មើលលម្អិត

សភាលីបង់ បោះឆ្នោតជ្រើសតាំងលោក Nabih Berri ជាប្រធានសភាម្តងទៀត

លោក Nabih Berri ត្រូវបានសភាបោះឆ្នោតជ្រើសតាំងជាប្រធានសភាសម្រាប់អាណត្តិទី៧

ទូរទស្សន៍ក្នុងស្រុក al-Jadeed បានរាយការណ៍ឱ្យដឹងថា កាលពីថ្ងៃអង្គារ ទី៣១ ខែឧសភា ឆ្នាំ២០២២ សភារបស់ប្រទេសលីបង់បានបោះឆ្នោតជ្រើសតាំងអ្នកនយោបាយនិកាយមូស្លីមShi'ite លោក Nabih Berri ធ្វើជាប្រធានសភាសម្រាប់អាណត្តិទី៧ ដោយសំឡេងភាគច្រើន។ ប្រធានសភាជើងចាស់រូប នេះបានបន្តកាន់តំណែងរយៈពេល៤ឆ្នាំទៀត ដោយទទួលបានសំឡេងគាំទ្រចំនួន៦៥សំឡេង ក្នុងចំណោម សមាជិកសភាចំនួន១២៨រូប។ បន្ទាប់ពីការបន្តជាប់ឆ្នោតជាប្រធានសភាសម្រាប់អាណត្តិបន្ទាប់ លោក Berri បានអំពាវនាវដល់សមាជិកសភាឱ្យទុកការខ្វែងគំនិតគ្នាមួយអន្លើ ហើយរួមគ្នាធ្វើការដើម្បីបម្រើផលប្រយោជន៍ដល់ជាតិ និង ប្រជាជន។ លោក Berri ត្រូវបានគេដកស្រង់សម្តីថា “ប្រជាជនលីបង់ និងពិភពលោកកំពុងសម្លឹងមើលអ្នក(សមាជិកសភា)ថាជាពន្លឺនៃក្តីសង្ឃឹមតែមួយដែលអាចជួយសង្គ្រោះប្រទេសលីបង់”។ លោក Berri ដែលជាមេដឹកនាំគណបក្ស Shi'ite Amal Movement បានកាន់តួនាទីជាប្រធានសភាលីបង់តាំងពីឆ្នាំ១៩៩២ និងជាសម្ព័ន្ធមិត្តជិតស្និទ្ធរបស់គណបក្ស Hezbollah។ លទ្ធផលនៃការបោះឆ្នោតនៅខែឧសភានេះ បានបង្ហាញថាចលនាស៊ីអ៊ីតដែលគាំទ្រដោយអ៊ីរ៉ង់គឺគណបក្ស Hezbollah និងសម្ព័ន្ធមិត្តរបស់ខ្លួនបានបាត់បង់សំឡេងភាគច្រើន។ ប្រទេសលីបង់ បាននឹងកំពុងប្រឈមមុខនឹងវិបត្តិហិរញ្ញវត្ថុដ៏អាក្រក់បំផុតក្នុងប្រវត្តិសាស្ត្ររបស់ខ្លួន ហើយប្រទេសនេះចាំបាច់ត្រូវធ្វើកំណែទម្រង់រចនាសម្ព័ន្ធសំខាន់ៗ ដើម្បីដោះសោជំនួយរាប់ពាន់លានដុល្លារពីមូលនិធិរូបិយវត្ថុអន្តរជាតិ ៕

http://ព័ត៌មានសភាអន្តរជាតិ ០២-០៦-២២-ផាត់ ត្រដែត ប្រែសម្រួលពី៖ https://english.news.cn/20220531/12c168d2561f44de87c0c766bd1d4176/c.html

សភាបណ្តាទ្វីបពាក់ព័ន្ធ៖

ទ្វីអាស៊ី និងអូសេអានី

ទ្វីបអឺរ៉ុប

ទ្វីបអាមេរិក

ទ្វីបអាហ្វ្រិក