមួយ។ សេចក្តីព្រាងច្បាប់នេះ បានកំណត់ឡើងវិញអំពី បទល្មើសនៃការធ្វើទារុណកម្មប្រព្រឹត្តដោយមន្ត្រីសាធារណៈ ដែលនឹងត្រូវជាប់ពន្ធនាគាររយៈពេល ១២ ឆ្នាំ។ លើសពីនេះទៀត សេចក្តីព្រាងច្បាប់នេះ បានកំណត់រយៈពេលជាប់ពន្ធនាគារពី ៣ ទៅ ១០ ឆ្នាំ ក្នុងករណីប្រើប្រាស់សិទ្ធិអំណាចរបស់ខ្លួនខុសច្បាប់ ដោយប្រើកម្លាំង គំរាមកំហែងដោយអំពើហិង្សា, គំរាមកំហែងដោយប្រើអាវុធ ឬបង្កឱ្យមានស្ថានភាពធ្ងន់ធ្ងរ ដែលរួមទាំង សកម្មភាពប្រព្រឹត្តលើអនីតិជនផងដែរ។ សកម្មភាពដូចគ្នានេះដែរ បូកជាមួយនឹងការធ្វើទារុណកម្ម នឹងត្រូវដាក់ទោសជាប់ពន្ធនាគាររយៈពេលពី ៤ ទៅ ១២ ឆ្នាំ រួមនឹងការដកសិទ្ធិកាន់កាប់តំណែងជាក់ស្តែងរយៈពេល ១០ឆ្នាំ។ សេចក្តីព្រាងច្បាប់នេះ ក៏បានដាក់ចេញនូវទោសជាប់ពន្ធនាគាររហូតដល់ ១៥ ឆ្នាំ រួមនឹងការ ហាមប្រាមមិនឱ្យកាន់កាប់តំណែងសំខាន់ៗ រយៈពេល ២០ ឆ្នាំ ចំពោះការធ្វើទារុណកម្មដែលបានបង្កឱ្យបាត់បង់ជីវិតជនរងគ្រោះដោយការធ្វេសប្រហែស ឬការបង្កទុក្ខទោសធ្វើឱ្យមានគ្រោះថ្នាក់ដល់ជីវិត។ សេចក្តីព្រាងវិសោធនកម្មច្បាប់នេះ សំដៅលើក្រមព្រហ្មទណ្ឌរបស់សហព័ន្ធរុស្ស៊ី៕

ព័ត៌មានសភាអន្តរជាតិ ២៣-០៦-២២- កែវ ធាវីប្រែសម្រួលពី៖ http://rapsinews.com/legislation_news/20220622/308047180.html

សភាបណ្តាទ្វីបពាក់ព័ន្ធ៖

ទ្វីអាស៊ី និងអូសេអានី

ទ្វីបអឺរ៉ុប

ទ្វីបអាមេរិក

ទ្វីបអាហ្វ្រិក